?Olsem Wanem Blong Rerem Miting Blong Kingdom Wok?
1. ?From wanem i gat Miting blong Kingdom Wok, mo yumi mas mekem wanem blong miting ya i save givhan gud long yumi?
1 Miting blong Kingdom Wok i blong givhan long yumi blong karem gudfala frut long wok blong prij. Stamba tingting blong miting ya hem i long saed blong wok blong talemaot gud nius blong Kingdom, pulum man i kam disaepol, mo talemaot ol jajmen blong Jeova we oli klosap. (Mat. 28:20; Mak 13:10; 2 Pita 3:7) Miting ya i impoten, be sipos yumi wantem we miting ya i givhan gud long yumi, yumi mas rere gud mo yumi mas tekpat long hem.
2. ?Olsem wanem yu save rerem tingting blong yu blong lesin long wan tok?
2 Tok: Plante taem Kingdom Wok Blong Yumi i givim save long brata we i mekem tok, mo i talem wanem haf blong buk no magasin we tok ya i stanap long hem. Yumi wanwan i save ridim buk we ol save blong tok ya i stanap long hem, jekem ol vas, mo tingbaot olsem wanem blong yusum ol save ya long wok blong prij.
3. ?Olsem wanem blong rerem wan haf we hem i kwestin mo ansa?
3 Kwestin Mo Ansa: Haf ya i lelebet sem mak olsem taem yumi mekem Wajtaoa Stadi. Brata we bambae i mekem haf ya i talem wan smol fastok blong statem, mo i talem wan smol lastok tu blong finisim. Taem yu mekem rere haf ya, i gud yu ridim wanwan haf mo putum mak aninit long ol toktok we oli soemaot ol impoten tingting blong haf ya. Ale, yu save rere blong givim sam sotfala ansa we oli stret long poen blong haf ya we yumi tokbaot.
4. ?Olsem wanem blong rerem wan haf we oli talem se brata i mas pulum olgeta we oli lesin blong givim ansa?
4 Pulum Ol Man Blong Givim Ansa: Brata we i mekem haf ya bambae i mekem olsem wan tok, be wanwan taem bambae hem i askem kwestin long olgeta we oli lesin. Taem wanwan long yumi i rerem haf ya, i gud yumi traem faenem ol impoten tingting mo putum mak aninit long olgeta, mo i gud yumi jekem ol vas we oli stap. Olsem nao bambae yumi save givim ansa taem brata i askem sam kwestin. Brata we i mekem haf ya i mas traem bes blong hem blong pulum ol man we oli lesin blong givim ol ansa we oli makem ol bigfala poen long tok ya.
5. ?Taem i gat tok wetem pleplei blong wok blong prij, i gud yu rere olsem wanem?
5 Ol Pleplei: Long sam tok, ol brata bambae oli mas rerem sam pleplei we i laenapgud wetem fasin blong prij long ples blong yumi. Ol pleplei ya oli blong soemaot olsem wanem blong yusum ol save we yumi tokbaot, long teritori blong yumi. Brata we i mekem tok bambae i askem ol elda, ol pablisa we oli gat gudhan blong prij, mo ol paenia, blong mekem ol pleplei olsem. Taem yu mekemrere haf ya blong miting, nating se i no yu we bambae i mekem pleplei, be i gud yu tingbaot olsem wanem yu save mekem wan fastok blong serem save we haf ya i tokbaot. Sipos pleplei ya i laenap wetem wan long ol fastok we oli raetem i stap finis long Kingdom Wok, ale yu save tingbaot olsem wanem blong jenisim ol fastok ya lelebet, blong mekem i laenap wetem defdefren man we yu mitim long wok blong prij. Taem yu kam long miting i gud sipos yu karem buk no magasin we bambae oli yusum blong mekem pleplei ya. Maet long naet blong Baebol Stadi blong Famle, yu save mekem sam pleplei wetem famle blong yu blong lanem sam long ol fastok ya.
6. ?From wanem yumi mas rerem Miting blong Kingdom Wok?
6 Yumi save harem gud moa long Miting blong Kingdom Wok sipos yumi rerem ol defren haf blong hem mo yumi tektaem blong tingbaot ol wanwan haf blong hem bifo we yumi kam long miting. Taem yumi mekem olsem, bambae yumi givgivhan moa long yumi blong mekem bilif blong yumi i strong. (Rom 1:11, 12) Sipos yumi tekem taem blong rerem Miting blong Kingdom Wok, bambae yumi savegud ol rod blong mekemgud wok ya we i stap long han blong yumi.—2 Tim. 3:17.