“Delaet i Kam Long Wol Finis”
“God i save jajem man from poen ya, we delaet i kam long wol finis, be ol man oli no laekem delaet, oli laekem tudak.”—JON 3:19.
1. ?From wanem yumi evriwan i mas tingbaot jajmen blong God?
BIGHAF blong ol man tede oli no tingting tumas long jajmen blong God. Samfala oli ting se sipos oli go long skul oltaem mo oli no spolem narafala man, bambae God i jajem olgeta se oli oraet nomo. Sam narafala, oli no bilif long jajmen blong God, from we oli no save bilif long helfaea mo pegatri we ol skul blong Krisendoma oli tijim. I tru se samfala oli no kea, mo ol skul blong Krisendom oli gyaman long ol man tu, be samting ya i no save jenisim trutok ya: God bambae i jajem olgeta man evriwan. (Rom 14:12; 2 Timote 4:1; Revelesen 20:13) Plante samting oli dipen long jajmen ya. Ol man we God i jajem olgeta se oli gud bambae oli kasem presen ya, laef we i no save finis. Be ol man we God i jajem olgeta se oli nogud, bambae oli kasem ful pei blong sin: ded.—Rom 6:23.
2. ?Bambae God i jajem ol man from wanem poen?
2 Taswe ol trufala Kristin oli tingbaot jajmen blong God. Mo oli wantem tumas blong mekem God i glad. ?Olsem wanem oli save mekem samting ya? Long Jon 3:19, Jisas i talem ansa, i se: “God i save jajem man from poen ya, we delaet i kam long wol finis, be ol man oli no laekem delaet, oli laekem tudak, from we fasin blong olgeta i no stret.” Yes, bambae God i jajem man from poen ya, se: ?Hem i laekem delaet, no hem i laekem tudak?
“God Hem i Olsem Delaet”
3. ?Tudak i minim wanem? ?Delaet i minim wanem?
3 Ol man we oli stap long wol blong Setan oli stap long tudak long saed blong speret. Hemia i min se oli no gat plante save mo oli no gat hop, nating we Setan i stap mekem hem wan i kam olsem “wan enjel blong laet.” (2 Korin 4:4; 11:14; Efesas 6:12) Delaet we i kamaot long Jeova God i defren olgeta. Hemia i dip save we i mekem man i waes. Pol i tokbaot delaet ya, i se: “God ya we i tok finis, i talem se ‘Ale, laet i saenaot long tudak ya i kam,’ hemia sem God ya nomo we i mekem laet blong hem i saenaot finis, i kam kasem tingting blong mifala. Laet ya blong hem i mekem mifala i waes blong save bigfala paoa ya blong God we i bigfala tumas, we mifala i luk long fes blong Kraes.” (2 Korin 4:6) Blong soemaot se laet ya long saed blong speret i kamaot long Jeova God nomo, aposol Jon i talem se: “God hem i olsem delaet.”—1 Jon 1:5; Revelesen 22:5.
4. (a) ?Olsem wanem Jeova i givim delaet long ol man? (b) ?Olsem wanem yumi save soemaot se yumi laekem delaet ya?
4 Jeova i givim delaet long ol man from Tok blong hem. Tede ol man oli save ridim tok blong hem long Tabu Baebol. (Ol Sam 119:105; 2 Pita 1:19) Man we i raetemdaon ol Sam i talem se hem i laekem tumas delaet ya. Hem i se: “Mi mi laekem Loa blong yu tumas, mi stap tingting long hem i stat long moning, gogo kasem long sapa. Mi stap obei long ol rul we yu yu mekem, mo mi laekem ol rul ya long olgeta tingting blong mi.” (Ol Sam 119:97, 167) ?Yu yu laekem delaet ya olsem man ya blong raetem ol Sam i laekem? ?Yu yu ridim Tok blong God oltaem, mo tingting long hem, mo traehad blong mekem ol samting we hem i talem? (Ol Sam 1:1-3) Sipos yes, yu yu stap traehad blong kasem gudfala jajmen blong Jeova.
“Mi Mi Laet Blong Ol Man Long Wol”
5. ?Delaet we i kamaot long God i saenaot i go long hu fastaem?
5 Delaet ya we i kamaot long Jeova, we i save givim laef long man, hem i saenaot i go long Jisas Kraes fastaem. Fas tok blong Gospel blong Jon i talem olsem se: “Long [Jisas] i gat laef i stap. Mo laef blong hem i laet blong ol man. Laet ya i stap saen long tudak, mo tudak i no save winim hem.” (Jon 1:4, 5) Tru ya, Jisas i joen gud wetem laet ya. Taswe Baebol i talem se: “Hem i prapa laet we i save givim laet long olgeta man.” (Jon 1:9) Jisas hem wan i talem se: “Taem we mi mi stap yet long wol ya, mi mi laet blong ol man long wol.”—Jon 9:5.
6. ?Man i mas mekem wanem blong kasem gudfala jajmen, we i save lidim hem go kasem laef olwe?
6 Taswe olgeta we oli laekem laet ya oli laekem Jisas tu, mo oli bilif long hem. Sipos man i no bilif long Jisas, hem i no save kasem gudfala jajmen. Yes, hem i mas bilif se God i yusum Jisas olsem rod blong sevem ol man. Nao God i save jajem man ya se hem i stret. Jisas i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem. Kros blong God i stap finis long man olsem.” (Jon 3:36) ?Oraet, be man i mas mekem wanem blong soemaot bilif long Jisas?
7. ?Man we i soemaot bilif long Jisas i mas soemaot bilif long hu bakegen?
7 Jisas hem wan i talem faswan samting, i se: “Man we i bilif long mi, hem i no bilif long mi nomo ya, i bilif long hemia we i sanem mi mi kam. Mo man we i luk mi, hem i luk hemia we i sanem mi mi kam. Mi mi kam long wol ya, mi olsem laet, blong man we i bilif long mi bambae i save stap long laet, bambae i no moa gat samting blong mekem hem i stap long tudak.” (Jon 12:44-46) Olgeta we oli laekem Jisas mo oli soemaot bilif long hem oli mas gat bigfala lav mo bilif long Jeova tu, we hem i God mo Papa blong Jisas. (Matyu 22:37; Jon 20:17) Ol man we oli singaot nem blong Jisas long wosip blong ol, be oli no givim ona we i bigfala moa i go long Jeova, oli stap soemaot se oli no rili laekem laet.—Ol Sam 22:27; Rom 14:7, 8; Filipae 2:10, 11.
“Bigfala Man We God i Yusum”
8. ?Olsem wanem laet we i kamaot long God i pulum ol man blong tingbaot Jisas, taem hem i no bon long wol yet?
8 Mo tu, man we i soemaot bilif long Jisas i mas luksave prapa wok blong Jisas insaed long plan blong Jeova. Enjel we i tok long Jon i soemaot se wok ya i impoten tumas. Hem i se: “Trutok ya we i wetnes long Jisas se hem i tru, hemia i stampa blong ol tok blong ol profet.” (Revelesen 19:10, NW; Ol Wok 10:43; 2 Korin 1:20) I stat long faswan profet tok long Iden, olgeta profet tok we God i givim oli rili talemaot Jisas mo bigfala wok blong hem blong mekem plan blong God i kamtru. Taswe Pol i talem long ol Kristin man long Galesia se kontrak blong Loa i olsem “tija blong yumi, blong lidim yumi i go long Kraes.” (Galesia 3:24, NW) Olfala kontrak ya blong Loa i blong mekem nesen ya i rere long Jisas, taem bambae hem i kamtru olsem Mesaea. Taswe taem Jisas i no bon long wol yet, be laet we i kamaot long Jeova i pulum tingting blong ol man long hem finis.
9. ?I stat long 33 K.T., ol man we oli laekem laet oli luksave mo agri long wanem?
9 Long 29 K.T.,b Jisas i tekem baptaes mo tabu speret i kamdaon long hem. Long taem ya nao, hem i kam Mesaea we ol profet tok oli talemaot finis. Long 33 K.T., stret man ya i ded, i laef bakegen, mo i go antap long heven. Nao hem i givim praes blong laef blong hem i go long God blong kavremap ol sin blong yumi. (Hibrus 9:11-14, 24) Ale, long taem ya, wan nyufala taem i stat. God i no moa mekem long ol man olsem hem i mekem bifo. Jisas i kam “Bigfala Man we God i Yusum blong givim laef,” ‘Bigfala Man we God i Yusum blong sevem man,’ “Bigfala Man we God i Yusum blong givim bilif long yumi mo mekem bilif ya blong yumi i stret gud.” (Ol Wok 3:15, NW; Hibrus 2:10, NW; 12:2, NW; Rom 3:23, 24) I stat long 33 K.T. i go, ol man we oli laekem laet oli agri se “i no gat wan narafala man nating we i save sevem yumi. From we olbaot long wol ya, be God i no givim nem blong wan narafala man nating long yumi, we hem i stap yusum blong sevem yumi.” Yes, oli luksave se oli save kasem laef from Jisas nomo.—Ol Wok 4:12.
10. ?From wanem i impoten tumas blong harem ol tok blong Jisas mo obei long olgeta?
10 Mo tu, ol man we oli soemaot bilif long Jisas oli agri se hem i “Waes Tok” mo hem i “Nambawan Man blong Givim Advaes.” (Jon 1:1; Aesea 9:6) Oltaem ol samting we Jisas i talem i stret long trutok blong God. (Jon 8:28; Revelesen 1:1, 2) Sipos man i harem tok blong Jisas, samting ya i save sevem laef blong hem. Jisas i talem long ol man Isrel long taem blong hem, i se: “Man we i harem tok blong mi, mo i bilif long hem we i sanem mi, hem i gat laef we i no save finis. Hem i no save pas long bigfala kot. Hem i aot finis long ded, hem i kam long laef.” (Jon 5:24) Long faswan handred yia K.T., olgeta we oli harem ol tok blong Jisas oli aot long tudak blong wol blong Setan, mo i olsem we oli kam long laef. God i luk olgeta olsem we oli stret man finis, nao oli save tingbaot we long fyuja bambae oli save joen wetem Kraes long Kingdom blong hem long heven. (Efesas 1:1; 2:1, 4-7) Tede tu, taem man i obei long ol tok blong Jisas, samting ya i mekem rod blong God bambae i save luk hem olsem wan stret man. Nao man olsem i save tingbaot we long fyuja hem i save laef tru long Amageden, blong kasem laef we i stret gud long nyufala wol.—Revelesen 21:1-4; skelem wetem Jemes 2:21, 25.
“Hed Long Olgeta Samting”
11. ?Long 33 K.T, Jisas i kasem wanem haenem mo paoa?
11 Taem Jisas i laef bakegen long ded, hem i soemaot long ol disaepol blong hem wan narafala mining blong delaet. Hem i se: “Olgeta paoa long heven mo long wol, mi mi kasem finis.” (Matyu 28:18, NW) Jeova i leftemap Jisas, i mekem hem i hed long ogenaesesen blong hem long heven mo long wol. Pol i talem moa long saed ya, i se: “[God] i mekem [Jisas] i laef bakegen long ded, mo i tekem hem i go sidaon long raet saed blong hem long heven, i hae moa long ol gavman, ol haeman, ol man blong paoa, mo ol masta. Mo hem i antap long olgeta narafala nem we man i save talem long wol ya mo long narafala wol we bambae i kam. God i putum olgeta samting oli stap daon finis, aninit long leg blong Kraes. Mo hem i putumap Kraes i hed blong olgeta samting long kongregesen, we i olsem bodi blong hem.” (Efesas 1:20-23, NW; Filipae 2:9-11) I stat long 33 K.T, ol man we oli laekem delaet oli mas respektem haenem ya blong Jisas.
12. ?Longtaem finis ol Kristin we tabu speret i makemaot olgeta oli agri long wanem samting? ?Blong soemaot samting ya, oli mekem wanem?
12 Bambae olgeta man oli mas luksave paoa mo haenem blong Jisas. (Matyu 24:30; Revelesen 1:7) Be ol man we oli laekem delaet, longtaem finis oli glad blong respektem haenem ya. Ol memba blong Kristin kongregesen we tabu speret i makemaot olgeta oli agri se Jisas hem i “hed blong bodi blong hem, we bodi ya blong hem, hemia [kongregesen ya, NW].” (Kolosi 1:18; Efesas 5:23) Taem oli joen long bodi ya, i olsem we ‘God i tekemaot olgeta long paoa blong tudak, i tekem olgeta insaed long kingdom blong Pikinini blong lav blong hem.’ (Kolosi 1:13, NW) Biaen, oli traehad blong folem hed blong olgeta, Jisas, long olgeta haf blong laef blong ol. Mo long taem blong yumi oli tijim “ol narafala sipsip” blong mekem olsem tu. (Jon 10:16) Sipos man i luksave mo i respektem Jisas olsem hed blong olgeta samting, hemia i wan bigfala samting we i givhan long hem blong kasem gudfala jajmen.
13. ?Wetaem Jisas i stat blong yusum haenem mo paoa blong hem long Kingdom? ?Biaen, wanem i kamaot long wol ya?
13 Long 33 K.T., Jisas i go antap long heven. Be hem i no tekem haenem mo paoa blong hem wantaem nomo. Hem i hed long Kristin kongregesen finis, be hem i wet long stret taem blong yusum ful paoa mo haenem blong hem long ol man long wol. (Ol Sam 110:1; Ol Wok 2:33-35) Stret taem ya i kam long 1914. Long taem ya, Jisas i sidaon long jea blong king long Kingdom blong God, mo “ol las dei” blong wol ya i stat. (2 Timote 3:1, NW) I stat long 1919, wok blong hivimap ol laswan we tabu speret i makemaot olgeta i gohed. I stat long 1935, Jisas i wok strong moa blong seraotem ol man long tu kampani. “Ol sipsip” bambae oli tekem “kingdom ya we longtaem bifo hem i rere finis long [olgeta].” Be “ol nani . . . bambae oli go blong lus blong olwe.”—Matyu 25:31-34, 41, 46, NW.
14. ?Olsem wanem wan bigfala kampani i soemaot se oli laekem delaet? ?Bambae oli mas kasem wanem from?
14 Yumi glad we i gat fulap sipsip long ol las dei ya. I gat wan bigfala kampani blong olgeta long wol, we oli kasem plante milyan naoia. Oli kamaot “long olgeta kala mo long olgeta laen, mo long olgeta kantri, mo long olgeta lanwis.” Ol sipsip ya oli fren wetem kampani we tabu speret i makemaot olgeta. Olsem olgeta, ol sipsip ya tu oli laekem delaet. “Oli wasem klos blong olgeta finis blong mekem oli waet long blad blong Smol Sipsip ya.” Mo oli singaot bigfala, oli se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.” From samting ya, bigfala kampani ya i mas kasem gudfala jajmen. Ol memba blong hem bambae “oli pastru long taem blong bigfala trabol.” (NW) Bambae oli laef tru long faet ya, Amageden, we i spolem ol man we oli laekem tudak.—Revelesen 7:9, 10, 14.
“Ol Pikinini Blong Delaet”
15. ?Olsem wanem ol fasin blong yumi oli save soemaot we yumi obei mo ona long King ya, Jisas Kraes?
15 Oraet nao, God i putumap Jisas olsem King mo Jaj. Nating we man i blong ol narafala sipsip no i blong kampani we tabu speret i makemaot olgeta, ?be olsem wanem nao hem i save obei mo ona long Jisas? Hem i mas traehad blong soemaot ol fasin we Jisas i glad long ol. Taem Jisas i stap long wol, hem i soemaot se hem i tinghae long ol man we hat blong olgeta i tru, we oli mekem ol samting wetem ful hat blong olgeta, mo we oli strong blong leftemap trutok. Mo hem wan i stap soemaot ol fasin ya tu. (Mak 12:28-34, 41-44; Luk 10:17, 21) Sipos yumi wantem we God i givim gudfala jajmen long yumi, yumi mas wokem ol fasin ya.
16. ?From wanem i impoten blong lego long ol fasin we oli blong tudak nomo?
16 Samting ya i tru moa naoia, from we en blong wol i kam kolosap finis, mo wol blong Setan i stap kam tudak moa. (Revelesen 16:10) From samting ya, tok we Pol i raetem i go long ol man Rom i stret nomo, i se: “I kolosap nomo we tudak bambae i finis, delaet i kamtru long yumi. I gud yumi lego long ol fasin we oli blong tudak nomo. I gud yumi holem ol samting blong faet blong yumi, nao yumi kamtru long delaet. I gud yumi stap mekem ol stret fasin, olsem ol man we oli stap oltaem long delaet. Bambae yumi no mekem ol rabis lafet, mo yumi no dring grog we yumi lusum hed. Bambae yumi no mekem nogud wetem woman, mo yumi no mekem ol doti bisnes. Bambae yumi no mekem rao, mo yumi no jelas.” (Rom 13:12, 13) I tru se laef blong olwe i wan presen we God i givim nomo. Be ol fasin blong yumi oli mas soemaot we bilif blong yumi i rili tru mo we yumi laekem delaet. (Jemes 2:26) Taswe fasin blong God blong jajem yumi bambae i dipen bigwan long samting ya: olsem wanem yumi traehad blong mekem ol gudfala fasin mo sakem ol rabis fasin.
17. ?“Tekem Masta blong yumi Jisas Kraes, olsem klos” i minim wanem?
17 Aposol Pol i givim advaes long Rom 13:12, 13 olsem yumi luk finis, nao hem i gohed olsem: “Yufala i mas tekem Masta blong yumi Jisas Kraes, olsem klos blong yufala. Nao bambae yufala i no moa tingbaot ol rabis fasin we bodi blong yufala i wantem.” (Rom 13:14, NW) ?“Tekem Masta blong yumi Jisas Kraes, olsem klos” i minim wanem? I minim se ol Kristin man oli mas folem fasin blong Jisas. I olsem we oli tekem eksampel mo ol fasin blong hem, nao oli werem olsem klos blong olgeta, oli traehad blong folem Kraes. Pita i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.”—1 Pita 2:21.
18. ?Ol man we oli wantem kasem gudfala jajmen oli mas jenisim laef blong olgeta olsem wanem?
18 Blong folem eksampel blong Kraes, samtaem man i mas jenisim laef blong hem bigwan. Pol i talem se: “Bifo, yufala i stap long tudak nomo, be naoia we yufala i joen long Masta blong yumi, yufala i stap long delaet. From samting ya, yufala i mas holem fasin blong [ol pikinini blong delaet, NW]. From we fasin blong man blong delaet, hem i gat ol gudgudfala frut blong hem. Ol man olsem, oli stap mekem ol fasin we i gud, mo i stret, mo i tru.” (Efesas 5:8, 9) Olgeta we oli stap mekem ol fasin blong tudak, oli no laekem delaet. Blong kasem gudfala jajmen, olgeta oli mas jenisim fasin blong ol.
“Yufala i Olsem Laet Long Ol Man Long Wol”
19. ?Wanem sam rod blong Kristin man i mekem laet blong hem i saenaot?
19 Laswan samting: Man we i laekem delaet hem i mekem delaet ya i saenaot i kasem ol narafala man, blong olgeta oli wantem kam long delaet tu. Jisas i talem se: “Yufala i olsem laet long ol man long wol.” Hem i gohed olsem, i se: “Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.” (Matyu 5:14, 16) Ol gudfala wok ya blong Kristin man oli gud, oli stret, mo oli tru. I olsem we ol gudfala fasin ya oli wetnes se trutok i tru. (Galesia 6:10; 1 Pita 3:1) Wan gudfala wok ya, hemia wok blong talemaot trutok long ol man. Tede, yumi mas joen long wok ya blong talemaot “gud nyus ya blong kingdom . . . long olgeta ples long wol we i gat man long hem, blong oli wetnes long olgeta nesen.” Mo tu, yumi mas gobak long ol man we oli soemaot intres, stadi Baebol wetem olgeta, mo givhan long olgeta wetem longfala tingting. Nao olgeta tu oli save mekem ol gudgudfala wok blong delaet.—Matyu 24:14, NW; 28:19, 20.
20. (a) ?Tede, olsem wanem laet i stap saenaot bigwan? (b) ?Olgeta we oli mekem ol wok blong delaet, oli stap harem gud long wanem blesing?
20 Yumi save talem tangkyu long ol gudfala Kristin man we oli stap prij strong long taem blong yumi. From hadwok blong olgeta, gud nyus i go finis long bitim 200 kantri long wol. Laet i stap saenaot moa naoia i bitim ol yia bifo. Jisas i talem se: “Mi ya mi laet blong ol man long wol. Man we i biaen long mi, bambae hem i no wokbaot olsem we i stap long tudak nomo. Hem bambae i gat laet blong laef.” (Jon 8:12) !Yumi glad tumas we promes ya i stap kamtru long laef blong yumi! Laef blong yumi i gud moa, from we yumi no moa harem nogud long tudak long wol blong Setan. Mo yumi save tingbaot nambawan fyuja, taem bambae Jaj we Jeova i putumap hem i givim gudfala jajmen long yumi. (2 Timote 4:8) !Be sore tumas sipos yumi lego delaet ya, mo sloslou yumi gobak long tudak, nao bambae yumi kasem nogud jajmen from! Long nekis haf blong magasin ya, bambae yumi storebaot olsem wanem yumi save mekem bilif blong yumi i stap strong.
[Ol futnot]
a Hemia ol gyaman Kristin skul.
b K.T. i min se Kristin Taem.
?Yu Yu Save Ansa?
◻ ?Bambae God i jajem ol man from wanem poen?
◻ ?Jisas i mekem wanem stampa wok long saed blong plan blong God?
◻ ?Olsem wanem yumi stap soemaot se yumi ona mo obei long Jisas olsem King ya we Jeova i putumap?
◻ ?Olsem wanem yumi save soemaot se yumi “pikinini blong delaet”?
◻ ?Long wol ya we i tudak we i tudak, olsem wanem delaet i stap saenaot moa naoia i bitim ol yia bifo?
[Tok Blong Pija Long Pej 10]
Bambae olgeta man oli mas luksave paoa mo haenem blong Jisas
[Tok Blong Pija Long Pej 12]
Yumi stap soemaot se yumi laekem delaet taem yumi mekem i saenaot long ol narafala