I Gud Yumi Tingbaot Ol Profet Ya—Sefanaea
1. ?Sefanaea i mekem wok blong profet long wan taem we i olsem wanem? ?Olsem wanem yumi save folem eksampol blong hem tede?
1 Raonabaot long ol yia 650 B.K.T., ol man Juda oli no fraet blong mekem wosip long Bal. Long taem ya, rabis King Amon i jes ded mo yangfala King Josaea i stat blong rul. (2 Kron. 33:21–34:1) Nao, Jehova i givim wok long Sefanaea blong i go talemaot jajmen blong hem long ol man Juda. Nating se Sefanaea i kamaot long laen blong King, hem i no fraet blong talemaot mesej blong Jehova agensem ol lida blong ol man Juda. (Sef. 1:1; 3:1-4) Long sem fasin, yumi stap traehad blong folem fasin blong Sefanaea. Yumi gat strong tingting mo yumi no letem ol famle blong yumi oli blokem yumi blong wosipim Jehova. (Mat. 10:34-37) ?Sefanaea i talemaot wanem mesej mo wanem i kamaot from?
2. ?Yumi mas mekem wanem blong yumi stap sef, taem dei blong kros blong Jehova i kamtru?
2 Yumi Mas Lukaot Jehova: Jehova nomo i save sevem ol man long dei blong kros blong hem. Taswe Sefanaea i talem strong long ol man Juda se, naoia we oli stap wet blong dei ya i kamtru, oli mas lukaot Jehova, mo stret fasin blong hem, mo oli mas gat tingting daon. (Sef. 2:2, 3) Tede yumi mekem olsem Sefanaea. Yumi leftemap tingting blong ol man blong lukaot Jehova, be i no olgeta nomo. Yumi tu yumi mas lukaot se yumi no ‘tanem baksaed long Jehova, nao yumi no moa biaen long hem.’ (Sef. 1:6) Yumi mekem olsem taem yumi stadi long Baebol, mo yumi prea blong God i lidim yumi. Yumi lukaot stret fasin taem yumi mekem laef blong yumi i klin. Mo yumi gat tingting daon taem yumi obei long olgeta we oli lidim yumi, mo yumi rere blong folem samting we ogenaesesen blong Jehova i talem.
3. ?From wanem yumi mas tingbaot se wok blong yumi bambae i gat frut blong hem?
3 Gudfala Frut i Save Kamaot: Jajmen we Sefanaea i talemaot i pulum sam man Juda blong oli lukaot Jehova. Wan long olgeta hem i Josaea. Hem i stat blong mekem olsem taem hem i yangfala nomo. Biaen hem i mekem wan bigfala wok, blong finisim fasin ya blong mekem wosip long ol aedol long Juda. (2 Kron. 34:2-5) Tede, ol sid blong Kingdom oli foldaon long ol defdefren graon. Sam oli foldaon long rod, samfala long ples blong ston, no long ples blong ropnil, mo sam oli foldaon long gudfala graon mo oli karem gudfala frut. (Mat. 13:18-23) Yumi trastem Jehova se bambae hem i gohed blong blesem yumi from we yumi traehad blong talemaot gud nius long olgeta ples.—Sam 126:6.
4. ?Taem yumi stap wet blong ‘Dei blong Jehova i kam,’ i gud yumi mekem wanem?
4 Sam man long Juda oli ting se Jehova bambae i no save mekem wan samting. Be Jehova i talemaot finis se bigfala dei blong hem i stap kam klosap. (Sef. 1:12, 14) Olgeta we oli lukluk i go long Jehova olsem sefples blong olgeta, bambae hem i sevem olgeta. (Sef. 3:12, 17) Naoia we yumi stap wet blong ‘Dei blong Jehova i kam,’ i gud yumi glad blong joen wanples wetem ol man blong hem blong mekem wok blong hem.—Sef. 3:8, 9.