Tijim Olgeta We Oli No Save Rid Gud
1. ?Samtaem, wanem i hadwok long yumi long wok blong prij?
1 Taem yumi joen long wok blong prij, samtaem yumi faenem se i hadwok blong tijim trutok long samfala we oli no save rid gud. ?Yumi save mekem wanem?
2. ?Olsem wanem mo from wanem yumi mas soem respek long ol man we oli no save rid gud?
2 Soem Respek Long Olgeta: Samting we i moa impoten long Jeova hemia tingting no hat blong man, i no edukesen blong hem. (1 Sam. 16:7; Prov. 21:2) Taswe, yumi no lukluk daon long olgeta we oli no save rid gud. Ol man olsem bambae oli glad moa blong akseptem help blong yumi sipos yumi soem respek mo longfala tingting. (1 Pita 3:16 [15, NW]) Blong mekem olsem bambae yumi no fosem man blong ridim wan vas blong Baebol no wan haf insaed long wan buk. Taem man i lanem plante moa gudgudfala trutok blong Baebol, ating bambae hem i wantem tumas blong kam gud moa long riding blong hem, blong i faenem glad we i kamaot long fasin ya blong ridim tok blong God “long dei mo long naet.”—Sam 1:2, 3.
3. ?Wanem ol defren rod blong tijim olgeta we oli no save rid gud?
3 Ol Defren Rod Blong Tij Long Ol Baebol Stadi: Ol pija oli wan gudfala rod blong tijim man mo blong givhan long man blong rimemba ol samting we hem i lanem. Yu save askem studen blong talemaot samting we hem i luk long wan pija long buk we yu stap yusum. Biaen yu save askem sam kwestin we oli kliagud, mo oli givhan long hem blong kasem save wanem we pija ya i tijim. Yusum sam vas blong Baebol we oli tijim hem long ol poen we yu wantem hem i tingbaot long pija ya. Yu save yusum ol pija tu blong mekem tingtingbak long ol stadi. Yu no mas tijim plante samting wantaem. Talem bakegen bigfala tingting mo ol bigfala poen blong stadi, mo no tokbaot ol samting we oli no stap insaed long haf blong stadi. Ridim ol vas stret long Baebol, mo halpem studen blong kasem save long vas we hem i ridim taem yu yusum ol kwestin. Samting ya i save mekem se studen i wantem rid gud moa, blong i save lukaot sam moa trutok blong Baebol hem wan.
4. ?Olsem wanem yumi save givhan long studen blong yumi blong kam gud moa long fasin blong rid?
4 Ol Samting Blong Givhan Blong Rid: Samtaem, ol man we oli no save rid gud, mo olgeta we oli no gat plante janis blong lanem blong rid gud, oli kwik blong kasem save samting mo holem save ya i stap gud long tingting blong olgeta. Maet yu save leftemap tingting blong man olsem blong lesin long ol rikoding blong ol buk blong yumi we oli stap long CD. Taem hem i lesin gud long man we i mekem riding, i folem toktok blong riding ya long buk, mo hem tu i talem ol toktok bakegen long wan voes we i kwaet afta we hem i harem, samting ya bambae i halpem hem blong kam gud moa long fasin blong rid. Maet hem i faenem tu se buklet ya Apply Yourself to Reading and Writing i givhan long hem. Long sam ples, ol elda oli save mekem wan klas long kongregesen we i blong lanem olsem wanem blong rid. Ol rod ya we yumi tokbaot oli save givhan long yumi blong halpem olgeta we oli no save rid gud blong oli kasem save “ol tok blong Baebol,” we i save mekem olgeta oli waes, blong God i save sevem olgeta.—2 Tim. 3:15.