Traem Kamgud Moa​—Statem Storian We i Lidim Yu Blong Prij

Jisas i faswan blong toktok long wan woman Sameria, taswe hem i tekem janis blong prij long woman ya. ?Olsem wanem yumi save kamgud moa long fasin ya blong statem wan storian wetem wan strenja?

• Yu mas kaen taem yu toktok long man. Nating se Jisas i taed, be hem i faswan blong statem storian, hemia taem hem i askem wota. Yu save mekem sem mak, yu talem halo, mo maet yu tokbaot wan samting we i jes hapen, o weta, o wan narafala samting. Rimemba, mak blong yu hemia blong statem storian, so yu tokbaot eni samting we maet man i intres long hem. Sipos man i no toktok, i oraet nomo, yu traem bakegen long wan narafala man. Askem Jehova blong i givim strong tingting long yu.—Neh 2:4; Wok 4:29.

• Yu mas rere blong talemaot gud nius taem i gat janis, be yu no mas hareap tumas. I gud yu letem storian i rongud fastaem. Sipos yu kwik blong prij, maet man bambae i fraet mo i stop blong toktok. Yu no mas harem nogud sipos yu no prij long man, bifo we storian blong yutufala i finis. Sipos i had blong yu tekem janis blong prij long man, i oraet nomo, be i gud se yu wokem fasin ya blong statem storian. [Plei mo tokbaot video 1.]

• Traem tokbaot wan samting long saed blong bilif blong yu, maet hemia bambae i pulum man blong i askem kwestin. Jisas i tokbaot ol samting we i pulum woman Sameria blong i askem kwestin long hem. Taem hem i talemaot gud nius, hem i stap ansarem ol kwestin blong woman ya. [Plei mo tokbaot video 2, biaen yu plei mo tokbaot video 3.]