?Ae Blong Yu i Klia Gud?
1. ?I minim wanem se yumi gat wan ae we i “klia gud”?
1 Wanem samting we ae blong yumi i luk we i save gat paoa long ol aksen blong yumi. Tok blong Jisas i tru nomo taem hem i talem se: “Ae blong man, hem i olsem laet blong bodi blong hem. Sipos ae blong yu i gud [“klia gud,” NW], bambae i olsem we bodi blong yu i fulap olgeta long laet.” (Mat. 6:22) Taem ae blong yumi i “klia gud” long saed blong spirit, tingting blong yumi i stap long wan samting nomo—hemia blong mekem samting we God i wantem. Yumi putum Kingdom fastaem. Yumi no letem samting blong bodi mo ol narafala samting we oli no impoten tumas, oli mekem yumi wari mo oli blokem yumi long ol wok blong kingdom.
2. ?Wanem i save mekem se tingting blong yumi i no klia, mo wanem i save givhan long yumi?
2 Yumi Mas Jekemap Yumi Wanwan: Televisin mo radio oli save mekem se tingting blong yumi i no klia gud, taem oli traem talem long yumi wanem samting we yumi nidim. Mo tu ol samting we narafala i gat i save mekem tingting blong yumi i no klia. Bifo we yumi jusum wan wok no yumi pem wan samting we bambae i kakae fulap taem blong yumi, mane mo paoa, i gud blong “wokemaot praes” fastaem. Blong mekem olsem, i gud blong askem se, ‘?Wok ya no samting ya we mi wantem pem, bambae i givhan long mi blong kamgud moa long wok blong Jeova no bambae i blokem mi?’ (Luk 14:28; Fil. 1:9-11) Mo tu, yumi waes taem yumi jekemap yumi wanwan taem blong luk sipos yumi save katemdaon sam samting long laef blong yumi, blong yumi save mekem moa long wok blong Jeova.—2 Kor. 13:5; Efes. 5:10.
3. ?Yumi lanem wanem long stori blong wan sista we i mekem laef blong hem i no fasfas tumas?
3 Wan sista i stat blong mekem wok blong fultaem paenia, be hem i no wantem lego fultaem wok blong hem, nating se hem i save kasem inaf mane blong lukaot long ol nid blong hem sipos hem i wok haftaem nomo. Biaen sista ya i talem se: “I no gat man we i save slef blong tu masta. Mi mas sakemaot tingting ya blong wantem ol samting we mi no rili nidim, mo mi mas lanem blong harem gud long samting we mi nidim nomo. Mi luksave se ol samting we mi gat oli mekem mi mi harem gud blong smoltaem nomo, mo sipos mi traehad blong kasem ol samting ya, bambae mi westem taem nomo.” Taem hem i skelem gud ol samting long laef blong hem, hem i luksave se hem i save mekem laef blong hem i no fasfas tumas, ale hem i jenisim wok blong hem. Samting ya i mekem se hem i save gohed long wok blong paenia.
4. ?From wanem i impoten tumas we yumi gat wan ae we i klia gud naoia?
4 Yumi laef long wan taem we i denja tumas i bitim bifo. Taswe i impoten tumas we yumi gat wan ae we i klia gud. Moa we ol dei oli pas, moa we yumi kam klosap long taem ya we wol ya wetem ol fasin blong hem bambae i lus mo niufala wol blong God bambae i kam. (1 Kor. 7:29, 31) Taem yumi bisi oltaem long wok blong prij, yumi save sevem yumi wanwan wetem ol man we oli lesin long yumi.—1 Tim. 4:16.