Websaet Blong Yumi i Save Givhan Long Yumi Mo Ol Narafala
Jisas i talem se yumi mas go talemaot gud nius blong Kingdom ‘long olgeta ples long wol, blong yumi witnes blong hem long fes blong olgeta man.’ (Mat. 24:14) Wan rod we i givhan long yumi blong ‘finisim olgeta wok ya we God i givim long yumi,’ hemia Intenet. Fastaem, yumi gat tri Websaet (watchtower.org, jw-media.org, mo jw.org) be naoia trifala Websaet ya i kam wan nomo, hemia jw.org.—2 Tim. 4:5.
“Long Olgeta Ples Long Wol”: Plante man long wol (33 pesen), antap moa ol yangfala, oli stap yusum Intenet. Hem i wan gudfala rod blong faenem save long plante samting. Long Websaet blong yumi, ol man oli save faenem ansa we Baebol i givim long plante kwestin. Mo bambae oli luk se ol ansa ya oli tru. Hem i givhan long olgeta blong oli save ogenaesesen blong Jehova. Mo i isi blong ol man oli askem Baebol stadi we i fri nomo. Websaet ya i mekem se gud nius blong Kingdom i go kasem ol man long ol ples we yumi no save go long hem.
‘Long Olgeta Man’: Gud nius blong Kingdom i mas go kasem “olgeta man,” taswe trutok blong Baebol i mas stap long plante lanwis. Long jw.org ol man oli save ridim plante samting long 400 lanwis. I no gat wan narafala Websaet olsem.
Yu Yusumgud: Niufala Websaet ya i blong givhan long ol man we oli no Witnes. Be i no blong olgeta ya nomo. Hem i blong ol Witnes blong Jehova tu. Sipos yu gat Intenet, i gud yu go long jw.org mo yu traem save olsem wanem blong yusum. Ol haf we i stap daon, oli soemaot olsem wanem yu save yusum Websaet ya.
[Diagram pija long pej 3]
(Lukluk niuspepa)
Yu traem
1 Taem yu go long Intenet, yu raetem tok ya www.jw.org
2 Taem yu stap long Websaet ya finis, ale yu save klik long eni taetol we i stap. Ol taetol ya bambae oli tekem yu yu go long sam narafala ples insaed long Websaet ya, blong yu save ridim ol defdefren save long hem.
3 Sipos yu gat wan mobaelfon we i save go long Intenet, i gud yu traem go long jw.org. Raeting blong hem bambae i smol moa, be bambae yu kasem ol semfala save nomo olsem taem yu stap long kompiuta.