!Yu Yusum Gud Janis We Yu Gat Blong Talemaot Kingdom!

1. ?Yumi save lanem wanem long stori blong Deved?

¹ King Deved i no letem ol samting blong laef oli spolem tingting blong hem, nao hem i no moa gohed. Deved i wantem bildim haos blong Jehova, be Jehova i talem long hem blong i no bildim haos ya. Hem i no harem nogud. Be hem i jenisim tingting blong hem, mo hem i mekem rere ol samting we Solomon i nidim blong bildim haos ya. (1 King 8:17-19; 1 Kron. 29:3-9) Deved i putum tingting blong hem i stap strong long samting we hem i naf blong mekem, i bitim we hem i stap tingbaot samting we bambae hem i no save mekem. ?Olsem wanem yumi save folem fasin blong Deved, taem yumi lukaot rod blong talemaot mesej blong Kingdom?

2. ?Yumi save mekem wanem blong joen moa long wok blong prij?

² Yu Mekem Samting We Yu Naf Blong Mekem: Plante brata mo sista oli mekem se laef blong olgeta i no fasfas, blong oli save joen long wok blong haftaem no fultaem paenia. (Mat. 6:22) ?Yu tu yu naf blong mekem wok ya? Taem yu prea mo yu tokbaot ol samting we yu wantem mekem, maet yu luk se ‘doa i open finis long yu, blong yu mekem gudfala wok.’ Sipos i olsem, yu yusumgud janis ya blong talemaot mesej blong Kingdom.—1 Kor. 16:8, 9

3. Sipos yumi no naf blong mekem wok blong paenia, ?wanem ol gudfala janis we yumi save yusum blong prij?

³ ?Olsem wanem sipos ol samting long laef oli blokem yu blong mekem wok blong paenia? Maet yu save yusum sam narafala rod. Yu traem tingbaot, sipos yu wok wetem ol man we oli gat defren bilif, maet hemia wan gudfala janis we yu gat, blong prij long olgeta. No sipos yu gat sam problem long helt blong yu, hemia tu wan nambawan janis we yu gat, blong prij long ol dokta no ol man we oli stap lukaot long yu. Tingbaot se i gat wan plan blong olgeta we oli no naf blong prij plante, from we oli kam olfala no maet oli kasem wan bigfala sik. Plan ya hemia se, olgeta oli save raetemdaon smol taem we oli prij long ripot blong olgeta, nating se oli prij blong 15 minit nomo. Taswe, taem yu fulumap ripot blong prij blong yu, i gud blong tingbaot blong raetemdaon taem we yu yusum blong tekem janis blong prij. Mo taem we yu yusum blong seremaot ol traket, ol magasin, no ol buk mo ol pepa blong singaot man i kam long Memoriol mo asembli. Taem yu ademap evri minit we yu tekem janis blong prij, maet bambae yu sapraes blong luk se ol smol minit ya oli kam wan bigfala aoa.

4. ?Yu yu gat strong tingting blong mekem wanem?

⁴ Nating se yumi kasem ol defren kaen trabol long laef, be i gud we yumi gat strong tingting blong yusumgud evri janis we yumi gat, blong talemaot gud nius. Olsem nao, bambae yumi save glad bigwan, from we yumi save se yumi mekem evri samting we yumi naf blong mekem, blong yumi sapotem wok blong Kingdom.—Mak 14:8; Luk 21:2-4.