Yu Mas Lukaot Gud Long Maen Blong Yu
1. ?Wanem stamba tok blong asembli blong tu dei long yia 2013? ?Asembli ya bambae i givhan long yumi olsem wanem?
1 Jisas i talem long ol disaepol blong hem se oli mas lavem Jehova long olgeta hat blong olgeta, mo long olgeta laef blong olgeta, mo long olgeta tingting blong olgeta. (Mat. 22:37, 38) Long yia ya, asembli blong wan dei, mo asembli blong tu dei, mo asembli blong tri dei, oli blong givhan long yumi blong yumi kam gud moa long ol tingting mo fasin blong yumi. Ating yu tingbaot stamba tok blong asembli blong tri dei, se: “!Yu Mas Lukaot Gud Long Tingting Blong Yu!” Long yia 2013, stamba tok blong asembli blong wan dei i olsem: “Yu Mas Lukaot Gud Long Tingting We i Save Jajem Yu.” Mo asembli blong tu dei we bambae i kamaot long yia 2013, stamba tok blong hem se: “Yu Mas Lukaot Gud Long Maen Blong Yu.” Stamba tok ya i stanap long Matiu 22:37. Asembli ya i blong givhan long yumi evriwan blong yumi jekem gud ol samting we yumi stap tingbaot, nao yumi save mekem sam jenis blong Jehova i glad moa long yumi.
2. ?Wanem ol kwestin we yumi mas lukaot ansa blong olgeta long asembli ya?
2 ?Wanem Save Bambae i Kamaot? Taem yumi lesin long asembli ya blong tu dei, yumi mas lukaot ansa blong ol kwestin ya we oli soemaot ol bigfala tingting blong asembli ya:
• ?Yumi save mekem wanem, blong yumi no gat “tingting blong man nomo”?
• ?Yumi save mekem wanem blong karemaot samting we i stap blokem tingting blong ol man, olsem we kaliko i blokem ae?
• ?Wanem tingting we yumi mas gat?
• ?Taem yumi tingting dip, wanem gudfala samting i kamaot?
• ?Yumi mas mekem wanem blong yumi letem Jehova i jenisim tingting blong yumi?
• ?Ol man mo woman we oli mared, mo ol papa mo mama, mo ol pikinini, oli save mekem wanem blong famle i glad moa?
• ?Yumi save mekem wanem blong yumi rere from dei blong Jehova?
• Mekem tingting blong yumi i rere blong wok, ?hemia i minim wanem?
• Taem man i mekem ol samting we hem i lanem oli wok long laef blong hem, ?wanem gudfala samting i save kamaot?
3. ?From wanem i impoten we yumi stap long tufala dei blong asembli ya, yumi lesin gud, mo yumi mekem ol save i wok long laef blong yumi?
3 Setan i stap faet agensem yumi, blong i traem kam bos long tingting blong yumi, mo blong i spolem gudfala tingting we yumi gat. (2 Kor. 11:3) Taswe, yumi mas bos long tingting blong yumi, mo yumi mas blokem Setan. Yumi mas gohed blong soemaot tingting blong Kraes, mo yumi mas agensem ol tingting blong rabis wol ya we oli save pulum yumi. (1 Kor. 2:16) Taswe, yu mas mekem plan, blong yu stap long tugeta dei blong asembli ya. Yu mas lesin gud. Sipos yumi mekem ol save ya i wok blong laef blong yumi, bambae tingting blong yumi i rere blong wok strong blong talemaot Kingdom.—1 Pita 1:13.