Wan Rod Blong Givhan Long Ol Man Blong God
1. ?Wanem niufala plan i stanap long yia 1938? ?From wanem plan ya i stanap?
1 Long yia 1938, ogenaesesen blong Jeova i stanemap wan niufala plan. Plan ya i blong singaot plante kongregesen oli kam wanples long wan asembli we oli kolem son asembli. Tede yumi kolem seket asembli. ?Oli mekem wanem long asembli ya? Long Jenuware 1939, smol pepa ya Informant (we naoia yumi kolem Kingdom Wok Blong Yumi) i talem se: “Asembli olsem i wan rod blong Tiokratik Ogenaesesen blong Jeova, blong givhan long yumi long wok blong Kingdom. Yumi evriwan i nidim tijing we yumi kasem long ol asembli ya, blong yumi save mekem gud wok we God i givim long yumi.” Long yia 1938, i gat 58,000 man blong talemaot Kingdom. Long yia 2009, i gat bitim 7 milian. Taem yumi luk olsem wanem namba ya i kam antap, yumi luksave se ol seket asembli oli givhan gud long ol man blong God blong ‘mekem gud wok we hem i givim long olgeta.’
2. ?Wanem save we bambae yumi harem long nekis seket asembli?
2 Stamba Tok Blong Nekis Seket Asembli: Yumi wet wetem glad long nekis seket asembli blong yumi, we long sam ples, i stat long Septemba. Bambae yumi kasem plante tok blong leftemap tingting blong yumi. Stamba tok blong asembli ya, “Yufala i No Man Blong Wol Ya,” i kamaot long Jon 15:19. ?Wanem sam long ol tok we bambae oli givhan long ol man blong God? Long Sarede, bambae yumi lesin long tok ya, “?Olsem Wanem Wok Blong Paenia i Lukaotgud Long Yumi?” Bambae yumi glad long wan tok bakegen we i gat tri haf blong hem, nem blong trifala se, “Yu No Mas Letem ‘Wael Anamol’ i Mekem Yu Yu Doti,” “Yu No Mas Letem ‘Woman Blong Rod’ i Mekem Yu Yu Doti,” “Yu No Mas Letem ‘Ol Bisnesman Blong Wol’ Oli Mekem Yu Yu Doti.” Long Sande, bambae yumi lesin long wan tok we i gat fo haf blong hem, nem blong tok ya, “Yu Mas Lavem Jeova, Be Yu No Lavem Wol.” I gat sam narafala tok tu, olsem, “Oltaem Yufala i Mas Stap Olsem ‘Ol Strenja Mo Ol Man We Oli No Gat Hom Blong Olgeta,’” mo “!Yufala i No Fraet! Yufala i Save Winim Wol Ya.”
3. ?Nekis seket asembli bambae i halpem yumi olsem wanem?
3 I no longtaem i pas, wan sista we i no moa prij plante i go long wan seket asembli. Biaen, hem i raetem leta blong talem se asembli ya i pulum hem blong tingting gud long laef blong hem, mo blong mekem tingting blong hem i strong bakegen blong “!go prij mo no moa mekem eskius!” Nekis seket asembli bambae i halpem yumi evriwan blong lavem Jeova, be i no wol ya. (1 Jon 2:15-17) Yu mas meksua se yu stap long asembli ya mo yu lesingud. !Olsem nao, bambae yu kasem olgeta gudfala samting we oli kamaot long rod ya we Jeova i mekem wetem lav, blong givhan long ol man blong hem!