Wan Haf We Bambae i Givhan Long Yumi Long Wok Blong Prij
1. ?Haf ya “Wan Witnes i Storian Wetem Narafala,” i save givhan long yumi olsem wanem?
1 Naoia long ol Wajtaoa blong pablik, i gat wan haf we bambae i kamaot oltaem, hemia, “Wan Witnes i Storian Wetem Narafala.” Haf ya bambae i givhan long yumi long tu rod. Faswan, hem i eksplenem ol tijing blong Baebol long fasin we i pulum tingting blong yumi. Mo nambatu, hem i givhan long yumi blong luk olsem wanem yumi save storian gud wetem ol man. (1 Pita 3:15) ?Yumi save yusum haf ya olsem wanem?
2. ?Olsem wanem blong yusum haf blong Wajtaoa ya long wok blong prij?
2 Yu Yusum Haf Ya Long Wok Blong Prij: Yu save putum gud wan kopi blong Wajtaoa we i gat haf ya insaed long hem. Olsem nao, taem man blong haos, no maet wan Baebol stadi, no wan man we i intres i askem wan kwestin, no maet i talemaot wan tingting we i stap long wan long ol haf ya, yu save givim wan kopi blong Wajtaoa ya long hem, mo yutufala i tokbaot tugeta. Sipos yu no gat, yu save go long jw.org/bi blong daonlodem Wajtaoa ya.
3. ?Olsem wanem yumi save yusum haf ya blong storian wetem man blong haos?
3 ?Sipos yu wantem tokbaot haf ya wetem wan man blong haos, bambae yu mekem olsem wanem? Samfala oli askem long hem blong i ridim strong ol toktok blong man we i no Witnes, ale pablisa i ridim toktok blong hemia we i Witnes. Taem oli mekem olsem, man i save jekem bilif blong yumi long wan rod we i no mekem hem i sem.—Dut. 32:2.
4. ?Taem yumi wanwan i ridim haf ya, hemia i trenem yumi olsem wanem?
4 Yu Trenem Yu Wan Mo Ol Narafala: Taem yu stap ridim haf ya, i gud yu tingbaot ol vas blong Baebol, ol pijatok, mo yu traem luk olsem wanem oli eksplenem ol tijing ya. Mo tu, i gud yu traem kasem save long fasin blong olgeta blong toktok. Biaen, taem yu prij, i gud yu mekem sem mak. (Prov. 1:5; 9:9) Wan sista i talem se: “Taem mi ridim ol haf ya, i olsem we mi prij wetem wan paenia we i save gud olsem wanem blong ansa long wan kwestin, nao mi lanem plante gudfala samting from.”
5. ?Yumi save givhan long ol Baebol stadi olsem wanem, blong oli rere from wok blong prij?
5 Yu save yusum ol haf ya olsem wan eksampol blong givhan long Baebol stadi blong yu, blong i rere blong prij. Yutufala i ridim ol haf ya tugeta, mo yu letem Baebol stadi blong yu i mekem olsem se hem nao pablisa ya we i stap prij. Long rod ya, bambae hem i naf blong eksplenem gud bilif blong hem. (Kol. 4:6) Haf ya long Wajtaoa, hemia wan narafala rod bakegen we Jehova i yusum blong givhan long yumi, blong yumi save “finisim olgeta” wok we hem i givim long yumi blong mekem.—2 Tim. 4:5.