!No Holembak Samting We i Gud Long Olgeta We Oli Nidim!
1. ?Long wanem rod yumi no mas “holembak samting we i gud”?
1 Taem yumi joen oltaem long wok blong talemaot gud nius blong Kingdom, yumi no mas “holembak samting we i gud” long ol man long teritori blong yumi. (Prov. 3:27, NW) I no gat narafala nius we i moa gud, i bitim nambawan nius ya we yumi serem long ol man se wan dei, laef bambae i gud tumas aninit long rul blong God. Taem yumi stap seremaot ol magasin mo ol buk blong givim witnes, i gud yumi putum mak ya blong statem wan Baebol stadi sipos yumi no mekem yet.
2. ?Wanem samting i save blokem yumi, blong no gat wan Baebol stadi?
2 Samtaem, bigfala samting we i blokem yumi, blong no gat wan Baebol stadi, hemia filing we yumi gat long saed ya. Samfala oli no gat Baebol stadi from we oli ting se oli no naf, no from we ol samting long laef blong olgeta i mekem se oli bisi oltaem. Ol haf we oli kam biaen bambae oli givhan long yumi blong no holembak yumi wan long wok blong mekem Baebol stadi.—Mat. 28:19; Wok 20:20.
3. ?From wanem yumi naf blong tijim Baebol?
3 Yumi Ting Se Yumi No Naf: Maet yu no skul gud, no maet sam narafala samting bakegen i mekem se yu ting se yu no naf blong mekem wan Baebol stadi. Ol Kristin long faswan handred yia oli naf blong mekem wok ya, nating se ‘oli no gat nem no oli no skul gud.’ ?Wanem i mekem se oli naf blong tijim narafala long trutok? “Oli bin stap wokbaot wetem Jisas.” (Wok 4:13) Oli lanem fulap samting from Bigfala Tija ya Jisas, mo ol tijing blong Jisas mo fasin blong hem oli raetem i stap long Baebol, blong yumi tede tu i save ridim. Nating sipos yu no skul gud, be yu yu stap kasem edukesen long saed blong God mo ol stamba tingting blong hem, mo hemia i moa impoten bitim eni kaen edukesen.—Aes. 50:4; 2 Kor. 3:5.
4. ?Yumi lanem wanem long eksampol blong Amos?
4 Long taem bifo, Jeova i yusum ol profet blong hem blong stretem ol king mo olgeta we oli gat hae posisen. Samfala, olsem Amos, oli no gat haenem no hae posisen. Amos i talem se: “Bifo mi mi no wan profet, mo mi no pikinini blong wan profet tu; mi mi man blong lukaot ol anamol mo karem ol fig long tri ya sikamo.” (Amos 7:14, NW) Nating se i olsem, Amos i no holembak hem wan blong talemaot jajmen blong Jeova agens long pris Amajia we i stap wosipim buluk. (Amos 7:16, 1717:16, 17) Oltaem yumi no mas fogetem se yumi mekem wok blong God, mo hem nao bambae i mekem se yumi naf blong mekem wok we hem i putum long han blong yumi.—2 Tim. 3:17.
5. ?From wanem yumi mas traehad blong statem wan Baebol stadi, nating se yumi bisi?
5 Yumi Bisi Tumas: Nating se yu gat plante samting long laef we i mekem yu yu bisi, be yu stap faenem taem yet blong prij. Taem yumi lidim wan Baebol stadi, hemia wan long ol beswan rod blong kasem glad long wok blong prij. I wan nambawan blesing blong luk se Tok blong Jeova i gat paoa long laef blong ol man. (Hib. 4:12) Jeova i glad tumas taem yumi rere blong lego sam samting we yumi nomo i wantem, blong givhan long ol man blong “kasem stret save long trutok.” (1 Tim. 2:4, NW) Ol enjel tu oli glad taem oli luk ol man oli tanem tingting blong olgeta from ol sin blong olgeta mo oli gohed long saed blong spirit.—Luk 15:10.
6. ?Wanem nambawan blesing we yumi gat taem yumi mekem ol samting we God i wantem?
6 God “i wantem sevem olgeta man, mo i wantem we olgeta man bambae oli save trutok blong hem.” (1 Tim. 2:4) !Hemia nambawan blesing we yumi gat from we yumi wok wetem God mo yumi no holembak samting we i gud long man taem yumi mekem Baebol stadi!