‘Yufala i Mas Mekem Fasin Blong Yufala i Stret Gud Long Fes Blong Ol Man’

1. Long ol asembli, ?from wanem i impoten we yumi mekem ol fasin blong yumi oli stret?

¹ Evri yia, long ol asembli blong yumi, plante man oli stap lukluk yumi. Taswe i impoten we yumi mekem ol fasin we oli stret, from ol fasin ya nao oli soemaot God ya we yumi stap wosipim. (Lev. 20:26) Ol gudfala fasin blong yumi, mo ol klos mo hea blong yumi, oli mas soemaot se yumi man blong Jisas. Taem bambae yumi go long asembli blong tri dei, no long intenasnal asembli, ?olsem wanem ‘yumi save mekem fasin we i stret long fes blong olgeta man’? ?Olsem wanem yumi presem papa blong yumi long heven?—1 Pita 2: 12.

2. ?Wanem janis we yumi gat blong soemaot ol Kristin fasin?

² Yumi Soemaot Ol Kristin Fasin: Taem yumi lavlavem yumi, mo yumi mekem i stret long olgeta “we oli no bilif,” ol man bambae oli luksave se fasin blong yumi i defren olgeta long fasin blong ol man blong wol. (Kol. 3:10; 4:5; 2 Tim. 3:1-5) Yumi mas kaen, mo yumi mas gat longfala tingting long ol man we oli wok long hotel, mo restoron, nating se i gat wan trabol. Gudfala fasin bambae i pulum yumi tu, blong yumi givim smol mane long olgeta we oli mekem sam samting blong givhan long yumi, sipos i stret long ples blong yumi.

3. ?Ol papa mo mama oli mas tingbaot wanem, mo from wanem?

³ Ol papa mo mama oli mas lukaotgud long ol pikinini blong olgeta, taem oli stap long asembli, long restoron, mo long hotel. (Prov. 29:15) Wan maneja blong wan hotel i talem long wan man mo woman blong hem se: “Mifala i laekem tumas yufala ol Witnes blong Jehova. Ol famle blong yufala mo ol pikinini blong yufala oli gat respek mo oli kaen. Olgeta man we oli wok long ples ya oli stap tokbaot ol gudfala fasin blong yufala. Mo mifala i wantem sipos evri wiken yufala i kam stap long ples ya.”

4. ?Taem yumi stap long taon we asembli i stap long hem, from wanem yumi mas jekem gud ol klos we yumi werem?

⁴ Klos We i Stret: Ol klos we yumi werem long asembli oli mas stret, oli no mas folem ol stael blong wol. (1 Tim. 2:9) Taem yumi stap long hotel, no yumi goaot, ol klos blong yumi oli mas stret. Ale bambae yumi glad blong werem baj blong yumi. Mo tu, sipos yumi gat janis blong prij long ol man, bambae yumi no fraet. Long asembli we i kam, sipos yumi putum ol klos we oli stret, mo yumi gat ol gudfala fasin, bambae yumi pulum ol gudfala man blong oli save trutok. Be i no hemia nomo, yumi mekem Jehova tu i glad.—Sef. 3:17.