Kamgud Moa Long Wok Blong Prij—Ansa Long Man We i Kros

?From Wanem i Impoten? Plante man we yumi prij long olgeta oli kaen. Be Jisas i talem se sam man bambae oli no laekem yumi nating. (Jon 17:14) Taswe, yumi no mas sapraes taem yumi mitim wan man we i kros. From we yumi wok long nem blong Jehova, yumi mas ansa long fasin we i mekem Jehova i glad. (Rom 12:17-21; 1 Pita 3:15) Sipos yumi mekem olsem, bambae yumi blokem trabol blong i no kam bigwan moa. Mo tu, man blong haos mo ol narafala man raonabaot oli luk kaen fasin blong yumi, nao maet oli glad moa nekis taem blong lesin long ol Witnes.—2 Kor. 6:3.

?Yu Mekem Olsem Wanem?

Yu mas gat kwaet fasin mo fren gud wetem man ya. Hemia i save mekem kros i godaon. Yu no mas harem nogud long ol toktok blong hem. (Pri. 7:9) Maet hem i kasem wan trabol long laef blong hem, no maet yu kam long wan taem we i no stret. Maet hem i harem sam giaman toktok, nao samting ya i mekem se hem i agensem gud nius we yu stap talemaot.—2 Kor. 4:4.
Yu toktok kaen mo long voes we i kwaet. (Prov. 15:1) ?Olsem wanem? ?Yu yu wekemap hem? ?Yu stopem hem long wok blong hem? I gud yu talem sore. Yu no talem sore from we yu prij, be yu talem from we yu kam long taem we i no stret. Maet hem i bin harem wan giaman toktok we man i talem agensem yumi, nao i kros long yumi. Sipos i olsem, yu save talem se: “Mi kasem save from wanem yu harem nogud. Be maet samting we yu harem i no tru. ?I oraet mi eksplenem long yu?” Maet hem i agensem wan bilif blong yumi, olsem tijing blong blad no fasin ya we kongregesen i putumaot man. Ale, yu save talem se: “Mi kasem save. Sam narafala tu oli gat sem tingting olsem yu. ?I oraet sipos mi soemaot wanem we Baebol i talem?”
Sipos hem i kros tumas, maet i moa gud yu no ansa, be yu aot nomo. Sipos hem i talem se hem i no wantem we ol Witnes blong Jehova oli kam long haos blong hem bakegen, yu save talem se ol Witnes bambae oli respektem samting we hem i wantem.

Yu Traem Mekem Samting Ya Long Manis Ya:

Long famle wosip, yufala i aktem olsem wanem blong ansa long man we i kros.
Taem yu mo fren blong yu i aot long haos blong man we i kros, yutufala i tokbaot olsem wanem blong ansa long fasin we i moa gud nekis taem.