?Olsem Wanem Blong Givhan Long Man We i No Save Rid Gud?
1. ?From wanem i had blong givhan long ol man we oli no save rid gud?
1 Sam man oli laekem trutok, be oli no save rid gud. From samting ya, taem oli luk Baebol mo ol narafala buk oli fraet. Sipos yumi givim buk ya Baebol Tijim long ol man olsem, maet i no save wok gud. Taswe ?olsem wanem yumi save givhan long ol man ya blong oli save God? Mifala i askem advaes long ol pablisa blong bitim 20 defren kantri mo hemia ol advaes we oli givim.
2. ?Wanem ol buk we yumi save yusum blong givhan long ol man we oli no save rid gud?
2 Sipos wan Baebol stadi i no save rid gud no i no save rid nating, i gud yumi yusum buklet ya, Listen to God (long Franis mo Inglis) no Yu Mas Lesin Long God Nao Bambae Yu Laef Olwe. Wan paenia long Yunaeted Stet i stap soem tufala buklet ya long man, mo i askem long hem blong jusum wan we hem i laekem. Branj ofis long Kenya i talem se tufala buklet ya oli wok gud long ples blong olgeta. Ol man Afrika oli lanem moa samting, taem yu talem stori i bitim we yu ridim wan buk mo yu askem kwestin blong man i faenem ansa long hem. Olgeta we oli skul gud, maet i isi long olgeta taem yu askem kwestin we i stap long buk blong oli faenem ansa blong hem. Be sipos yumi mekem olsem long ol man we oli no skul gud, yumi save mekem oli sem mo oli harem nogud. Plante pablisa oli yusum ol buklet olsem, !Gud Nius We i Kam Long God! no !Yu Save Kam Fren Blong God! no maet oli yusum Buk Blong Ol Baebol Stori, sipos Baebol stadi i save rid smol.
3. ?Yu mas kasem save wanem long ol man ya we oli no save rid, blong yu save givhan long olgeta?
3 Yu Talem Gudfala Toktok Long Olgeta: Ol man we oli no save rid, maet oli sem mo oli ting se oli nogud. Taswe fas samting we yu mas mekem bifo we yu tijim olgeta long trutok, hemia blong leftemap tingting blong olgeta. Plante man we oli no save rid, oli waes mo oli naf blong lanem samting. Taswe i gud yu soem respek long olgeta mo yu mekem i gud long olgeta. (1 Pita 3:15) Olgeta bambae oli glad blong gohed blong stadi, sipos yu talem gudfala toktok long olgeta from oli stap gohed gud, mo from oli traehad blong mekem olsem.
Ol man we oli no save rid, maet oli sem mo oli ting se oli nogud. Taswe fas samting we yu mas mekem bifo we yu tijim olgeta long trutok, hemia blong leftemap tingting blong olgeta
4. ?Yumi save mekem wanem blong givhan long ol man olsem, blong oli rerem stadi blong olgeta?
4 Nating se Baebol stadi i no save rid gud, i gud blong leftemap tingting blong hem blong i rerem stadi blong hem. Sam pablisa long Saot Afrika oli leftemap tingting blong ol Baebol stadi blong olgeta, blong oli save askem long wan famle no wan fren we i save rid gud blong i givhan long olgeta. Wan pablisa long Inglan i pulum ol Baebol stadi blong hem blong oli rerem stadi blong olgeta. Ale hem i givim buk blong hem long olgeta blong oli yusum long taem blong stadi, olsem nao oli save luk se i isi moa blong faenem ansa long wan kwestin, taem oli putum laen aninit long ansa. Wan brata long India i leftemap tingting blong ol Baebol stadi blong hem, blong oli lukluk fastaem ol pija long stadi blong nekis wik, mo oli tingting dip long hem.
5. ?Taem yumi mekem stadi long man olsem, olsem wanem yumi save soemaot longfala tingting?
5 Yu Mas Gat Longfala Tingting: Nomata wanem buk yu yusum, yu mas tokbaot ol bigfala poen, mo yu givhan long Baebol stadi blong yu blong i kasem save gud long olgeta. Maet fastaem, i gud yutufala i stadi blong 10 kasem 15 minit nomo. Yu no tokbaot plante samting tumas, maet i gud yu tokbaot wan no tu paragraf nomo long evri stadi. Sipos Baebol stadi blong yu i rid slo, yu mas gat longfala tingting. Taem hem i lavem Jehova moa, bambae hem i traehad blong rid gud moa. Yu save givhan long hem blong i lavem Jehova moa, sipos long stat nomo, yu singaot hem blong i kam long miting.
6. ?Olsem wanem blong givhan long man blong i save rid?
6 Sipos ol Baebol stadi oli lanem blong rid gud, bambae oli gohed kwiktaem long trutok. (Sam 1:1-3) Sipos tingting blong Baebol stadi blong yu i foldaon, maet yu save leftemap tingting blong hem, taem yu tokbaot ol samting we hem save lanem blong mekem. Yu mekem hem i kasem save se Jehova bambae i blesem hem from hem i traehad, mo yu leftemap tingting blong hem blong i prea long Jehova blong i givhan long hem. (Prov. 16:3; 1 Jon 5:14, 15) Sam pablisa long Inglan oli leftemap tingting blong ol stadi blong olgeta blong oli tingbaot sam isi samting we oli save mekem, we i givhan long olgeta blong oli gohed gud. Maet fastaem oli save lanem ol leta blong alfabet (A,B,C), biaen oli lukluk ol vas we i stap long buk, mo oli traem faenem long Baebol mo oli ridim. Mo tu, maet oli yusum sam buk blong yumi we oli isi blong ridim. Blong givhan long ol man blong rid, plante taem yu mas pulum olgeta blong oli wantem rid, be i no blong tijim olgeta nomo olsem wanem blong rid.
7. ?From wanem yumi mas talemaot trutok long ol man we oli no save rid gud?
7 Jehova i no ting nating long olgeta we oli no skul gud. (Job 34:19) Hem i stap lukluk hat blong man. (1 Kron. 28:9) Taswe yumi mas talemaot trutok long olgeta ya tu we oli no save rid gud. Yumi gat plante gudfala buk blong statem stadi wetem olgeta. Biaen, yu save jenisim buk i go long Baebol Tijim, mo yu givhan long olgeta blong oli kasem save moa long Baebol.