!Wan Handred Yia Nao We Yumi Stap Talemaot Kingdom!
1. ?Tok we oli talemaot klosap wan handred yia finis, i pulum ol man blong Jehova blong oli mekem wanem?
1 “!Yufala i luk! !King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.” Klosap wan handred yia nao, we Brata Rutherford i talem ol tok ya we i pulum ol man blong Jehova, blong oli talemaot Kingdom long olgeta ples long wol. !Hemia nao samting we yumi mekem! Yumi olsem ol Kristin long taem blong Jisas. Yumi stap talemaot gud nius blong Kingdom long “olgeta man long wol.” (Kol. 1:23) Taem yumi tingtingbak long ol handred yia we oli pas, ?yumi mekem wanem blong talemaot Kingdom blong God? Naoia we yumi kam klosap moa long dei ya we i makem wan handred yia blong Kingdom, ?olsem wanem yumi save gohed blong talemaot Kingdom ya?
2. ?Olsem wanem ol buk blong yumi oli leftemap Kingdom blong God?
2 Ol Wok We Ol Brata Oli Mekem Bifo: Longtaem finis i kam, ol buk mo magasin blong yumi oli leftemap Kingdom. Stat long yia 1939, impoten magasin blong yumi, i tekem nem ya: Wajtaoa i Talemaot Kingdom Blong Jehova. Oltaem magasin ya i talemaot Kingdom, mo ol samting we Kingdom ya bambae i mekem i kamtru. Wekap! i tokbaot se Kingdom blong God nomo, bambae i mekem ol man oli gat wan gudfala fiuja. !I gud tumas blong save se tufala magasin ya oli tanem i go long plante lanwis, mo oli seremaot tufala long olgeta ples long wol!—Rev. 14:6.
3. ?Wanem sam rod blong talemaot Kingdom?
3 Ol man blong Jehova oli yusum plante defren rod blong talemaot Kingdom. Bifo, ol brata oli yusum ol trak we oli putum laodspika long hem, oli toktok long radio, mo oli yusum gramafon we man i save karem. Ol rod ya oli givhan blong talemaot gud nius long plante man. Long taem ya, i no gat plante man blong talemaot gud nius. (Sam 19:4) Long ol yia we oli jes pas, yumi yusum Websaet ya jw.org blong talemaot gud nius long plante milian man. Sam long ol man ya oli stap long ol kantri we oli putum tabu long wok blong prij.
4. ?Wanem sam spesel rod we yumi folem blong prij?
4 Ol man blong Jehova oli folem sam spesel rod blong talemaot Kingdom. Eksampol stat long 1996, ol brata oli traehad blong prij moa long ol haos wanwan. Oli prij long pablik ples, long ples blong putum trak, mo long stoa. I no longtaem i pas, long olgeta ples long wol, yumi yusum wan niufala rod blong prij long ol taon we oli bisi. Mo tu, plante kongregesen oli joen blong prij long ol pablik ples long teritori blong olgeta. Oli yusum tebol mo troli blong putum ol buk long hem long ol ples we plante man oli pas long hem. Be, wok blong prij long ol haos wanwan, hem i impoten rod blong yumi talemaot Kingdom long ol man.—Wok 20:20.
5. ?Wanem janis we plante long yumi oli gat long stat blong niufala sevis yia?
5 Ol Wok We Yumi Save Mekem Naoia: Long stat blong niufala sevis yia, plante pablisa bambae oli mekem wok blong fultaem paenia. ?Yu yu save joen wetem olgeta? Sipos no, ?yu save mekem wok blong haftaem paenia wan wan taem? Nating se yu yu naf blong paenia no nogat, Jehova bambae i blesem yu from we yu lego plante samting, blong yu save joen fulwan long wok blong talemaot Kingdom.—Mal. 3:10.