“Oltaem Yufala i Mas Mekem Samting Ya Blong Tingbaot Mi Bakegen”
Bambae Yumi Tingbaot Ded Blong Jisas Long Eprel 2
1. ?From wanem Eprel 2, 2007, i wan impoten dei?
1 Long Eprel 2, 2007, plante milian man raon long wol bambae oli joen wanples blong tingbaot ded blong Jisas. Jisas i ded from we hem i sapotem hae rul blong Papa blong hem long heven. Hem i pruvum se Setan i giaman taem hem i talem se ol man oli mekem wok blong God nomo from we oli wantem kasem ol samting we oli wantem. (Job 2:1-5) Lodsapa i mekem yumi tingbaot tu se Jisas i ‘givim laef blong hem blong pem rod blong plante man oli go fri.’ Hem i mekem olsem taem hem i ded olsem wan man we i stretgud olgeta, i no gat sin. (Mat. 20:28) Taswe, Jisas i givim oda long ol disaepol blong hem se: “Oltaem yufala i mas mekem samting ya blong tingbaot mi bakegen.” (Luk 22:19) ?Olsem wanem? ?Fasin tangkiu i pusum yu blong yu rere blong kam long Memoriol blong soemaot se yu tingbaot nambawan lav ya?—Jon 3:16.
2. ?Olsem wanem yumi save rerem tingting blong yumi from Memoriol?
2 Rerem Tingting Blong Yu: Taem yumi tingting gud long ol samting we oli hapen long ol laswan dei blong laef blong Jisas long wol ya, yumi save rerem tingting blong yumi from Memoriol ya. (Esra 7:10) Blong givhan long yumi long saed ya, yumi save faenem wan spesel program blong ridim Baebol long smol buk ya, Ridimgud Ol Tok Blong Baebol Evri Dei—2007 mo long 2007 Calendar. Taem yumi stap mekem Baebol riding ya, yumi save folemgud long kalenda blong yumi ol samting we oli hapen long Jisas long ol wanwan dei bifo mo afta we hem i ded. Ol dei we oli stap long ol stori blong Baebol, oli stanap long kalenda blong ol man Jiu. Long kalenda ya, wan dei i stat taem san i go slip, mo i finis taem san i go slip bakegen. Mifala i tingbaot samting ya taem mifala i wokem program blong ridim Baebol long taem blong Memoriol. Taem yumi ridim Baebol mo yumi prea mo tingting dip long bigfala lav blong God, hemia bambae i givhan gud long yumi blong kasem fulwan mining blong ol samting we yumi mekem long Memoriol.
3. ?Olsem wanem yumi save givhan long olgeta we oli intres mo olgeta we oli slak blong Memoriol i save halpem olgeta?
3 Singaot Ol Narafala Blong Oli Kam: Pepa we i joen wetem Kingdom Wok Blong Yumi blong Februari i tokbaot wan spesel wok blong singaotem ol man oli kam long impoten miting ya. ?Olsem wanem? ?Yu yu rere blong joen fulwan long spesel wok ya? ?Yu mekem wan lis finis blong ol man we yu wantem singaot olgeta, mo yu stat finis blong go luk olgeta? Long dei blong Memoriol, yu mas mekem plan blong kam eli long Haos Kingdom, blong yu save mekem welkam long olgeta we yu singaot olgeta oli kam, wetem olgeta we oli intres. Ating yu wantem sidaon wetem olgeta, blong meksua se oli gat wan Baebol mo wan singbuk. Tekem olgeta i go long ol narafala brata sista long kongregesen blong talem halo. Afta long miting, tekem taem blong ansa long ol kwestin blong olgeta. Askem long olgeta blong oli kam long spesel pablik tok we bambae i kamaot long Eprel 15. Ol elda bambae oli meksua se olgeta we oli joen long kongregesen bifo, be afta oli kam slak, oli mas kasem wan pepa blong singaotem olgeta oli kam long Memoriol mo long spesel pablik tok.
4. ?Afta long Memoriol, olsem wanem yumi save givhan long ol man blong oli gohed gud long save blong olgeta long saed blong Jeova?
4 Givhan Long Ol Niuwan Mo Olgeta We Oli Slak Blong Oli Gohed Gud: Brata we i mekem tok long Memoriol bambae i eksplenem kwiktaem rod we yumi folem blong stadi Baebol, mo hem i leftemap tingting blong ol niuwan blong oli gohed blong lanem ol save long saed blong Jeova. Yu save yusum tok blong brata ya blong askem long olgeta sipos yu save givhan long olgeta blong oli kasem moa save. Sipos oli no stadi Baebol yet, meksua se yu visitim olgeta kwiktaem afta long Memoriol mo soemaot rod long olgeta blong stadi Baebol fri nomo. Blong oli gohed gud long save mo bilif blong olgeta, oli mas joen long ol miting blong kongregesen tu. (Hib. 10:24, 25) Taswe, yu mas leftemap tingting blong olgeta blong oli joen oltaem long ol miting. Ol elda oli mas mekem plan blong visitim ol Kristin we oli kam long Memoriol be oli slak, mo oli mas givhan long olgeta blong oli tingbaot ol poen we i kamaot long tok blong Memoriol. Hemia i save givhan long olgeta blong oli joen bakegen blong mekem ol wok long kongregesen.
5. ?Miting blong Memoriol bambae i givhan long yumi olsem wanem?
5 Memoriol i givim janis long yumi blong tingting gud long samting we Jeova mo Jisas tufala i mekem blong yumi. Fasin blong tingting dip olsem i mekem lav blong yumi long tufala i kam dip moa mo i gat paoa long ol fasin blong yumi. (2 Kor. 5:14, 15; 1 Jon 4:11) Naoia i taem blong yumi stat blong rerem yumi mo olgeta we oli intres, from impoten miting ya we i talemaot “ded blong Masta blong yumi.”—1 Kor. 11:26.