Ol Samting Blong Tingbaot Long Taem Blong Asembli

Taem Blong Program: Ples blong asembli bambae i open long 7 klok long moning. Long ol trifala dei ya, program bambae i stat long 8:20 long moning. Taem jeaman i talemaot se bambae i gat miusik blong statem program, yumi evriwan i mas go sidaon. Olsemia, yumi soemaot se yumi gat respek. Long Fraede mo Sarede aftenun, program bambae i finis samwe long 4:00, mo long Sande aftenun, bambae i finis samwe long 3:00.

‘Yumi Presem Jehova Wetem Ol Singsing’: Ol man blong God bifo, oli presem Jehova wetem ol singsing, mo tede miusik i gohed blong stap olsem wan impoten haf blong tru wosip. (Sam 28:7) Evri dei program blong asembli i stat wetem wan miusik we yumi lesin long hem. Miusik ya i rerem yumi blong yumi save lanem mo wosipim Jehova. Taswe, taem jeaman blong asembli i talemaot se miusik bambae i stat, hemia taem we yumi go sidaon mo lesin long miusik ya. Taem yumi mekem olsem, yumi soemaot se yumi tinghae mo yumi talem tangkiu long ol brata mo sista we oli traehad blong plei long Watchtower orchestra. Ol brata mo sista ya oli pem rod blong olgeta, tu taem long wan yia blong go long Patterson, New York, blong mekemrere ol naesfala singsing ya we oli mekem yumi glad. Afta we yumi lesin long miusik, yumi evriwan i mas joen blong singsing long ol singsing blong Kingdom.

Ples Blong Putum Trak: Long ples blong asembli, plante taem ples blong putum trak i smol, taswe ol brata we oli lukaot long ples ya, bambae oli letem ol man we oli kam fastaem oli putum trak blong olgeta long hem. Be sipos ples ya i fulap, hemia we i kam biaen bambae i faenem wan narafala ples blong putum trak long hem. Taswe i moagud we plante man oli joen wanples long wan trak blong kam long asembli, i bitim we i gat wan no tu man nomo long wan trak.

Ol Jea: Plis yufala i no mas hareap blong traem winim ol narafala, blong yufala i go sidaon long ol ples we yufala i laekem. Taem yumi tingbaot narafala, hemia i soemaot se yumi ol tru Kristin mo fasin ya i pulum ol man blong oli leftemap nem blong God. (Jon 13:34, 35; 1 Kor. 13:4, 5; 1 Pita 2:12) Yu save blokem jea blong olgeta nomo we oli stap long haos blong yu, no olgeta we oli kam long trak blong yu, no ol Baebol stadi blong yu. Ol olfala mo olgeta we oli sik oli gat spesel ples blong sidaon. Ol jea ya oli no plante, taswe wan no tu man nomo we i givhan long olfala no hemia we i sik, i save sidaon wetem olgeta.

Klos We i Stret: Ol klos we yumi werem long asembli oli mas stret, oli no mas folem ol stael blong wol. (1 Tim. 2:9) Taem yumi stap long hotel, no yumi goaot, ol klos blong yumi oli mas stret. Ale bambae yumi glad blong werem baj blong yumi. Mo tu, sipos yumi gat janis blong prij long ol man, bambae yumi no fraet. Long asembli we i kam, sipos yumi putum ol klos we oli stret, mo yumi gat ol gudfala fasin, bambae yumi pulum ol gudfala man blong oli save trutok. Be i no hemia nomo, yumi mekem Jehova tu i glad.—Sef. 3:17.

Soem Gudfala Fasin Taem Yu Yusum Mobaelfon No Tablet: Yumi soemaot gudfala fasin long taem we program i gohed, taem yumi mekem se mobaelfon no tablet blong yumi i no mekem noes blong spolem ol narafala we oli stap lesin. Sipos yumi yusum wan kamera, blong tekem video, wan tablet, no wan narafala masin olsem, i gud yumi no spolem narafala mo blokem olgeta blong lukluk. Mo tu, yumi soemaot gudfala fasin, taem yumi no yusum mobaelfon blong teks mo sanem imel we i no nid long taem we program i stap gohed.

Kakae Long Medel Dei: Plis, i moa gud yu karem kakae blong yu i kam long ples blong asembli, i bitim we yu go samples blong kakae. Yu save karem kakae long wan smol eski, mo yu putum aninit long jea blong yu. I tabu blong yu karem ol bigbigfala eski, mo ol botel, mo ol glas blong dring, oli kam long ples blong asembli.

Presen Mane: Taem yu putum presen mane long ol bokis long ples blong asembli, blong givhan long wok blong Kingdom long fulwol, yu stap talem tangkiu from asembli ya. Sipos yu wantem raetem wan jek, yu mas mekem jek ya i go long “A.S.T.J.” no “Association Chrétienne Les Témoins de Jéhovah du Vanuatu.”

Meresin: Sipos yu mas dring meresin oltaem from wan sik, plis yu meksua se yu karem naf meresin i kam wetem yu, from we bambae i no gat meresin ya long asembli. Sipos yu gat sik suga, mo yu yusum wan stik meresin blong stikim yu, plis yu no sakem nidel ya long ol plastik blong doti long asembli, from hem i denja tumas.

Lukaot Gud: Plis yufala i mas lukaot gud taem yufala i wokbaot, blong yufala i no glis mo yufala i no kikim ol samting.

Man We i No Save Harem Klia: Program blong asembli bambae i kamaot tu long FM radio. Sipos yu wantem lesin long FM radio ya, yu save karem wan mobaelfon, no smol radio we i gat iafon long hem.

Ol Kat Blong Pusum Bebi: Yu no mas karem ol kat blong pusum bebi oli kam insaed long ples blong asembli. Be yu save karem jea blong bebi, sipos hem i kaen ya we yu save fasem long wan jea klosap long yu.

Pepa Blong Fulumap (S-43): Taem yu tekem janis blong prij long wik blong asembli, maet yu faenem wan man we i wantem save moa. Sipos i olsem, yu mas raetem ol save long saed blong hem long pepa ya Please Follow-Up (S-43). Taem yu fulumap pepa ya finis, yu givim long brata we i lukaot long Ol Buk long asembli. Sipos no, yu save givim long sekretari blong kongregesen, taem yu gobak long ples blong yu.

Ol Volontia: Ol brata mo sista we oli wantem wok long asembli, oli mas go luk brata we i lukaot long Ol Volontia. Ol yangfala we oli no gat 16 yia yet, oli save wok wetem papa mo mama blong olgeta, no wetem wan narafala bigman sipos papa mo mama blong olgeta i agri long hem.