?Olsem Wanem Blong Rerem Ol Fastok We Oli Wok Gud?
1. ?From wanem i impoten blong gat wan gudfala fastok?
1 Taem yu testem wan gudfala kakae, hemia i mekem yu wantem kakae moa. Be blong mekem wan kakae i tes gud olsem, oltaem yumi mas tingting gud mo rerem gud kakae ya. Long sem fasin, fastok blong yumi i olsem wan gudfala kakae, we i openem rod blong man i wantem storian moa long Baebol. Wan fastok we i wok gud i save longfala, no i sot nomo, mo ol toktok we yu talem tu oli defdefren. Be olsem wan gudfala kakae, oltaem yumi mas tingting gud fastaem mo rere gud fastok blong yumi. (Prov. 15:28) ?Wanem i mekem se fastok blong yumi i wok gud?
2. ?Yumi save rerem ol fastok we oli pulum tingting blong man olsem wanem?
2 Yu Tokbaot Samting We Man i Intres Long Hem: Fastok blong yumi i mas pulum tingting blong man blong haos. Sipos no, man ya bambae i no wantem storian. Taswe, taem yumi stap rerem fastok blong yumi, i gud yumi tingbaot ol samting we ol man long ples blong yumi oli intres long hem. ?Olsem wanem? ?Ol man oli intres blong tokbaot wan gavman we i save stretem ol trabol, laef insaed long famle no blong save se bambae ol faet oli finis? Ol man oli laekem blong talemaot tingting blong olgeta, taswe i gud we yu tingbaot sam kwestin we yu save askem long olgeta. Yu yusum wan long ol fastok we i stap biaen long Kingdom Wok Blong Yumi, mo yu traem mekem i laenap long teritori blong yu. Maet yufala i save mekem rere wan fastok olsem long Famle Wosip.
3. ?From wanem yumi mas jenisim fastok blong yumi, blong mekem i laenap wetem laef mo kantri blong man?
3 Yu Mas Tingbaot Kastom Blong Man Mo Ples We Hem i Kamaot Long Hem: Ol ples we yumi go prij long olgeta, oli defdefren. Long sam ples, taem yumi go long haos blong man, yumi mas talem from wanem yumi kam long haos blong hem. Sam narafala ples, i moa gud we yumi askem long man blong haos sipos hem i oraet, mo yumi save askem sam narafala samting bakegen long saed blong hem. Long sam narafala ples bakegen, sipos yumi save se ol man long ples ya oli gat smol save long Baebol, maet yumi save tokbaot Baebol long fastok blong yumi. (Wok 2:14-17) Be samfala oli no go long jos nating. Long taem olsem, i nogud yumi tokbaot Baebol long man, taem yumi mitim hem fastaem. I moa gud yumi mekem olsem, taem yumi gobak blong mekem visit long hem.—Wok 17:22-31.
4. ?Taem yumi rerem fastok blong yumi, mo yumi toktok long man, yumi mas tingbaot wanem?
4 Fastok Blong Yu: Yu mas rerem gud ol fastok blong yu. I moa gud blong rerem wan fastok we i sot mo i isi. Fasin blong yumi blong talemaot fastok ya tu, i impoten tumas. Taem yumi toktok, yumi mas glad, mo yumi smael. Sipos yumi mekem olsem, man blong haos bambae i luk se yumi intres long hem. Sipos yumi folem ol save ya, bambae yumi naf blong rerem gud wan fastok we bambae i pulum ol man long teritori, blong oli wantem kam kakae long ‘tebol blong Jehova.’—1 Kor. 10:21.