Wan Wok We i Karem Frut
Tri wik bifo long asembli blong tri dei, bambae yumi givimaot ol pepa blong singaot ol man oli kam long asembli ya. I gat gudfala risen from wanem yumi mekem wok ya evri yia. Olgeta we oli karem pepa ya mo oli kam long asembli, oli glad tumas taem oli harem ol tok we oli kamaot long Baebol. Mo tu, oli sapraes blong luk we ol brata oli wok gud tugeta blong mekem se asembli i rongud. Oli glad blong luk gudfala fasin we yumi soemaot taem yumi joen gud wanples. (Sam 110:3; 133:1; Aes. 65:13, 14) ?Be olsem wanem? ?Wok blong yumi i save karem frut long ol ples we i longwe long asembli?
Afta long asembli blong tri dei long 2011, wan branj ofis i kasem wan leta blong wan woman we i faenem wan pepa blong invitesen long doa blong haos blong hem. Oltaem woman ya i stap haed taem ol Witnes blong Jehova oli kam long haos blong hem. Woman ya i raetem se: “Mi gat wan naesfala haos, mo wan gudfala hasban. Mi ting se mi gat evri samting we i save mekem mi mi glad. Be sore tumas, mi no glad nating. Mi harem olsem se mi laef blong nating nomo. Ale, mi draevem trak long 320 kilometa blong go long asembli ya long Sarede.” Woman ya i laekem asembli ya tumas, nao hem i ring i go long man blong hem blong talem se bambae hem i no kamhom from we hem i wantem stap long asembli long Sande tu. Hem i se: “Mi lesin long olgeta tok blong asembli ya. Mi mitim plante Witnes blong Jehova. Mi no wantem nating se asembli ya i finis.” Taem woman ya i gobak long ples blong hem, hem i stat stadi, mo fo manis biaen hem i kam wan pablisa. Hem i talem se: “!Mi glad we mi glad se mi faenem pepa ya long doa blong mi, from we naoia mi harem se mi no laef blong nating nomo!”
Sam long olgeta we oli kasem wan pepa blong invitesen bambae oli kam. Taswe, yumi mas gat strong tingting blong joen long impoten wok ya. Sipos yumi gat sam pepa i stap yet, yumi save karem i kam long asembli. Olsem nao, bambae yumi save yusum ol pepa ya blong tekem janis blong prij.
[Bokis blong pija long pej 9]
?Olsem Wanem Blong Givimaot Pepa Blong Invitesen?
Yumi wantem singaot olgeta man long ples blong yumi, taswe yumi no mas toktok longtaem tumas. Maet yumi talem ol sot tok olsem: “Halo. Mifala i stap joen long wan wok we i stap gohed long fulwol, blong givimaot pepa ya blong singaot yu yu kam long wan asembli. Hemia nao pepa blong yu. Ol save we yu nidim i stap long pepa ya.” Yumi mas toktok wetem glad. Taem yumi givimaot pepa ya long wiken, yumi mas soem ol magasin tu, sipos i stret blong mekem olsem.