?Yu Yu Rere Blong Joen Long Wan Bigfala Lafet Long Saed Blong Spirit?
1. ?Wanem ol samting we man i mas mekem blong rerem wan lafet?
1 Bifo we wan lafet i stat, i gat plante wok blong mekem blong rerem lafet ya. Ol man oli mas karem ol kakae, rerem ol kakae ya, mo putum long ol naesfala dis. Oli mas mekem plan se wanem kakae bambae oli putum fastaem, mo wanem kakae bambae i kam biaen. Mo oli mas rerem ples tu we bambae oli mekem lafet ya long hem. Ol man we oli singaot olgeta blong kam long lafet ya, olgeta tu oli mas rere, antap moa sipos oli stap farawe. I tru se i gat plante wok i stap blong mekemrere wan lafet, be biaen, ol man we oli kam long lafet ya oli save harem gud tumas from we oli kakae ol nambawan kakae mo oli joen wetem ol gudfala fren mo famle. Ol samting ya oli mekem we hadwok blong rerem lafet ya i no blong nating. I no longtaem, olgeta Witnes blong Jeova raon long wol bambae oli kam wanples long wan lafet long saed blong spirit. Long sam ples, lafet ya bambae i hivimap smol man nomo, mo long sam narafala ples bambae i hivimap plante man, mo evriwan i wantem tumas blong stap long lafet ya. Lafet ya hemia Distrik Asembli ya “!Lukaot Gud Oltaem!” Ol brata oli wok had finis blong rerem program mo ol samting we i nidim blong asembli ya. Mo oli singaot yumi evriwan blong go. Ale wanwan long yumi i mas reregud tu sipos yumi wantem stap long lafet ya mo harem gud long hem.—Prov. 21:5.
2. ?Blong stap long lafet ya long saed blong spirit, yu mas mekem wanem?
2 No Mestem Wan Gudfala Samting: ?Yu yu rerem gud ol plan blong yu finis blong stap long fulwan lafet ya long saed blong spirit? Sipos yu mas askem bos blong yu blong go long asembli, ale i gud yu talem long hem se bambae yu go long wan distrik asembli, mo letem hem i save se yu mas stap long evri dei blong asembli ya. ?Yu yu mekem ol plan blong yu finis long saed blong transpot mo ples blong slip? Ol elda oli mas mekem ol plan blong givhan long ol olfala mo olgeta we oli handikap, mo sam narafala we oli nidim help blong stap long asembli ya.—Jer. 23:4; Gal. 6:10.
3. ?From wanem yumi no mas go long intenasnal asembli we oli no invaetem yumi long hem?
3 Long sam kantri, ol brata bambae oli gat ol intenasnal asembli. I gud yu tingbaot se ol brata oli jusum sam kongregesen mo sam kantri nomo we oli invaetem olgeta blong go long ol asembli olsem. Taem oli mekem rere ol plan blong asembli ya, branj ofis i kaontem gud namba blong ol man we i stret blong singaot olgeta i kam long asembli ya, folem namba blong ol jea mo namba blong ol rum long hotel. Maet i no gat naf ples blong evri man sipos ol pablisa oli go long ol intenasnal asembli, we oli no invaetem olgeta long hem.
4. ?Wanem sam smol samting blong tingbaot bakegen bifo we program i stat evri dei?
4 I gud we evri dei yu kam eli long asembli blong faenem wan ples blong sidaon bifo we program i stat. Tekem smoltaem bifo we asembli i stat evri dei blong lukluk program mo ol tok we bambae oli kamaot. Samting ya i save rerem hat blong yu blong yu kasem ol save we bambae oli kamaot. (Esra 7:10, NW) Taem jeaman i askem yumi blong sidaon mo lesin long smol miusik bifo we program i stat, i gud yumi sidaon mo lesin long miusik ya mo rerem tingting blong yumi blong joen long singsing mo prea.
5. ?Yumi save mekem wanem blong traem blong no mestem wan gudfala samting long program?
5 Sipos ol papa mama oli sidaon wetem pikinini blong olgeta long taem blong asembli, bambae oli save lukluk sipos ol pikinini oli stap lesingud long ol tok. (Dut. 31:12) I gud yumi evriwan i openem Baebol mo folem riding blong olgeta vas we ol brata bambae oli ridim mo tokbaot. Sipos yu raetemdaon sam not, hemia tu i save halpem yu blong lesingud. Biaen, ol not ya we yu raetem bambae oli halpem yu blong tingbaot bakegen wanem ol impoten poen we i bin kamaot long ol tok. Long taem we ol brata oli stap givim tok, traehad blong no toktok wetem hemia we i sidaon klosap long yu blong tokbaot samting we i no impoten, mo traehad tu blong no go wokbaot. Sipos yu gat wan mobaelfon i gud yu ofem blong i no spolem yu mo ol narafala blong lesin long ol tok. Afta long wanwan dei blong asembli ya, i gud sipos yu storian wetem ol narafala long saed blong ol samting we yu laekem long ol tok we yu bin harem long dei ya.
6. ?Wanem wan nambawan haf blong distrik asembli, mo olsem wanem yumi harem gud fulwan long hem?
6 Long ol distrik asembli, yumi gat janis blong joengud wetem ol brata sista blong yumi. Ol man blong wol oli no gat gudfala fasin joen olsem. (Sam 133:1-3; Mak 10:29, 30) I gud yu mekem plan se long taem blong spel mo kakae long medel dei, bambae yu storian wetem olgeta we yu no save olgeta, we maet oli sidaon raonabaot long ples we yu stap sidaon long hem. Taswe i moagud blong rerem kakae we i isi blong karem mo wokbaot wetem, mo i moagud tu blong kakae long ples blong asembli bitim we yumi go aot blong kakae samples. I gud yu tingbaot blong no mestem janis blong leftemap tingting blong ol narafala olsem we yu wantem we olgeta tu oli leftemap tingting blong yu.—Rom 1:11, 12.
7. ?Wanem samting we yumi mas tingting rere long hem long saed blong ol klos blong yumi?
7 Klos: Tingbaot loa ya we Jeova i givim long ol man Isrel bifo. Hem i talem se taem oli somap klos blong olgeta, oli mas somap ol tasel oli stap hanghang long en blong klos blong olgeta daon, mo oli mas putum wan blu rop long ol tasel ya. (Nam. 15:37-41) Klos olsem i soemaot se ol man Isrel oli wan spesel neson we i wosip long Jeova. Tede, taem yumi werem ol klos we oli gud mo stret long asembli, yumi soemaot se yumi defren long ol man blong wol. Klos blong yumi i save givhan long yumi blong prij long ol man taem yumi goaot afta long asembli blong kakae samples. Taswe, i gud yu stat naoia blong tingbaot wanem klos we bambae yu putum.
8. ?Olsem wanem yumi save prij long ol man taem yumi stap long taon we distrik asembli i stap long hem?
8 Prij Long Ol Man: Sipos yumi plan gud bambae yumi save prij long ol man long taon ya we distrik asembli i stap long hem. Wan brata we i go kakae long restoron wetem woman blong hem afta long asembli, i soem baj blong hem long man we i wok long restoron mo i askem se: “?Yu luk plante man we oli gat baj olsem?” Man ya i talem se, yes, hem i bin luk plante man wetem ol baj ya mo i wantem save se from wanem oli werem ol baj ya. Hemia i givim janis long brata blong prij long man ya mo invaetem hem blong kam long distrik asembli.
9. ?Olsem wanem yumi soem tangkiu long Jeova we i singaot yumi blong kam long lafet blong hem?
9 I tru se ol brata blong yumi bambae oli givim ol tok, askem kwestin long samfala mo mekem ol pleplei, be Jeova, Papa blong yumi long heven, hem nao i givim ol kakae ya long saed blong spirit evri yia. (Aes. 65:13, 14) Yumi soem tangkiu long Jeova we i singaot yumi blong kam long lafet ya, taem yumi kam long evri dei blong asembli mo yumi kakae gud ol kakae ya long saed blong spirit we hem i rerem blong yumi. ?Yu yu mekem ol plan blong yu finis?
[Bokis blong pija long pej 6, 7]
Ol Samting Blong Tingbaot Long Saed Blong Distrik Asembli
◼ Taem Blong Program: Long trifala dei ya, program bambae i stat long twanti pas naen long moning. Ol doa blong haos asembli bambae oli open long eit klok long moning. Taem brata i talemaot se ol Kingdom miusik bambae i stat, yumi evriwan i sud sidaon finis, nao program i save stat long fasin we i gat oda mo i soem respek. Program bambae i finis long faef minit bifo faef klok long Fraede mo Sarede aftenun, mo long fo klok long Sande aftenun. Program blong intenasnal asembli bambae i stat long Tasde long twanti pas wan long aftenun, mo i finis long faef minit bifo faef klok long aftenun.
◼ Blokem Jea: Yu save blokem jea blong olgeta nomo we oli stap wetem yu long haos blong yu.
◼ Kakae Long Medel Dei: Plis karem kakae i kam long ples blong asembli, i bitim we yu aot long medel dei blong go kakae samples. Yu save karem kakae long wan smol eski mo putum aninit long jea blong yu. I tabu blong karem ol bigfala eski, ol glas, mo ol dring we i gat alkol long hem.
◼ Presen Mane: Yumi save soemaot tangkiu from asembli ya taem yumi givim presen mane long Haos Kingdom mo long ples blong asembli, blong sapotem wok blong Kingdom long ful wol.
◼ Aksiden Mo Sik: Long sam asembli we oli pas finis, samfala oli singaot dokta from ol samting we oli no impoten nating. Sipos wan aksiden no wan sik i kamaot long ples blong asembli, plis go talem long man blong welkam we i stap stanap klosap long yu, mo hem bambae i go long ofis blong dokta kwiktaem, blong oli save luk wanem help we sikman i nidim. Sipos hem i sik tumas, bambae oli singaotem ambulans.
◼ Rikoding: Yu no mas yusum lektrik long ples blong asembli blong rikodem samting.
◼ Pepa Blong Fulumap: Pepa ya Please Follow-Up (S-43) i blong raetem ol save long saed blong eni man we i soem intres taem yumi tekem janis blong prij long ol man long taem blong asembli. Ol pablisa oli mas karem wan no tu pepa olsem i kam long asembli. Afta we yu fulumap pepa ya, yu save givim long ol brata long Ples Blong Ol Buk, sipos no, afta long asembli yu save givim long sekretari blong kongregesen blong yu.—Lukluk Kingdom Wok Blong Yumi, Februari 2005, pej 6.
◼ Ples Blong Slip Mo Transpot: Ol Proveb 3:27 i talem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” ?Olsem wanem yu save mekem i gud long ol narafala long taem blong asembli? Ol pablisa we oli stap long ol aelan bambae oli kam long ples blong asembli. Oli mas mekem plan bifo we oli kam long saed blong ples blong slip mo transpot. Maet ol olfala pablisa, olgeta we oli handikap, olgeta we oli mekem wok blong fultaem paenia, mo sam narafala bakegen oli nidim help long saed blong transpot mo ples blong slip. Ol famle blong olgeta oli mas ol faswan we oli lukaot long olgeta. (1 Tim. 5:4) Be sipos ol famle oli no naf blong givhan, ol Kristin brata sista oli save givhan long olgeta. (Gal. 6:10) Ol elda we oli lukaot long ol grup, oli mas jekemgud olgeta we oli gat spesel nid long grup blong olgeta, blong meksua se oli mekem gud plan blong olgeta longtaem bifo we asembli i kam.
◼ I gat Pepa Blong Askem Rum Blong Slip blong olgeta we bambae oli joen long asembli. I gud se yumi evriwan i fulumap pepa ya longtaem bifo long asembli blong askem ples blong slip, no blong tekem samfala oli kam slip long haos blong yumi. Seves Komiti blong kongregesen i mas lukluk gud long fasin blong ol pablisa. Plan ya long saed blong ples blong slip i blong ol pablisa we oli gat ol gudfala Kristin fasin, mo ol pikinini blong olgeta we oli gat gudfala fasin tu.