Gohed Blong Wokbaot Folem Bilif

1. ?From wanem aposol Pol i glad taem hem i tingtingbak long ol samting we hem i mekem long laef blong hem?

APOSOL Pol i save se i no longtaem bambae hem i ded. Be taem hem i tingtingbak long ol samting we hem i bin mekem long laef blong hem, hem i glad tumas. Hem i talem se: “Resis ya we mi stap long hem, mi kasem en blong hem finis, mo mi mi holemstrong long bilif.” (2 Tim. 4:​6-8) Pol i mekem ol waes desisen blong hem i save yusum laef blong hem long wok blong Jehova. Mo hem i sua se Jehova i glad long hem. Yumi tu, yumi wantem mekem ol gudfala desisen we i save mekem God i glad. ?Olsem wanem yumi save mekem samting ya?

2. ?I minim wanem blong wokbaot folem bilif?

² Pol i tokbaot hem wan mo ol narafala Kristin se: “Yumi stap wokbaot folem bilif, be i no folem ol samting we yumi stap luk.” (2 Kor. 5:7) ?Pol i minim wanem? Long Baebol, tok ya “wokbaot,” samtaem i save minim ol samting we man i jusum blong mekem long laef blong hem. Ol man we oli no bilif long Jehova, oli mekem ol desisen folem samting nomo we oli luk mo harem. Be man we i wokbaot folem bilif, hem i mekem ol desisen folem ol samting we Jehova i wantem. Mo ol samting we hem i mekem, oli soemaot se hem i sua fulwan se sipos hem i folem gud ol advaes blong Jehova long Baebol, bambae hem i gat wan gudfala laef naoia, mo Jehova bambae i blesem hem long fiuja.—Sam 119:66; Hib. 11:6.

3. ?Wanem gudfala samting i save kamaot taem yumi wokbaot folem bilif? (2 Korin 4:18)

³ I tru, samtaem yumi evriwan i mekem ol desisen folem ol samting we yumi luk mo harem. Be sipos yumi mekem ol impoten desisen folem ol samting ya nomo, bambae yumi save kasem trabol from. ?From wanem? From we ol samting ya we yumi luk mo harem, samtaem oli giaman. Mo nating sipos oli tru, maet oli save pulum yumi blong mekem samting we Jehova i no glad long hem. (Pri. 11:9; Mat. 24:​37-39) Be taem yumi wokbaot folem bilif, bambae yumi naf blong mekem ol desisen we ‘Masta i glad long hem.’ (Efes. 5:10) Mo tu, taem yumi folem ol advaes blong God, bambae yumi gat pis long tingting mo yumi glad. (Sam 16:​8, 9; Aes. 48:​17, 18) Mo sipos yumi gohed blong wokbaot folem bilif, bambae yumi kasem laef olwe.—Ridim 2 Korin 4:18.

4. ?Olsem wanem blong luksave sipos yumi stap wokbaot folem bilif o folem samting nomo we yumi luk?

⁴ ?Olsem wanem blong luksave sipos yumi stap wokbaot folem bilif o folem samting nomo we yumi luk? I gud yumi askem yumi wan se: ?Mi mi stap tingbaot wanem taem mi stap mekem ol desisen? ?Mi mi mekem desisen folem samting nomo we mi luk? ?O mi mi mekem desisen folem ol samting we Jehova i wantem? I gud yumi tokbaot olsem wanem yumi save gohed blong wokbaot folem bilif, taem yumi stap jusum wan wok, taem yumi stap jusum wan blong mared wetem, mo taem oganaesesen i talem samting we yumi mas mekem. Taem yumi stap tokbaot ol wanwan samting ya, bambae yumi luk ol samting we yumi mas tingbaot blong yumi save mekem ol gudfala desisen.

TAEM YUMI STAP JUSUM WAN WOK

5. ?Yumi mas tingbaot wanem taem yumi stap jusum wan wok?

⁵ Yumi evriwan i wantem gat wan gudfala wok we i mekem se yumi save pem ol samting we yumi mo famle blong yumi i nidim. (Pri. 7:12; 1 Tim. 5:8) Long sam wok, yumi save kasem gudfala pei we i mekem se yumi naf blong pem ol samting we famle i nidim, mo sevem sam mane tu blong fiuja. Be long sam narafala wok, yumi kasem smol pei nomo we i mekem se yumi naf blong pem nomo ol samting we famle i nidim. Taem yumi stap jusum se wanem kaen wok bambae yumi mekem, i stret nomo we yumi tingbaot hamas mane bambae yumi kasem. Be sipos hemia nomo samting we yumi tingbaot, hemia i soemaot se yumi stap wokbaot folem samting we yumi luk.

6. Taem yumi stap jusum wan wok, ?olsem wanem yumi soemaot se yumi stap wokbaot folem bilif? (Hibru 13:5)

⁶ Sipos yumi wokbaot folem bilif, bambae yumi tingbaot tu sipos wok ya bambae i mekem se yumi fren gud wetem Jehova o nogat. Taswe, yumi save askem se: ‘?Long wok ya, bambae mi mekem sam samting we Jehova i no laekem?’ (Prov. 6:​16-19) ‘?Bambae wok ya i blokem mi blong go long ol miting mo wok blong prij?’ ‘?Wok ya bambae i mekem se mi stap longwe long famle blong mi blong longtaem?’ (Fil. 1:10) Sipos yu ansa yes long ol kwestin ya, i moa waes blong no akseptem wok ya nomata se i had blong faenem wok. Sipos yumi wokbaot folem bilif, bambae yumi mekem ol gudfala desisen we i soemaot se yumi trastem Jehova, se bambae hem i naf blong givim ol samting we yumi nidim.—Mat. 6:33; ridim Hibru 13:5.

7-8. ?Olsem wanem wan brata long Saot Amerika i soemaot se hem i stap wokbaot folem bilif? (Mo tu, yu luk pija.)

⁷ Javier,a wan brata long Saot Amerika, i luksave se i impoten blong wokbaot folem bilif. Hem i talem se: “Mi bin aplae from wan wok we pei blong hem i dabolem pei we mi bin kasem bifo. Mo mi laekem tumas wok ya.” Be Javier i wantem tumas blong paenia. Hem i se: “Oli mekem plan blong mi go intaviu from wok ya. Be bifo mi go, mi prea long Jehova blong i givhan long mi, from mi save se hem nomo i save lidim mi long rod we i beswan. I tru se mi wantem kasem wan wok we i givim gudfala pei long mi, be sipos wok ya i blokem mi blong mekem moa long wok blong Jehova, mi no save akseptem wok ya.”

⁸ Javier i talem se: “Long taem blong intaviu, maneja i talem long mi se long wok ya, plante taem bambae mi finis wok let. Be long kaen fasin, mi eksplenem se mi no save mekem olsem, from we mi gat ol program blong mi blong wosip.” Yes, Javier i no akseptem wok ya. Tu wik biaen, hem i stat blong paenia. Mo klosap long en blong yia ya, hem i faenem wan haftaem wok. Hem i talem se: “Jehova i harem ol prea blong mi, mo i mekem se mi faenem wan wok we i stret gud long program blong mi blong paenia. Mi glad tumas blong faenem wan wok olsem, we i mekem se mi gat moa taem blong mekem wok blong Jehova mo halpem ol brata mo sista.”

9. ?Yu lanem wanem long ekspiriens blong Trésor?

⁹ ?Olsem wanem sipos yumi luksave se wok blong yumi naoia i mekem se yumi no moa wokbaot folem bilif? Traem tingbaot ekspiriens blong Trésor, we i blong Kongo. Hem i talem se: “Niufala wok blong mi i nambawan. Pei blong mi i tri taem antap long pei blong mi bifo. Mo ol man long ples blong wok oli respektem mi.” Be oltaem Trésor i stap mestem ol miting, from we hem i mas finis wok let. Mo tu, ol fren blong hem long wok oli stap fosem hem blong haedem ol nogud samting we kampani ya i stap mekem. Trésor i wantem lego wok ya, be hem i wari se bambae hem i no moa gat wok. ?Wanem i halpem hem? Hem i talem se: “Habakuk 3:​17-19 i halpem mi blong kasemsave se sipos mi lego wok ya mo mi kasem smol mane nomo, Jehova bambae i lukaot gud long mi. Taswe, mi lego wok ya. Plante bos oli ting se wan man bambae i lego eni samting, olsem taem we hem i gat wetem famle blong hem mo wosip blong hem, blong hem i save gat wan wok we i givim gudfala pei long hem. Be mi glad tumas se mi tingbaot moa Jehova. Wan yia biaen, Jehova i halpem mi blong faenem wan gudfala wok we i mekem se mi gat mane blong pem ol samting we mi nidim, mo mi gat moa taem blong mekem wok blong Jehova. Taem yumi putum Jehova i stap fasples long laef blong yumi, maet wanwan taem bambae yumi faenem i had blong kasem mane, be Jehova bambae i lukaot gud long yumi.” Yes, sipos yumi trastem ol advaes mo ol promes blong Jehova, bambae yumi gohed blong wokbaot folem bilif, mo bambae hem i blesem yumi.

TAEM YUMI STAP JUSUM WAN BLONG MARED WETEM

10. ?Wanem i soemaot se maet yumi stap wokbaot folem samting we yumi luk, taem yumi stap jusum wan blong mared wetem?

¹⁰ Mared i wan presen we i kam long Jehova, mo i stret nomo we yumi wantem mared. Taem wan sista i tingbaot wan brata blong mared wetem, maet hem i tingbaot fes mo bodi blong hem, fasin blong hem, tingting we ol narafala oli gat long hem, olsem wanem hem i spenem mane, mo sipos hem i mas lukaot long wan memba blong famle blong hem, mo sipos brata ya i stap mekem hem i glad o nogat.b I tru se ol samting ya oli impoten, be sipos hem i stap tingbaot nomo ol samting ya, maet hemia i soemaot se hem i stap wokbaot folem samting we hem i luk.

11. ?Yumi soemaot olsem wanem se yumi stap wokbaot folem bilif, taem yumi jusum wan blong mared wetem? (1 Korin 7:39)

¹¹ Jehova i praod long ol sista mo ol brata we oli folem gud advaes blong hem, taem oli stap jusum wan blong mared wetem. Eksampol, oli folem gud advaes ya blong hem blong wet kasem we oli “pastru long yang taem,” bifo we oli stat blong fren. (1 Kor. 7:36) Oli meksua se brata o sista we oli jusum, hem i gat fasin we Jehova i talem se wan gudfala hasban o wan gudfala waef i mas gat. (Prov. 31:​10-13, 26-28; Efes. 5:33; 1 Tim. 5:8) Sipos wan man o woman we i no Witnes i stat blong laekem olgeta, oli trastem advaes ya blong mared nomo long “wan man blong Masta,” olsem 1 Korin 7:39 i talem. (Ridim.) Oli gohed blong wokbaot folem bilif, mo oli trastem se Jehova i kasemsave moa long filing blong olgeta i bitim eni nara man, mo bambae hem i givim samting we oli nidim.—Sam 55:22.

12. ?Yu save lanem wanem long eksampol blong Rosa?

¹² Tingbaot ekspiriens blong Rosa, wan paenia long Kolombia. Wan man long ples blong wok blong hem we i no Witnes i stat blong laekem hem. Mo Rosa tu i laekem man ya. Rosa i talem se: “Man ya i wan gudfala man. Hem i stap givhan long ol man long komuniti, hem i no drong, mo i no smok. Mo tu, hem i stap mekem i gud long mi. Ol fasin we man ya i gat, hemia nao ol fasin we mi wantem long wan hasban. Be problem se hem i no wan Witnes blong Jehova.” Rosa i gohed, i se: “I had blong mi talem no long hem, from mi wantem tumas blong frenem hem. Long taem ya, mi harem se mi stap mi wan mo mi wantem mared. Be i had blong faenem wan long trutok.” Nating se i olsem, Rosa i no tingbaot nomo ol samting ya we hem i luk. Hem i tingbaot tu se desisen blong hem bambae i mekem wanem long fasin fren blong hem wetem Jehova. Taswe, hem i stop blong toktok wetem man ya, mo hem i gohed blong bisi long ol wok blong Jehova. Smoltaem afta, oli invaetem hem blong joen long Skul Blong Kingdom Ivanjelis, mo naoia hem i wan spesel paenia. Rosa i talem se: “Jehova i givim plante blesing long mi we i mekem mi harem gud tumas.” Yes, i no isi oltaem blong wokbaot folem bilif, speseli taem yumi wantem tumas wan samting. Be sipos yumi gohed blong mekem ol samting we Jehova i wantem, oltaem i gat gudfala frut i kamaot from.

TAEM OGANAESESEN I TALEM SAMTING WE YUMI MAS MEKEM

13. ?Wanem i save mekem se yumi stat blong wokbaot folem samting we yumi luk?

¹³ Plante taem ol elda, eria elda, branj ofis, mo Hed Kampani, oli stap talem long yumi samting we yumi mas mekem long wosip blong yumi. Be maet samtaem yumi no kasemsave from wanem oli talem long yumi blong mekem wan samting. Maet yumi stap tingbaot nomo se sipos yumi folem samting we oli talem, bambae nogud frut i save kamaot from. O maet yumi stat blong tingbaot ol slak fasin blong olgeta we oli stap lidim yumi. Be sipos yumi stap tingting olsem, hemia i soemaot se yumi stap wokbaot folem samting we yumi luk.

14. ?Wanem bambae i givhan long yumi blong wokbaot folem bilif, taem oganaesesen i talem samting we yumi mas mekem? (Hibru 13:17)

¹⁴ Sipos yumi wokbaot folem bilif, bambae yumi trastem se Jehova nao i stap lidim oganaesesen, mo hem i savegud samting we ol man blong hem oli nidim. From samting ya, bambae yumi kwik blong obei mo glad blong mekem samting we oganaesesen i talem. (Ridim Hibru 13:17.) Yumi luksave se taem yumi obei, hemia bambae i mekem se evriwan long kongregesen i joen gud. (Efes. 4:​2, 3) Mo nating se ol brata we oli stap lidim yumi oli gat ol slak fasin, be yumi sua se Jehova bambae i blesem yumi sipos yumi obei. (1 Saml. 15:22) Mo sipos Jehova i luk se i nidim blong mekem sam jenis long fiuja, bambae hem i mekem long stret taem blong hem.—Maeka 7:7.

15-16. ?Wanem i givhan long wan brata blong i wokbaot folem bilif, nating se fastaem hem i no kasemsave long wan jenis we oganaesesen i mekem? (Mo tu, yu luk pija.)

¹⁵ Traem tingbaot wan ekspiriens we i soemaot ol gudfala samting we i save kamaot, taem yumi wokbaot folem bilif. Long Peru, plante man oli toktok lanwis blong Spen. Be i gat plante man tu we oli toktok ol lokol lanwis. Wan long ol lanwis ya, hemia Quechua. Blong plante yia, ol brata mo sista we oli prij long lanwis ya, oli stap lukaot ol man we oli toktok lanwis ya long teritori blong olgeta. Be blong folem ol loa we gavman i putum, oganaesesen i askem ol pablisa blong jenisim fasin blong olgeta blong faenem ol man. (Rom. 13:1) From samting ya, sam pablisa oli ting se hemia bambae i no givhan long wok blong prij. Be taem ol brata mo sista oli folem ol jenis ya, Jehova i blesem traehad blong olgeta, mo oli naf blong faenem plante moa man we oli toktok lanwis Quechua.

¹⁶ Kevin, wan elda long kongregesen we i toktok lanwis Quechua, hem tu fastaem hem i no kasemsave long jenis ya. Hem i talem se: “Mi stap tingting se: ‘?Olsem wanem bambae mifala i gohed blong faenem ol man we oli toktok lanwis Quechua?’” Ale, ?Kevin i mekem wanem? Hem i talem se: “Mi tingbaot vas blong Ol Proveb 3:​5, mo mi tingbaot eksampol blong Moses. Jehova i talem long hem blong lidim ol man Isrel oli aot long Ijip mo oli go kasem long Red Si. Be long ples ya, i luk olsem se i isi nomo blong ol man Ijip oli kasem olgeta. Nating se i olsem, Moses i obei, mo Jehova i blesem hem from taem i mekem wan bigfala merikel blong sevem olgeta.” (Eks. 14:​1, 2, 9-11, 21, 22) Kevin i jenisim tingting blong hem mo i rere blong folem wan niufala rod blong prij. ?Wanem i kamaot from? Hem i talem se: “Mi glad tumas blong luk olsem wanem Jehova i blesem mifala. Bifo, mifala i wokbaot plante long wok blong prij, be samtaem mifala i faenem wan o tu man nomo we oli toktok lanwis Quechua. Be naoia mifala i prij moa long ol teritori we plante man oli toktok lanwis ya. From samting ya, mifala i gat janis blong storian wetem plante moa man, faenem ol visit, mo ol Baebol stadi. Mo namba blong ol man we oli kam long ol miting tu i go antap.” Yes, taem yumi wokbaot folem bilif, oltaem bambae Jehova i blesem yumi.

17. ?Yu yu lanem wanem long stadi ya?

¹⁷ Long stadi ya, yumi bin tokbaot olsem wanem yumi save wokbaot folem bilif, taem yumi mekem ol gudfala desisen long tri impoten samting long laef. Be yumi mas gohed blong soemaot se yumi stap wokbaot folem bilif long olgeta desisen we yumi mekem long laef blong yumi, olsem taem yumi jusum ol samting blong spel mo pleplei, taem yumi mas mekem ol desisen long saed blong edukesen, mo olsem wanem blong tijim ol pikinini. Nomata wanem desisen we yumi mas mekem, be i gud yumi no tingbaot nomo ol samting we yumi luk, be yumi tingbaot ol samting we Jehova i wantem, ol advaes blong hem, mo promes we hem i mekem se bambae hem i lukaot gud long yumi. Sipos yumi tingbaot ol samting ya, bambae yumi naf blong ‘wokbaot oltaem long nem blong Jehova, God blong yumi, gogo i no save finis.’—Maeka 4:5.