Wan Taem Blong Kakae Gud Long Saed Blong Spirit Mo Harem Gud
1. ?Olsem wanem Jeova i givim samting we ol man blong hem oli nidim long saed blong spirit?
1 Oltaem Jeova i givim samting we ol man blong hem oli nidim long saed blong spirit, hemia i soemaot lav blong hem. Long wol tede, fulap man oli stap hanggri long saed blong spirit, be yumi, yumi stap kakae gud. (Aes. 65:13) Wan rod we Jeova i yusum blong fidim yumi long saed blong spirit, hemia tru long ol distrik asembli evri yia. ?Yumi stap mekem plan naoia blong stap long ful program blong Distrik Asembli ya we stamba tok blong hem “Spirit Blong God i Lidim Yumi”? Asembli ya i olsem wan bigfala lafet we Jeova i rerem wetem fulap ol gudfala kakae we oli save mekem yumi strong long saed blong spirit.
2. ?Wanem plan we yumi save mekem blong rere from asembli?
2 Mekem Plan Fastaem: “Man we i mekem gudfala plan mo i stap wok strong long hem, hem i save kasem plante samting.” (Prov. 21:5) From samting ya, sipos yumi plan gud blong stap long trifala dei asembli ya, i gud yumi askem long bos blong yumi naoia blong kasem dei blong spel long taem blong asembli ya. ?Sipos yufala i nidim wan ples blong slip, yufala i mekem plan finis long saed ya? Yufala i save mekem plan blong karem kakae blong yufala i kam blong yufala i save kakae wanples wetem ol brata sista long taem blong distrik asembli. Yufala i save mekem plan blong kam eli long trifala dei blong asembli ya blong faenem ol ples blong sidaon mo joen long faswan singsing mo prea.
3. ?Wanem kaen klos we yumi mas putum long taem ya?
3 Yumi mas putum ol klos we i stret mo i klin. (1 Tim. 2:9, 10) Distrik asembli i givim janis long yumi blong givim witnes long ol man raonabaot. I gud sipos ol klos blong yumi oli soemaot se yumi gat respek long ol man mo i gud yumi werem baj blong asembli oltaem, olsem nao yumi soemaot se yumi defren long ol man we oli no bilif mo ol man we oli wajem yumi oli save gat gudfala tingting long saed blong yumi.
4. ?Wanem bambae i givhan long yumi mo famle blong yumi blong lesin gud long ol program?
4 Lesin Gud: !Yumi no wantem mestem wan pis kakae long saed blong spirit we bambae oli givimaot long taem blong bigfala lafet ya! (Prov. 22:17, 18) Sipos yumi jekem ol vas long prapa Baebol blong yumi mo yumi tekem ol not, samting ya bambae i halpem yumi blong lesin gud mo no letem samting i pulum tingting blong yumi i gowe long ol tok. Nao taem program i finis long aftenun, yumi save tokbaot wetem ol narafala wanem ol impoten poen ya we yumi tekem not long hem finis. Long ol yia we oli jes pas, yumi luk ol yangfala oli sidaon tugeta long taem blong asembli mo oli storian long taem blong ol program, oli sanem ol mesej long mobaelfon blong olgeta. Sipos yumi gat pikinini, mo yangfala tu, i moa gud yumi sidaon wetem olgeta mo lesin gud long program bitim we yumi letem ol yangfala blong yumi oli sidaon wetem ol narafala yangfala.
5. ?Olsem wanem yumi save glad moa long taem blong asembli?
5 Harem Gud Long Kampani Blong Ol Narafala: Yumi haremgud moa long wan kakae taem yumi sidaon wanples wetem ol fren blong serem kakae ya. (Prov. 15:17) Long sem fasin, kampani blong ol brata sista blong yumi long taem blong asembli i mekem yumi harem gud. !From samting ya, taem we program i no stat yet, i gud blong tekem taem blong storian wetem olgeta we oli kam long narafala ples mo harem gud long kampani blong olgeta! (Sam 133:1) Taem jeaman i talem blong faenem wan ples blong sidaon bifo we miusik i stat, i gud blong stopem storian blong yumi mo go sidaon.
6. Talem wan ekspiriens blong yu wan blong soem olsem wanem yumi save givim witnes long ples we asembli i stap long hem.
6 Tekem Evri Janis Blong Givim Witnes: Ol asembli olsem oli givim nambawan janis long yumi blong givim witnes. Plante brata we oli kam long ol distrik asembli, taem oli gobak afta we program i finis, ol man we oli stap klosap long olgeta mo ol narafala oli askem long olgeta long saed blong asembli ya taem oli luk baj blong olgeta. Samting ya i pulum ol brata ya blong storian mo givim wan nambawan witnes, mo blong invaetem olgeta tu, nao sam long ol man ya oli kam long asembli.
7. ?From wanem i gud we yumi mas stap long distrik asembli we i stap kam?
7 I tekem plante taosen aoa blong rerem program, mekem rere ples blong asembli, mekem plan blong ol wok blong asembli, mo rerem ol tok. Ol brata oli mekem wok ya wetem lav blong rerem ol kakae long saed blong spirit, samting ya i soem se Jeova i kea bigwan long ol man blong hem. !Taswe yumi evriwan i mas stap long taem ya mo kakae gud! Taem yumi mekem olsem bambae yumi defren long ol man blong wol, bambae yumi save ‘singaot bigwan from we yumi harem gud long hat blong yumi.’—Aes. 65:14, NW.
[Bokis]
Ol Samting Blong Tingbaot Long Taem Blong Distrik Asembli
◼ Taem Blong Program: Long trifala dei ya, program bambae i stat long 9:20 long moning. Ol doa blong haos asembli bambae i open long 8 klok long moning. Taem bambae miusik i stat, yumi evriwan i mas sidaon rere, nao program i save stat long stret taem mo long fasin we i gat oda. Program bambae i finis long 4:55 long Fraede mo Sarede aftenun, mo long 4 klok long Sande aftenun.
◼ Paking: From we plante taem ples blong paking i smol, i moagud we plante man oli joen tugeta long wan trak, i bitim we i gat wan no tu man nomo long wan trak.
◼ Blokem Jea: Yu save blokem jea blong olgeta nomo we oli kam long trak wetem yu mo olgeta we oli stap long haos blong yu.
◼ Kakae Long Medel Dei: Plis tekem kakae nomo long ples blong asembli, i bitim we yu aot long ples blong asembli long medel dei blong go kakae. Yu save karem kakae long wan smol eski mo putum aninit long jea blong yu. I tabu blong karem ol bigfala eski, ol glas, mo ol dring we i gat alkol long hem.
◼ Presen Mane: Yumi save soemaot tangkiu taem yumi givim presen mane long Haos Kingdom blong yumi no long asembli, blong sapotem wok blong yumi long fulwol. Sipos yumi raetem wan jek olsem presen, yumi mas makem nem ya “A.S.T.J.” long hem.
◼ Aksiden Mo Sik: Sipos wan aksiden no wan sik i kamaot long ples blong asembli, plis go talem long man blong welkam we i stap stanap klosap long yu, blong hem i save go kwiktaem long ofis blong dokta blong singaot olgeta oli kam givhan long hemia we i sik. Olgeta ya bambae oli luksave sipos i nidim blong singaot wan ambulans i kam.
◼ Ol Jea Blong Pusum Bebi Mo Ol Jea We Man i Save Foldem: I tabu blong karem ol jea blong pusum bebi mo ol jea we yu save foldem i kam long ples blong asembli. Be i no tabu blong karem ol jea blong pikinini we oli putum long trak, from we ol papa mama oli save fasem jea ya long wan jea klosap long olgeta.
◼ Pepa Blong Gobak Luk Man We i Intres: Pepa ya Please Follow Up (S-43) i blong raetem ol save long saed blong eni man we i soem intres taem yumi tekem janis blong prij long olgeta long taem blong asembli. Yu save kasem pepa ya long ples blong Ol Buk. Afta we yu fulumap pepa ya, yu save givim long brata long ples blong Ol Buk, sipos no, afta long asembli yu save givim long sekretari blong kongregesen blong yu.—Lukluk long Kingdom Wok Blong Yumi blong Februari 2005, pej 6.
◼ Ples Blong Slip Mo Transpot: Ol Proveb 3:27 i talem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” ?Olsem wanem yu save mekem i gud long ol narafala long taem blong asembli? Ol pablisa we oli stap longwe bambae oli kam long ples blong asembli. Yumi save givhan long olgeta blong mekem plan fastaem blong faenem ples blong slip mo transpot. Ol pablisa we oli olfala, olgeta we oli handikap, olgeta we oli mekem wok blong fultaem paenia, mo sam narafala bakegen, oli nidim help long saed blong transpot mo ples blong slip. Ol famle blong olgeta oli mas ol faswan we oli lukaot long olgeta. (1 Tim. 5:4) Be sipos ol famle oli no naf blong givhan, maet ol Kristin brata sista oli save givhan long olgeta. (Gal. 6:10) Ol elda we oli lukaot long ol Buk Stadi, oli mas toktok gud wetem olgeta we oli gat spesel nid long buk stadi blong olgeta, blong meksua se oli mekem gud plan blong olgeta longtaem bifo we asembli i kam.
◼ I gat Pepa Blong Askem Rum Blong Slip blong olgeta we bambae oli kam long asembli. I gud se yumi evriwan i fulumap pepa ya longtaem bifo long asembli blong askem ples blong slip, no blong tekem samfala oli kam slip long haos blong yumi. Sevis Komiti blong kongregesen i mas lukluk gud long fasin blong ol pablisa. Oli mekem ol plan ya blong ol pablisa we oli gat ol gudfala Kristin fasin, mo ol pikinini blong olgeta we oli gat gudfala fasin tu.