Yu No Mas Blokem Yu Wan—Winim Tingting Ya Se Yu Bisi Tumas
1. ?Wanem i mekem se samfala oli no wantem mekem ol Baebol stadi?
1 Sam brata mo sista oli no wantem gat wan Baebol stadi from we oli bisi tumas. I nidim taem blong givhan gud long man we i stadi Baebol. Yumi mas rerem stadi, tijim gud man, mo givhan long hem blong i winim ol samting we oli stap blokem hem blong gohed. Aposol Pol i talem se hem i rere blong lego laef blong hem blong givhan long ol man Tesalonaeka blong oli save Jehova. (1 Tes. 2:7, 8) Nating se yumi bisi, ?olsem wanem blong faenem taem blong mekem ol Baebol stadi?
2. Sipos yumi lavem Jehova, ?bambae yumi yusum taem blong yumi olsem wanem?
2 I Nidim Taem Blong Mekem Wok Blong Jehova: I tru se blong mekem wosip long Jehova i nidim plante taem. Yumi nidim taem blong go long olgeta miting, go long wok blong prij, ridim Baebol evri dei, mo prea. Long wan mared, man mo woman i bisi oltaem, be nating se i olsem tufala i traehad blong spenem taem tugeta. Long sem fasin, sipos yumi lavem Jehova, bambae yumi glad blong “yusum evri janis” we yumi gat blong wosipim hem. (Efes. 5:15-17; 1 Jon 5:3) Jisas i talem se impoten haf blong wosip we yumi mekem i go long Jehova, hemia wok blong prij. (Mat. 28:19, 20) Taem yumi tingting gud long tok ya blong Jisas, hemia bambae i givhan long yumi blong yumi glad nomo blong mekem ol Baebol stadi.
3. ?Yumi save mekem wanem, sipos i gat sam samting i blokem yumi blong mekem stadi?
3 ?Be olsem wanem sipos yumi mekem wan wok we i blokem yumi blong mekem ol stadi? ?Olsem wanem sipos yumi sik no yumi mekem wan narafala wok we i joen long ol wok blong Kingdom? Sam pablisa oli stadi wetem man long telefon no oli raetem leta. Ol pablisa we oli sik, oli mekem plan blong ol Baebol stadi oli kam long haos blong olgeta blong stadi. Samfala oli mekem wan plan wetem wan narafala brata no sista, blong i go mekem ol stadi blong olgeta taem oli no save mekem.
4. ?Sipos yumi mekem stadi wetem ol man, bambae yumi kasem wanem blesing?
4 Pol i glad tumas from we hem i yusum taem, mo paoa blong hem blong givhan long ol man blong oli kasem save long trutok. (Wok 20:35) Taem hem i tingbaot ol man ya we hem i givhan long olgeta long Tesalonaeka, hem i glad tumas, nao i stap talem tangkiu long Jehova from. (1 Tes. 1:2) Maet yumi bisi, be sipos yumi no letem samting ya i blokem yumi blong mekem stadi wetem man, bambae yumi glad mo bambae yumi luk se wok ya i gud tumas.