?Olsem Wanem Jehova i Halpem Yumi Blong Stanap Strong?

1. ?From wanem yumi nidim blong stanap strong? ?Mo hu i save halpem yumi? (1 Pita 5:10)

LONG ol las dei ya, ol man blong Jehova oli nidim blong stanap strong. Samfala oli safa from we oli kasem wan strong sik. Sam narafala oli lusum wan famle o fren long ded. Sam narafala bakegen, ol memba blong famle o ol haeman blong gavman oli agensem olgeta. (Mat. 10:​18, 36, 37) Nating se i olsem, yu save sua se nomata wanem hadtaem yu fesem, Jehova i save halpem yu blong stanap strong.—Ridim 1 Pita 5:10.

2. ?From wanem yumi naf blong stanap strong?

² Fasin blong stanap strong i min se yumi holemstrong long Jehova, mo yumi glad blong mekem wok blong hem nating se yumi fesem ol hadtaem, ol man oli agensem yumi, o yumi fesem wan traem we i pulum yumi blong mekem sin. Yumi no naf blong stanap strong long prapa paoa blong yumi, be Jehova nomo i naf blong givim “paoa ya we i bigwan bitim mak,” blong givhan long yumi blong stanap strong. (2 Kor. 4:7) Long stadi ya, bambae yumi tokbaot fo rod we Jehova i yusum blong givhan long yumi blong stanap strong, mo samting we yumi save mekem, blong ol fofala rod ya oli givhan long yumi.

PREA

3. ?From wanem prea i wan spesel presen?

³ Jehova i yusum wan spesel rod blong givhan long yumi blong stanap strong. Hem i mekem se yumi save toktok long hem tru long prea, nating se yumi sinman. (Hib. 4:16) Traem tingbaot: Yumi save prea enitaem mo tokbaot eni samting long Jehova. Mo hem i harem yumi nating se yumi toktok long ol defren lanwis, yumi stap long ol defren ples, yumi stap longwe long ol narafala, o long kalabus. (Jona 2:​1, 2; Wok 16:​25, 26) Sipos yumi wari tumas nao yumi no save olsem wanem blong tokbaot ol filing blong yumi long Jehova, be hem i kasemsave samting we yumi wantem talem. (Rom 8:​26, 27) !Yes, prea i wan spesel presen we Jehova i givim!

4. ?From wanem yumi sua se Jehova bambae i halpem yumi, taem yumi askem hem blong i givhan long yumi blong stanap strong?

⁴ Long Baebol, Jehova i talem se: “Nomata wanem samting yumi askem long hem, mo sipos i laenap wetem wil blong hem, hem i harem yumi.” (1 Jon 5:14) ?Yumi save askem Jehova blong halpem yumi blong stanap strong? Yes, from we hemia i laenap wetem wil blong hem. ?From wanem yumi talem olsem? Taem yumi stanap strong long ol trabol, yumi stap givhan long Jehova blong i givim ansa long Devel Setan we i stap tok nogud long hem. (Prov. 27:11) Antap long hemia, Baebol i talem se Jehova i wantem tumas blong “soemaot paoa blong hem blong givhan long olgeta we hat blong olgeta i stap fulwan long hem.” (2 Kron. 16:9) Taswe yumi save sua se Jehova i wantem tumas blong halpem yumi, mo givim paoa we yumi nidim blong stanap strong.—Aes. 30:18; 41:10; Luk 11:13.

5. ?Olsem wanem prea i mekem se yumi gat pis long tingting? (Aesea 26:3)

⁵ Baebol i talem se taem yumi prea strong from ol samting we yumi stap wari from, “pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong [yumi].” (Fil. 4:7) Yumi glad tumas se yumi save kasem pis ya. Ol man blong wol we oli stap fesem ol hadtaem, oli traem ol defdefren rod blong oli save gat pis long tingting. Eksampol, samfala oli folem sam kaen rod blong traem mekem tingting blong olgeta i emti, nao oli save gat pis long tingting. Be taem oli mekem olsem, oli no moa kontrolem ol tingting blong olgeta. Mo hemia i denja from we ol rabis spirit oli save gat paoa long tingting blong olgeta. (Skelem wetem Matiu 12:​43-45.) Mo nating sipos oli kasem pis, be hemia i no trufala pis we i kam long Jehova. Taem yumi prea long Jehova, yumi soemaot se yumi dipen fulwan long hem, mo hem bambae i mekem se yumi “gohed blong gat pis.” (Ridim Aesea 26:3.) Wan rod we Jehova i yusum blong givim pis long yumi, hemia taem hem i mekem yumi tingbaot bakegen ol trutok blong Baebol. Ol trutok ya oli mekem tingting mo hat blong yumi i kwaet, from yumi save se Jehova i kea long yumi mo i wantem se yumi glad.—Sam 62:​1, 2.

6. ?Yu save talem wanem long ol prea blong yu? (Mo tu, yu luk pija.)

⁶ Samting we yu save mekem. Taem yu fesem wan problem, i gud “yu sakem ol hevi baden blong yu long Jehova,” mo yu prea blong gat pis long tingting. (Sam 55:22) I gud yu askem waes long hem tu blong yu save samting we yu mas mekem. (Prov. 2:​10, 11) Mo tu, taem yu prea yu no mas foget blong talem tangkiu. (Fil. 4:6) Traem luksave samting we Jehova i mekem finis blong givhan long yu, mo talem tangkiu from. Yu no mas letem ol hadtaem we yu kasem, i blokem yu blong luksave ol blesing we yu kasem finis.—Sam 16:​5, 6.

TOK BLONG GOD

7. ?Olsem wanem Baebol i save halpem yumi blong stanap strong?

⁷ Jehova i yusum Tok blong hem, blong givhan long yumi blong stanap strong. I gat plante vas long Baebol we i mekem yumi sua se oltaem Jehova bambae i halpem yumi. Wan eksampol hemia Matiu 6:​8, we i talem se: “Papa blong yufala i save finis ol samting we yufala i nidim taem yufala i no askem long hem yet.” Jisas nao i talem ol tok ya mo hem i save gud Jehova moa i bitim eni narafala man. Taswe, yumi save sua fulwan se taem yumi safa, Jehova i save samting we yumi nidim, mo bambae hem i halpem yumi. Yes, yumi save faenem plante gudfala tingting olsem long Baebol, we i save halpem yumi blong stanap strong.—Sam 94:19.

8. (1) Talem wan stamba trutok Baebol we i save halpem yumi blong stanap strong. (2) ?Yumi mas mekem wanem blong yumi save tingbaot bakegen ol stamba trutok blong Baebol long taem we yumi nidim?

⁸ Ol stamba trutok blong Baebol oli save halpem yumi blong stanap strong. Oli save givim waes we yumi nidim blong mekem ol gudfala desisen. (Prov. 2:​6, 7) Eksampol, Baebol i leftemap tingting blong yumi blong dipen long Jehova evri dei, be i no blong wari from ol samting we maet i save hapen long fiuja. (Mat. 6:34) Sipos yumi ridim Baebol mo tingting dip long hem evri dei, bambae i isi moa blong tingbaot ol stamba trutok blong Baebol long taem we yumi nidim.

9. ?Olsem wanem ol stori long Baebol oli mekem yumi sua fulwan se Jehova bambae i halpem yumi?

⁹ Long Baebol, i gat ol trufala stori blong ol man we oli trastem Jehova, nao hem i givhan long olgeta. (Hib. 11:​32-34; Jem. 5:17) Taem yumi tingting dip long ol stori olsem, bambae yumi save trastem fulwan se Jehova i “ples blong haed blong yumi mo i paoa blong yumi, mo long taem blong trabol, yumi save kasem help long hem kwiktaem.” (Sam 46:1) Taem yumi tingbaot olsem wanem ol gudfala man blong Jehova long taem bifo oli stanap strong mo soemaot bilif, bambae yumi tu yumi wantem mekem sem mak.—Jem. 5:​10, 11.

10. ?Yu save mekem wanem blong Baebol i givhan long yu?

¹⁰ Samting we yu save mekem. I gud yu ridim Baebol evri dei mo mekem lis blong ol vas we yu luk se i givhan long yu. Plante brata mo sista oli luk se taem oli ridim vas blong dei evri moning, hemia i mekem se oli gat gudfala tingting blong fuldei. Wan sista we nem blong hem Mariea i luk se rod ya i givhan bigwan long hem, taem papa mo mama blong hem i kasem kansa. ?Wanem i givhan long hem blong i stanap strong, taem hem i stap lukaot long tufala long ol laswan manis bifo we tufala i ded? Hem i talem se: “Evri moning mi ridim vas blong Baebol we i kamaot long buk ya Stadi Gud Long Ol Tok Blong Baebol Evri Dei, mo mi tingting dip long hem. Hemia i halpem mi blong tingbaot Jehova mo ol nambawan samting we hem i tijim yumi long hem, i bitim we mi tingbaot mi wan mo ol problem we mi stap fesem.”—Sam 61:2.

OL BRATA MO SISTA

11. ?Yu harem olsem wanem taem yu save se ol narafala brata mo sista tu oli stap stanap strong?

¹¹ Jehova i yusum ol brata mo sista long kongregesen blong oli givhan long yumi blong stanap strong. Taem yumi save se ‘olgeta brata blong yumi we oli bilif, olgeta tu oli stap safa sem mak olsem yumi,’ yumi sua se yumi no stap yumi wan. (1 Pita 5:9) Yes, yumi save sua se nomata wanem trabol yumi fesem, ol narafala tu oli fesem sem samting mo oli stanap strong. !Taswe, yumi tu yumi naf blong stanap strong!—Wok 14:22.

12. ?Olsem wanem ol brata mo sista oli halpem yumi? ?Mo yumi save mekem wanem blong givhan long olgeta? (2 Korin 1:​3, 4)

¹² Ol brata mo sista oli save leftemap tingting blong yumi blong stanap strong. Hemia nao samting we i hapen long aposol Pol. Long ol leta we hem i raetem, plante taem hem i talem nem blong olgeta we oli halpem hem taem hem i kalabus long wan haos. Mo oltaem hem i talem tangkiu long olgeta. Ol brata mo sista ya oli talem ol gudfala toktok blong leftemap tingting blong hem, mo oli mekem sam samting blong givhan long hem. (Fil. 2:​25, 29, 30; Kol. 4:​10, 11) Tede tu i sem mak. Taem yumi nidim help blong stanap strong, ol brata mo sista oli givhan long yumi. Mo taem olgeta oli nidim help, yumi givhan long olgeta.—Ridim 2 Korin 1:​3, 4.

13. ?Wanem i halpem Maya blong i stanap strong?

¹³ Ol brata mo sista oli givhan bigwan blong leftemap tingting blong wan sista long Rasia, we nem blong hem Maya. Long 2020, ol polis oli brekin long haos blong hem, mo biaen oli putum hem long kot from we hem i stap tokbaot bilif blong hem long ol narafala. Maya i talem se: “Long taem ya, tingting blong mi i foldaon bigwan. Be ol brata mo sista oli ring long mi, mo oli raetem ol leta long mi blong soemaot se oli lavem mi. Mi save finis se mi gat wan bigfala famle we oli lavem mi. Be samting we i hapen long mi long 2020, i mekem mi sua fulwan long samting ya.”

14. ?Yu save mekem wanem blong ol brata mo sista oli givhan long yu blong stanap strong? (Mo tu, yu luk pija.)

¹⁴ Samting we yu save mekem. Taem yu stap stanap strong long wan trabol, i gud we oltaem yu stap klosap long ol brata mo sista. Yu no mas fraet blong askem help long ol elda. Olgeta oli olsem “wan selta we man i go long hem taem i gat win, wan sefples taem i gat strong win mo ren.” (Aes. 32:​2, fut.) I gud blong tingbaot se ol narafala brata mo sista tu oli stap stanap strong long ol hadtaem we oli fesem. Taswe taem yu mekem wan gudfala samting blong givhan long olgeta, hemia bambae i halpem yu blong gat stret tingting mo stap glad, nating se yu tu yu stap fesem ol hadtaem.—Wok 20:35.

HOP LONG SAED BLONG FIUJA

15. ?Olsem wanem hop i givhan long Jisas? ?Mo olsem wanem hop i givhan long yumi? (Hibru 12:2)

¹⁵ Jehova i yusum hop long saed blong fiuja, blong halpem yumi blong stanap strong. (Rom 15:13) Traem tingbaot olsem wanem hop i givhan long Jisas blong i stanap strong, long taem ya we hem i safa bigwan. (Ridim Hibru 12:2.) Jisas i save se sipos hem i stanap strong, hemia bambae i leftemap nem blong Jehova. Mo tu, hem i stap tingbaot taem ya we bambae hem i gobak long heven, mo i rul wetem ol brata blong hem long Kingdom. Long sem fasin, sipos yumi tingbaot hop ya blong laef olwe long niufala wol, bambae yumi naf blong stanap strong long eni hadtaem we yumi fesem long wol blong Setan.

16. ?Olsem wanem hop i halpem wan sista blong i stanap strong, mo yu lanem wanem long samting we hem i talem?

¹⁶ Traem tingbaot olsem wanem hop ya blong laef long niufala wol, i halpem wan sista long Rasia we nem blong hem Alla, we oli arestem hasban blong hem mo putum hem long wan kalabus, kasem taem we bambae hem i pas long kot. Alla i talem se: “Taem mi tingting dip long hop blong fiuja mo mi tokbaot long ol prea blong mi, hemia i halpem mi blong mi no harem nogud tumas. Mi kasemsave se ol trabol ya oli blong smoltaem nomo. I no longtaem Jehova bambae i winim ol enemi blong hem, mo bambae i blesem yumi.”

17. ?Olsem wanem yumi soemaot se yumi glad long hop we yumi gat? (Mo tu, yu luk pija.)

¹⁷ Samting we yu save mekem. I gud yu tekem taem blong tingbaot ol nambawan blesing we Jehova i promes blong givim long yumi long fiuja. Traem pijarem se laef blong yu bambae i olsem wanem long niufala wol, taem bambae yu harem gud blong joen wetem ol fren mo ol famle blong yu. Ol trabol we yumi stap fesem tede, oli “smol nomo, mo oli no save stap longtaem,” sipos yumi skelem wetem taem ya we bambae yumi laef olwe long paradaes (2 Kor. 4:17) Mo tu, i gud yu mekem bes blong yu blong tokbaot hop ya long ol narafala. Traem tingbaot ol man we oli no wosipim Jehova, olgeta tu oli fesem hadtaem olsem yumi. Be olgeta oli no save ol nambawan promes blong Jehova. Wan smol toktok nomo we yu talem, i save pulum olgeta blong oli wantem save moa long ol promes ya.

18. ?From wanem yumi save trastem ol promes blong Jehova?

¹⁸ Afta we Job i stanap strong long ol trabol we hem i fesem, hem i talem long Jehova se: “Naoia mi save se yu yu naf blong mekem olgeta samting, mo i no gat wan samting we yu stap tingting blong mekem we i strong tumas blong yu mekem.” (Job 42:2) Job i lanem se i no gat wan samting i save stopem Jehova blong i mekem ol promes blong hem oli kamtru. Save ya bambae i givhan long yumi tu blong stanap strong. Traem tingbaot pijatok ya: Wan woman we i sik, i harem nogud bigwan from we plante dokta oli no naf blong winim sik blong hem. Be biaen, wan dokta we i gat moa ekspiriens mo we plante man oli trastem hem, i faenemaot sik blong woman ya mo i eksplenem olsem wanem bambae hem i tritim hem. Hemia i mekem woman ya i harem gud tumas, nating se bambae i tekem sam taem blong sik blong hem i kam gud. Naoia hem i naf blong stanap strong, from hem i gat hop se bambae hem i kam gud bakegen. Long sem fasin, yumi naf blong stanap strong from yumi trastem fulwan hop ya se bambae yumi laef long Paradaes.

19. ?Wanem i save givhan long yumi blong stanap strong?

¹⁹ Olsem we yumi bin lanem, Jehova i yusum nambawan presen ya prea, Tok blong hem, ol brata mo sista, mo hop long saed blong fiuja, blong givhan long yumi blong stanap strong long ol trabol we yumi fesem. Sipos yumi folem ol advaes long stadi ya, Jehova bambae i halpem yumi blong stanap strong long olgeta trabol we yumi fesem, go kasem taem ya we wol blong Setan bambae i lus.—Fil. 4:13.