“Yufala i Mas Letem Laet Ya i Saenaot”
1. ?Wanem spesel presen we yumi kasem mo we yumi mas serem wetem ol narafala man?
1 Stat long moning i go kasem sapa, laet blong san i saen mo i mekem ol samting raonabaot long yumi oli naes tumas. Samting ya i leftemap nem blong Jehova God. Be i gat wan narafala laet we Jisas i talem se hem i “laet blong laef,” mo Jisas i talem se ol man blong hem oli mas gat laet ya. (Jon 8:12) Laet blong laef, we hemia save blong trutok, i olsem wan spesel presen we God i givim. Be taem man i kasem presen ya, hem i gat wan bigfala wok tu blong mekem. Jisas i talem se: “Yufala i mas letem laet ya i saenaot i kasem ol man.” Olsem nao, laet ya i save givhan long ol narafala man tu. (Mat. 5:16) Tede, ol man blong wol ya oli no gat laet blong laef. Oli stap long tudak we i tudak olgeta. Taswe yumi mas mekem laet ya i saenaot i go long olgeta, from we oli nidim laet ya moa naoia i bitim olgeta taem bifo. ?Ale, yumi mekem olsem wanem blong folem fasin blong Jisas blong letem laet ya i saenaot?
2. ?Jisas i mekem wanem blong soemaot we laet blong trutok i wan impoten samting blong givim long ol man?
2 Long Wok Blong Prij: Jisas i yusum taem blong hem, paoa blong hem, mo ol narafala samting we hem i gat, blong mekem laet blong trutok i kasem ol man long ol haos blong olgeta, long ol rod, long ol hil, mo long olgeta ples we hem i luk se i gat man long hem. Jisas i save se sipos wan man i kasem laet ya, bambae i givhan long hem blong olwe. (Jon 12:46) Jisas i wantem we laet ya i go kasem plante moa man. Taswe hem i trenem ol man blong hem blong olgeta tu oli kam “olsem laet long ol man long wol.” (Mat. 5:14) Oli letem laet ya i saenaot taem oli mekem i gud long ol man raonabaot long olgeta mo taem oli talemaot ol trutok blong God long ol man.
3. ?Wanem i soemaot se yumi tinghevi long laet ya blong trutok?
3 Ol man blong God oli tinghevi long tok ya we i talem se oli mas ‘holem fasin blong man blong delaet long laef blong olgeta.’ Taswe oli prij long evri ples we oli faenem man long hem. (Efes. 5:8) Sam brata sista we oli go long skul no long wok, oli tekem Baebol mo ol buk we oli tokbaot Baebol i go wetem olgeta. Ale, long taem blong spel, oli ridim ol buk ya. Fasin ya i openem rod blong oli storian wetem ol narafala long saed blong Baebol. Wan yangfala sista i mekem fasin ya long skul. Nao hem i statem wan Baebol stadi mo i givimaot ol buk long 12 fren blong hem.
4. ?Sipos yumi ‘letem laet i saenaot,’ from wanem yumi mas gat ol gudfala fasin tu?
4 Long Ol Gudfala Fasin: Ol fasin we yumi mekem evri dei, hemia tu i olsem we yumi stap letem laet i saenaot. (Efes. 5:9) Long ples blong wok, long skul, mo long evri ples we yumi wokbaot long hem, ol man oli luk ol Kristin fasin blong yumi, mo samting ya i save givim janis long yumi blong talemaot ol trutok blong Baebol long olgeta. (1 Pita 2:12) Hemia nao samting we i hapen long pikinini boe blong wan brata mo sista. Smol boe ya i gat faef yia nomo mo i mekem ol gudfala fasin long skul. Samting ya i pulum tija blong i toktok wetem papa mama blong boe ya. Tija ya i talem se: “Mi neva luk wan pikinini we i gat strong tingting olsem hem blong folem ol fasin we hem i save se oli stret.” Tru ya, wok blong prij mo gudfala fasin blong yumi i save pulum ol man oli kam long “laet blong laef,” mo i save leftemap nem blong God blong yumi.