Faet Agensem Ol Nogud Samting We Yumi Wantem

1. ?Yumi evriwan i stap faet agensem wanem kaen tingting?

?SAMTAEM yu wantem tumas blong mekem samting we Jehova i no laekem? Sipos yes, tingbaot se i no yu wan nomo. Baebol i talem se: “Ol samting we oli stap traem yufala, oli sem mak nomo long ol samting we oli stap traem olgeta man.” (1 Kor. 10:13) Hemia i min se nomata wanem rong tingting yu stap faet agensem, ol narafala tu oli stap fesem sem samting. Tingbaot se yu no stap yu wan. Wetem help blong Jehova, yu save winim faet ya.

2. ?Wanem sam samting we sam Kristin mo ol Baebol stadi oli stap faet agensem? (Mo tu, yu luk ol pija.)

² Baebol i talem se: “Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.” (Jem. 1:14) Ol samting we i pulum yumi wanwan blong mekem samting we i no stret, oli defdefren. Eksampol, maet wan brata i wantem mekem seks wetem wan woman, be maet wan narafala brata i wantem mekem seks wetem wan man bakegen. Olgeta we oli stop blong lukluk ol doti pija, mo olgeta we oli stop blong tekem drag o dring bitim mak, maet oli wantem tumas blong mekem ol samting ya bakegen. Hemia sam long ol samting we sam Kristin mo ol Baebol stadi oli stap faet agensem. Maet samtaem, yumi evriwan i harem olsem aposol Pol we i talem se: “Taem mi wantem mekem samting we i stret, be tingting blong mekem i nogud, hem tu i stap long mi.”—Rom 7:21.

3. Sipos oltaem wan man i wantem mekem samting we i no stret, ?hem i save harem olsem wanem?

³ Sipos oltaem yu wantem mekem samting we i no stret, maet yu save harem se yu no gat paoa blong mekem samting we i stret. Mo tu, maet yu harem se yu nogud, mo se Jehova i no glad long yu from yu gat ol nogud tingting. !Be ol filing ya oli no stret! ?From wanem yumi talem olsem? Bambae yumi faenem ansa long tu kwestin: (1) ?Hu nao i wantem we yumi harem se yumi no gat paoa, mo se yumi nogud? (2) ?Olsem wanem blong faet agensem ol nogud samting we yumi wantem?

?“MAN YA WE I RABIS” I WANTEM SE YUMI HAREM OLSEM WANEM?

4. (1) ?Setan i talem wanem blong mekem yumi ting se yumi no gat paoa? (2) ?From wanem yumi sua se yumi save faet agensem ol nogud samting we yumi wantem?

⁴ Taem wan samting i traem yumi, Setan i wantem we yumi harem se yumi no gat paoa. Jisas i soemaot samting ya taem hem i tijim ol man blong hem blong prea se: “Yu no letem ol samting oli kam traem mifala, be yu tekemaot mifala long man ya we i rabis.” (Mat. 6:13) Setan i talem se ol man bambae oli no save obei long Jehova taem oli fesem wan traem. (Job 2:​4, 5) Hemia from we hem nao i faswan man we i letem ol samting we hem i wantem, oli pulum hem blong mekem samting we i no stret, nao hem i no moa holemstrong long Jehova. Mo hem i ting se yumi olsem hem, we bambae yumi kwik blong lego Jehova taem wan samting i traem yumi. !Setan i gat tingting ya tu se stret Pikinini blong God bambae i save mekem wan samting we i no stret sipos wan samting i traem hem! (Mat. 4:​8, 9) Be traem tingbaot: ?I tru se yumi no gat paoa blong faet agensem ol nogud samting we yumi wantem? !Nogat! Yumi agri wetem aposol Pol, we i talem se: “Mi mi gat paoa blong fesem olgeta samting from God ya we i givim paoa long mi.”—Fil. 4:13.

5. ?Olsem wanem yumi save se Jehova i sua fulwan se yumi naf blong faet agensem ol nogud samting we yumi wantem?

⁵ Jehova i defren long Setan, hem i sua fulwan se yumi naf blong faet agensem ol nogud samting we yumi wantem. Yumi save samting ya from we Jehova i talem se wan bigfala hip blong ol man we oli holemstrong long hem, bambae oli pastru long bigfala trabol. Yes, Jehova we i no save giaman, i talem se wan bigfala namba blong ol man we oli “wasem klos blong olgeta finis long blad blong Smol Sipsip blong mekem oli kam waet, bambae oli go insaed long niufala wol from we Jehova i luk olgeta se oli klin long fored blong hem.” (Rev. 7:​9, 13, 14) Hemia i soemaot se long lukluk blong Jehova, yumi gat paoa blong faet agensem ol nogud samting we yumi wantem.

6-7. ?From wanem Setan i wantem we yumi harem se yumi nogud?

⁶ Setan i wantem tu we yumi harem se yumi nogud, mo se Jehova i no glad long yumi from yumi wantem samting we i no stret. Be traem tingbaot, Setan nao i nogud mo Jehova i jajem hem finis se hem i no stret blong kasem laef olwe. (Jen. 3:15; Rev. 20:10) Be yumi, yumi gat hop blong laef olwe. Taswe Setan i jalus mo i traehad blong mekem yumi gat tingting ya se yumi nogud. Be Baebol i mekem yumi sua se Jehova i wantem halpem yumi blong kasem laef. Hem “i no wantem se wan man i ded, hem i wantem se olgeta man oli tanem tingting blong olgeta.”—2 Pita 3:9.

⁷ Sipos yumi bilivim se yumi no gat paoa blong faet agensem ol nogud samting we yumi wantem o se yumi nogud, yumi gat tingting ya we Setan i wantem se yumi gat. Taem yumi luksave samting ya, bambae yumi naf blong faet agensem Setan.—1 Pita 5:​8, 9.

?WANEM FILING WE YUMI SAVE GAT FROM WE YUMI SINMAN?

8. Long Baebol, ?sin i save minim wanem? (Ol Sam 51:5) (Mo tu, yu luk “Mining Blong Toktok.”)

⁸ Taem yumi stap faet agensem ol nogud samting we yumi wantem, i gat wan narafala samting tu we i save mekem yumi harem se yumi no gat paoa o se yumi nogud. ?Wanem samting ya? Hemia sin we yumi kasem long faswan perens blong yumi.a—Job 14:4; ridim Ol Sam 51:5.

9-10. (1) Afta we Adam mo Iv i mekem sin, ?tufala i harem olsem wanem? (Mo tu, yu luk pija.) (2) ?Sin i mekem se yumi harem olsem wanem?

⁹ Traem tingbaot samting we Adam mo Iv i mekem, mo filing blong tufala afta we tufala i mekem sin. Tufala i go haed mo traem blong kavremap bodi blong tufala. Buk ya Insight on the Scriptures, i eksplenem from wanem tufala i mekem olsem, i se: “Sin i mekem se tufala i gilti, wari, ting nating long tufala wan, mo tufala i sem.” Hemia i olsem we Adam mo Iv i lok insaed long wan haos we i gat fo rum nomo. Tufala i save muv i go long wanwan rum ya, be tufala i no save kamaot long haos ya. Yes, tufala i no save kamaot long sin.

¹⁰ I tru, yumi no olsem Adam mo Iv, from we Jehova i givim ransom i no blong tufala, be blong hem i save fogivim yumi mo yumi save gat wan tingting we i klin. (1 Kor. 6:11) Nating se i olsem, yumi gat yet sin ya we yumi kasem long Adam mo Iv. Taswe yumi no sapraes se yumi tu, yumi save harem se yumi gilti, wari, ting nating long yumi wan, mo yumi sem. Mo Baebol i talem se sin i gohed blong gat bigfala paoa long ol man, mo “hem i rul long olgeta ya tu we oli no mekem sin long sem fasin we Adam i mekem.” (Rom 5:14) Maet ol tok ya oli save mekem yumi harem nogud, be yumi no mas gat filing ya se yumi no gat paoa o se yumi nogud. Yumi save sakemaot ol nogud filing ya. ?Yumi save mekem samting ya olsem wanem?

11. Taem yumi harem se yumi no gat paoa, ?yumi mas mekem wanem mo from wanem? (Rom 6:12)

¹¹ Taem yumi harem se yumi no gat paoa blong faet agensem ol nogud samting we yumi wantem, tingbaot se hemia sin ya we i stap “toktok” long yumi, be yumi no mas lesin long hem. From we Baebol i talem se yumi no mas letem sin i gohed blong “rul” long yumi. (Ridim Rom 6:12.) Hemia i min se yumi save jusum blong no mekem ol samting we oli no stret. (Gal. 5:16) Jehova i sua se yumi save faet agensem ol nogud samting we yumi wantem, taswe hem i askem yumi blong mekem samting ya. (Dut. 30:​11-14; Rom 6:6; 1 Tes. 4:3) Yes, yumi gat paoa blong faet agensem ol nogud samting we yumi wantem.

12. Taem yumi harem se yumi nogud, ?yumi mas mekem wanem mo from wanem?

¹² Taem yumi harem se yumi nogud, mo se Jehova i no glad long yumi from we yumi wantem mekem samting we i no stret, tingbaot se hemia sin ya we i stap “toktok” long yumi, be yumi no mas lesin long hem. From we Baebol i talem se Jehova i kasemsave se yumi bon wetem sin. (Sam 103:​13, 14) Hem i “save evri samting” long saed blong yumi, hemia i min se hem i save gud olsem wanem sin i pulum yumi wanwan blong wantem mekem samting we i no stret. (1 Jon 3:​19, 20) Be sipos yumi no mekem ol nogud samting we yumi wantem, bambae Jehova i glad long yumi. ?From wanem yumi sua long samting ya?

13-14. Sipos yumi wantem mekem samting we i no stret, ?hemia i min se Jehova i no save glad long yumi? Yu eksplenem.

¹³ Baebol i talem se fasin blong mekem samting we i no stret (we yumi save kontrolem) i defren olgeta long fasin ya blong wantem mekem samting we i no stret (we maet yumi no save kontrolem). Eksampol, long faswan handred yia, i gat sam Kristin long Korin we bifo oli stap mekem seks wetem man bakegen. Pol i talem se: “Bifo sam long yufala oli olsem nao.” ?Be hemia i min se oli neva gat filing ya bakegen? Si, from we ol filing ya oli stap dip insaed long hat blong olgeta. Be ol Kristin we oli bos long tingting blong olgeta mo oli no mekem ol nogud samting we oli wantem, Jehova i glad long olgeta mo i luk olgeta se oli “klin finis.” (1 Kor. 6:​9-11) God i save gat sem tingting olsem tu long yu.

¹⁴ Nomata wanem nogud samting we yu wantem mekem, yu save sua se yu save gohed blong faet agensem. Nating se yu no save sakemaot fulwan ol nogud tingting ya, be yu save bos long tingting blong yu, blong yu no “folem prapa tingting blong [yu].” (Efes. 2:3) ?Yu save mekem wanem blong yu gohed blong faet agensem ol nogud samting we yu wantem?

?YU SAVE MEKEM WANEM BLONG YU GOHED BLONG FAET?

15. Blong faet agensem ol nogud samting we yumi wantem, ?from wanem yumi mas luksave ol slak fasin blong yumi?

¹⁵ Sipos yu wantem gohed blong faet agensem ol nogud samting we yu wantem, yu mas luksave ol slak fasin blong yu. Yu mas lukaot se yu no ‘stap giaman long yu wan bakegen.’ (Jem. 1:22) I nogud yu mekem eskius from ol slak fasin blong yu mo talem se: ‘Ol narafala oli dring alkol moa i bitim mi,’ o yu blemem ol narafala mo talem se: ‘Bambae mi no save lukluk ol doti pija, sipos waef blong mi i soemaot moa lav long mi.’ Sipos yu stap mekem eskius, bambae i isi nomo blong yu mekem samting we i no stret. Taswe, i nogud yu mekem eskius o blemem narafala. Be yu mas luksave se yu wan nomo bambae yu kasem frut from ol samting we yu mekem.—Gal. 6:7.

16. ?Yu save mekem wanem blong yu gat strong tingting blong mekem samting we i stret?

¹⁶ Afta we yu luksave ol slak fasin blong yu, yu mas gat strong tingting blong no foldaon long ol slak fasin ya. (1 Kor. 9:​26, 27; 1 Tes. 4:4; 1 Pita 1:​15, 16) I gud yu traem tingbaot ol samting we oli save pulum yu blong foldaon long ol slak fasin ya, mo wetaem i had moa blong faet agensem. Eksampol, ?yu faenem i had moa blong faet agensem ol nogud samting we yu wantem, taem yu taed o yu wekap let long naet? I gud yu rerem tingting blong yu mo tingbaot samting we bambae yu mekem long taem olsem. I gud yu rere bifo we wan samting i pulum yu blong foldaon long slak fasin blong yu.—Prov. 22:3.

17. ?Yumi lanem wanem long eksampol blong Josef? (Jenesis 39:​7-9) (Mo tu, yu luk ol pija.)

¹⁷ Traem tingbaot samting we Josef i mekem taem waef blong Potifa i traem pulum hem blong slip wetem hem. Kwiktaem nomo hem i talem no long hem. (Ridim Jenesis 39:​7-9.) Hemia i soemaot se Josef i gat strong tingting finis blong no slip wetem waef blong narafala man, bifo we waef blong Potifa i traem blong pulum hem. Long sem fasin, yu tu yu save rerem tingting blong yu bifo we wan samting i pulum yu blong foldaon long sin. Olsem nao, bambae i moa isi blong stanap strong taem wan samting i traem yu.

“GOHED BLONG JEKEM” YU WAN

18. ?Yu save mekem wanem blong yu gohed blong faet agensem ol nogud samting we yu wantem? (2 Korin 13:5)

¹⁸ Sipos yu wantem gohed blong faet agensem ol nogud samting we yu wantem, yu mas “gohed blong jekem” yu wan. (Ridim 2 Korin 13:5.) I gud we wanwan taem yu jekem ol tingting blong yu mo ol samting we yu stap mekem, mo sipos yu luk se yu mas mekem sam jenis, i gud yu mekem. Eksampol, maet yu naf blong stanap strong taem wan samting i pulum yu blong mekem sin. Be i gud yu askem yu wan se: ‘?I tekem longtaem blong mi talem no?’ Sipos yes, yu no mas harem nogud. Be i gud yu mekem sam samting blong mekem tingting blong yu i strong moa. Yu save askem ol kwestin olsem se: ‘Taem mi gat wan nogud tingting, ?mi mi sakemaot kwiktaem? ?Ol samting we mi jusum blong spel mo pleplei oli mekem se i had blong mi stanap strong? ?Mi mi tanem fes blong mi kwiktaem, blong mi no lukluk ol doti pija? ?Mi mi kasemsave se oltaem ol rul blong Jehova oli blong givhan long mi, nating se i no isi blong mi bos long tingting blong mi?’—Sam 101:3.

19. ?Olsem wanem ol smol desisen we i no waes, oli save mekem se i had blong faet agensem ol nogud samting we yumi wantem?

¹⁹ Yu mas lukaot gud tu se yu no stat blong gat tingting ya se i oraet nomo blong mekem ol nogud fasin. Baebol i se: “Hat i save giaman i bitim eni narafala samting mo i denja bitim mak.” (Jer. 17:9) Jisas i talem se “ol rabis tingting” oli kamaot long hat. (Mat. 15:19) Eksampol, wan man we i stop blong lukluk ol doti pija, maet afta sam taem hem i ting se: ‘I oraet nomo sipos mi lukluk pija blong ol man o woman we oli no rili neked, from we oli no save wekemap filing blong mi.’ O maet hem i gat tingting ya se: ‘I oraet nomo sipos mi stap pijarem se mi stap mekem wan nogud samting, from we mi no stap mekem nogud samting ya.’ Be blong talem stret, hat blong hem i stap giaman long hem, i stap “mekemrere plan blong wokem ol rabis samting we bodi blong [hem] i wantem.” (Rom 13:14) Taswe, blong blokem samting ya, yu mas lukaot se yu no mekem ol smol desisen we oli no waes, we oli save pulum yu blong mekem ol bigfala desisen we oli no waes, nao yu mekem sin.b Mo tu, i gud blong sakemaot “ol rabis tingting” we oli save pulum yu blong mekem eskius, blong yu save mekem wan fasin we i no stret.

20. ?Yumi stap wet long wanem? ?Hu i save givhan long yumi naoia?

²⁰ Olsem we yumi bin lanem, Jehova nomo i save givim paoa long yumi blong faet agensem ol samting we oli pulum yumi blong mekem sin. Mo tu, yumi glad se Jehova i sore long yumi, taswe yumi gat hop ya blong kasem laef olwe long niufala wol. !Long taem ya, bambae yumi glad tumas se yumi save wosipim Jehova wetem wan tingting mo hat we i klin! Be go kasem taem ya, i gud yumi gohed blong sakemaot tingting ya se yumi no gat paoa o se yumi nogud. !Wetem help blong Jehova, yumi save gohed blong faet agensem ol nogud samting we yumi wantem!