Yu No Mas Blokem Yu Wan—Winim Tingting Ya Se Yu No Naf
1. ?From wanem samfala oli fraet blong mekem wan Baebol stadi?
1 ?Yu yu fraet blong mekem wan Baebol stadi, from we yu ting se yu yu no naf blong mekem? I gat sam man blong God bifo olsem Moses mo Jeremaea, we olgeta tu oli harem se oli no naf blong mekem wok we Jehova i givim long olgeta. (Eks. 3:10, 11; 4:10; Jer. 1:4-6) Tede tu, plante long yumi oli harem olsem. ?Yumi save mekem wanem blong winim tingting ya?
2. ?From wanem yumi no mas gat tingting ya se i wok blong narafala blong mekem ol Baebol stadi?
2 Yu mas tingbaot oltaem se Jehova i no save askem long yumi blong yumi mekem wan samting we yumi no naf blong mekem. (Sam 103:14) Taswe wok ya blong ‘pulum ol man’ mo blong “tijim olgeta,” hem i wan wok we yumi naf blong mekem. (Mat. 28:19, 20) Jehova i no givim wok ya long ol man nomo we oli skul gud mo we oli gat gudhan. Nogat. (1 Kor. 1:26, 27) Yu no mas ting se wok blong yu i blong prij nomo long ol haos wanwan, mo se ol narafala nao oli mas mekem ol Baebol stadi.
3. ?Jehova i mekem wanem blong givhan long yumi blong yumi mekem ol Baebol stadi?
3 Jehova i Mekem Yumi Naf: Gudhan we yumi kasem blong pulum ol man oli kam disaepol, hem i kam long Jehova nomo. (2 Kor. 3:5) Jehova i yusum ogenaesesen blong hem blong tijim trutok blong Baebol long yumi. Plante man long wol we oli skul gud oli no gat ol save ya. (1 Kor. 2:7, 8) Jehova i mekem se oli raetemdaon fasin blong Jisas blong tijim ol man i stap long Baebol, blong yumi save folem. Mo tu hem i mekem se insaed long kongregesen, yumi gat wan skul we i trenem yumi blong tij. Antap long hemia, Jehova i givim ol buk we oli save givhan long yumi blong tijim Baebol long ol man. Hem i givim ol tul, olsem buk ya Baebol Tijim we i klia gud mo i isi blong man i kasem save long hem. Bambae yu luk se i isi nomo blong mekem wan Baebol stadi.
4. ?From wanem yumi trastem Jehova se bambae i givhan long yumi?
4 Moses mo Jeremaea, tufala i mekem gud wok blong tufala, from we Jehova i givhan long tufala. (Eks. 4:11, 12; Jer. 1:7, 8) Yumi tu yumi save askem long Jehova blong i givhan long yumi. Taem yumi mekem wan Baebol stadi, yumi stap tijim hem blong i save gud Jehova. Hemia wan wok we Jehova i glad tumas long hem. (1 Jon 3:22) Taswe i gud we yu traehad blong joen long wok ya blong mekem ol Baebol stadi. Olsem nao bambae yu glad, mo yu kasem blesing.