Bilif Strong Se Jehova i Fogivim Yu

1-2. ?Yumi harem olsem wanem taem yumi save se Jehova i fogivim yumi? (Mo tu, yu luk pija.)

KING Deved i save gud filing we yumi gat taem yumi harem nogud from ol sin blong yumi bifo. (Sam 40:12; 51:3; supaskripsen) Hem tu i bin mekem sam bigfala sin. Be taem hem i tanem tingting blong hem, Jehova i fogivim hem. (2 Saml. 12:13) Deved i glad tumas taem hem i kasemsave se Jehova i fogivim hem.—Sam 32:1.

² Olsem Deved, yumi tu yumi glad taem yumi kasem save se Jehova i fogivim yumi. Nating se yumi mekem wan bigfala sin, be yumi glad se Jehova i rere blong fogivim yumi, sipos yumi tanem tingting blong yumi, yumi talemaot ol sin blong yumi, mo yumi traehad blong no mekem sem mastik ya bakegen. (Prov. 28:13; Wok 26:20; 1 Jon 1:9) !Mo yumi glad blong save se taem Jehova i fogivim yumi, hem i fogivim yumi fulwan, i olsem we yumi no bin mekem sin!—Esik. 33:16.

3-4. ?Wan sista i harem olsem wanem afta we hem i baptaes? ?Bambae yumi tokbaot wanem long stadi ya?

³ Samtaem, maet i had blong bilif strong se Jehova i fogivim yumi. Traem tingbaot Jennifer, we i gruap long trutok. Taem hem i kam bigwan, hem i stat blong mekem ol fasin we oli nogud, mo i haedem long perens blong hem. Sam yia biaen, hem i kambak long Jehova mo i kasem mak ya blong tekem baptaes. Hem i talem se: “Bifo, mi mekem ol doti fasin blong seks, mi dring bitim mak, mi kros oltaem, mo mi stap ronem ol sas samting. Be mi lanem se sipos mi tanem tingting blong mi, mo mi askem strong long Jehova blong i fogivim mi, bambae hem i save fogivim mi tru long ransom sakrefaes blong Jisas. Be i had blong trastem se Jehova i rili fogivim mi.”

⁴ ?Samtaem i had blong yu trastem se Jehova i fogivim yu from ol sin blong yu bifo? Jehova i wantem se yu gat sem tingting olsem Deved we i trastem fulwan se Jehova i fogivim hem. Long stadi ya, bambae yumi tokbaot from wanem yumi mas trastem se Jehova i fogivim yumi, mo samting we yumi mas mekem blong bilif strong long samting ya.

?FROM WANEM YUMI MAS BILIF STRONG SE JEHOVA I FOGIVIM YUMI?

5. ?Setan i wantem se yumi gat wanem tingting? Talem wan eksampol.

⁵ Sipos yumi bilif strong se Jehova i fogivim yumi, bambae yumi no foldaon long wan long ol trap blong Setan. Tingbaot se Setan bambae i mekem eni samting blong traem stopem yumi blong mekem wok blong Jehova. Maet Setan i traem mekem yumi ting se Jehova i no save fogivim ol sin blong yumi. Traem tingbaot samting we i hapen long wan man long Korin, we kongregesen i putumaot hem from we hem i mekem doti fasin blong seks. (1 Kor. 5:​1, 5, 13) Afta we man ya i tanem tingting blong hem, Setan i wantem se olgeta long kongregesen oli no fogivim hem, mo oli no welkamem bak hem long kongregesen. Mo tu, Setan i wantem se man ya i harem se Jehova i no save fogivim hem. Hem i wantem se man ya i “harem nogud tumas nao tingting blong hem i foldaon,” olsem nao bambae hem i stop blong mekem wok blong Jehova. Tede tu, Setan i wantem se yumi foldaon long semfala trap ya. Be from we “yumi save ol plan blong hem,” yumi save lukaot gud blong yumi no foldaon long trap ya.—2 Kor. 2:​5-11.

6. ?Yumi mas mekem wanem blong yumi no harem nogud tumas from ol sin blong yumi bifo?

⁶ Sipos yumi bilif strong se Jehova i fogivim yumi, bambae yumi no harem nogud tumas from ol sin blong yumi bifo. Taem yumi mekem sin, i stret nomo we yumi harem nogud. (Sam 51:17) Mo hemia i wan gudfala samting, from i save pulum yumi blong stretem rong blong yumi. (2 Kor. 7:​10, 11) Be sipos yumi gohed blong harem nogud afta we yumi tanem tingting blong yumi, tingting blong yumi i save foldaon, nao yumi stop blong mekem wok blong Jehova. Sipos yumi bilif strong se Jehova i fogivim yumi, bambae yumi no harem nogud tumas from ol sin blong yumi bifo. Nao bambae yumi save mekem wok blong Jehova we tingting blong yumi i no stikim yumi, mo yumi glad. Hemia nao samting we Jehova i wantem. (Kol. 1:​10, 11; 2 Tim. 1:3) ?Be yumi save mekem wanem blong bilif strong se Jehova i fogivim yumi?

?WANEM I SAVE HALPEM YUMI BLONG BILIF STRONG SE JEHOVA I FOGIVIM YUMI?

7-8. ?Jehova i talem wanem long Moses blong tokbaot hem wan, mo hemia i mekem yumi sua long wanem? (Eksodas 34:​6, 7)

⁷ Tingbaot samting we Jehova i talem blong tokbaot hem. Traem tingbaot samting we Jehova i talem long Moses long Bigfala Hil Ya Sinae.a (Ridim Eksodas 34:​6, 7.) Jehova i gat plante nambawan fasin we hem i save tokbaot long Moses, be hem i jusum blong talemaot long Moses se hem i “wan God we i gat sore mo i kaen.” Taswe, ?sipos wan man blong Jehova i mekem sin, be biaen i tanem tingting blong hem, yu no ting se Jehova bambae i glad blong fogivim hem? !I sua se bambae hem i mekem olsem! Sipos hem i no mekem, hemia i soemaot se hem i no gat sore, mo i stap mekem i strong tumas long ol man. Be yumi save se Jehova i no olsem.

⁸ Yumi save trastem tok ya blong Jehova se hem i wan God we i gat sore mo i kaen, from we hem i no save giaman. (Sam 31:5) Taswe, sipos yu stap harem nogud yet from ol sin we yu mekem bifo, askem yu wan se: ‘?Mi mi bilif se Jehova i wan God we i gat sore mo i kaen, mo i glad blong fogivim eni man we i tanem tingting from ol sin blong hem?’ Sipos yu bilif long samting ya, yu save sua se Jehova i fogivim yu tu.

9. ?I minim wanem se Jehova i fogivim ol sin blong yumi? (Ol Sam 32:5)

⁹ Tingbaot ol tok we Jehova i talem blong tijim yumi long saed blong fasin blong hem blong fogivim man. Traem tingbaot samting we Deved i talem long saed blong fasin blong Jehova blong fogivim man. (Ridim Ol Sam 32:5.) Hem i se: “Yu yu fogivim mastik mo ol sin blong mi.” Hibru tok ya we oli tanem i kam “fogivim,” i save minim “leftemap,” “tekemaot,” o “karem.” Taem Jehova i fogivim Deved, i olsem we hem i leftemap ol sin blong Deved, mo i karem i go longwe long hem. (Sam 32:​2-4) Taswe, Deved i harem gud from we i olsem we Jehova i karemaot wan hevi baden long hem. Yumi tu, yumi save harem gud olsem Deved. Sipos yumi tanem tingting blong yumi from ol sin blong yumi, yumi no nid blong gohed blong harem nogud from ol sin ya we oli olsem wan hevi baden, from we Jehova i leftemap, mo i karem ol sin ya i go longwe finis long yumi.

10-11. ?Toktok ya “rere blong fogif” i soemaot wanem long saed blong Jehova? (Ol Sam 86:5)

¹⁰ Ridim Ol Sam 86:5. Deved i talem se Jehova i “rere blong fogif.” Hemia i min se Jehova i no save kros kwik taem yumi mekem mastik, mo oltaem hem i wantem tumas blong fogivim olgeta we oli tanem tingting blong olgeta. ?From wanem hem i mekem olsem? Nekis haf blong vas ya i eksplenem se: “Yu lavem tumas olgeta we oli stap singaot i kam long yu.” Olsem we yumi lanem long las stadi, Jehova i promes se bambae hem i lavem ol man blong hem oltaem mo i neva lego olgeta. Mo lav ya i mekem se ‘bambae hem i glad nomo blong fogivim’ olgeta we oli tanem tingting blong olgeta. (Aes. 55:​7, fut.) Sipos yu faenem i had blong bilif strong se God i fogivim yu, i gud yu tingbaot se: ‘Sipos yu bilif se Jehova i rere blong fogivim olgeta man we oli tanem tingting from ol sin blong olgeta, mo oli askem hem blong i sore long olgeta, i sua se hem i fogivim yu tu, taem yu askem hem blong i sore long yu mo i fogivim yu.’

¹¹ Yumi glad tu blong save se Jehova i kasemsave gud se yumi ol sinman, mo se samtaem bambae yumi mestem. (Sam 139:​1, 2) Yumi save luk samting ya long wan narafala sam we Deved i talem, we i save halpem yumi blong bilif strong se Jehova i fogivim yumi.

NO FOGETEM SAMTING WE JEHOVA I TINGBAOT

12-13. Folem Ol Sam 103:​14, ?Jehova i tingbaot wanem, mo hemia i pulum hem blong mekem wanem?

¹² Ridim Ol Sam 103:14. Deved i talem se Jehova i “tingbaot we yumi das nomo.” Taem Deved i talem ol tok ya, hem i stap eksplenem wan long ol risen from wanem Jehova i rere blong fogivim ol man blong hem, taem oli tanem tingting from ol sin blong olgeta. Hemia from we hem i tingbaot oltaem se yumi ol sinman. Naoia i gud yumi traem kasemsave moa long ol tok ya blong Deved.

¹³ Deved i talem se Jehova i “save gud olsem wanem hem i mekem yumi.” Jehova i “tekem das blong graon mo i wokem” Adam long hem. (Jen. 2:7) Mo hem i save se olgeta man wetem ol man we oli stret gud tu, oli mas kakae, slip, mo pulum win blong oli save stap laef. Be from we Adam mo Iv i mekem sin, toktok ya se yumi das nomo, i minim tu se yumi bon wetem sin. Taswe yumi mas faet strong agensem tingting ya blong wantem mekem samting we i no stret. Be Jehova i no jes save nomo se yumi sinman. Deved i talem se Jehova i “tingbaot” samting ya, mo hemia i pulum hem blong sore long yumi. Ol tok ya blong Deved i min se: Jehova i save se samtaem bambae yumi mestem, be sipos yumi tanem tingting blong yumi, bambae hem i sore long yumi mo i glad nomo blong fogivim yumi.—Sam 78:​38, 39.

14. (1) ?Fasin blong Jehova blong fogivim man i bigwan olsem wanem? (Ol Sam 103:12) (2) ?Yumi lanem wanem long fasin blong Jehova blong fogivim Deved? (Yu luk bokis ya “Taem Jehova i Fogivim Man, Hem i Fogetem.”)

¹⁴ ?Fasin blong Jehova blong fogivim man i bigwan olsem wanem? (Ridim Ol Sam 103:12.) Deved i talem se taem Jehova i fogivim yumi, Hem i stap putum ol sin blong yumi oli stap longwe we longwe long yumi, “olsem we is i stap longwe we longwe long wes.” Oltaem is i stap longwe long wes, neva tufala saed ya i save joen wanples. ?Hemia i soemaot wanem long saed blong ol sin we Jehova i fogivim? Wan buk i eksplenem fasin blong Jehova blong fogivim man, i se: “Taem God i putum ol sin blong yumi oli stap longwe we longwe long yumi, hemia i olsem we smel blong wan samting i lus fulwan.” Traem tingbaot, smel blong wan samting i save mekem yu tingbaot wan samting we i bin hapen long laef blong yu bifo. Be taem Jehova i fogivim yumi, hemia i olsem we i no gat wan samting i stap we i save mekem hem i tingbaot sin ya bakegen.—Esik. 18:​21, 22; Wok 3:19.

15. ?Yumi save mekem wanem sipos yumi harem nogud yet from ol sin blong yumi bifo?

¹⁵ ?Olsem wanem ol tok blong Deved long Ol Sam 103, i halpem yumi blong bilif strong se Jehova i fogivim yumi? Sipos yumi gohed blong harem nogud from ol sin blong yumi bifo, i gud yumi tingbaot se: ‘?Mi mi fogetem samting we Jehova i tingbaot, hemia se mi mi sinman, mo se bambae hem i fogivim ol man we oli tanem tingting blong olgeta olsem mi? ?Mi mi stap tingbaot samting we Jehova i jusum blong fogetem, hemia sin we hem i fogivim finis, mo i no save tingbaot bakegen?’ Jehova i no stap tingbaot ol sin blong yumi bifo. Mo yumi tu yumi mas mekem sem mak. (Sam 130:3) Taem yumi bilif strong se Jehova i fogivim yumi, bambae yumi no moa harem nogud from ol sin we yumi mekem bifo, be bambae yumi wosipim Jehova wetem glad.

16. Tokbaot from wanem yumi no mas gohed blong tingbaot ol sin blong yumi. (Mo tu, yu luk pija.)

¹⁶ Traem tingbaot wan pijatok. Sipos yu gohed blong stap tingbaot ol sin blong yu bifo, hemia i olsem we yu stap draevem wan trak i go fored, be yu stap lukluk i gobak biaen. I gud we wanwan taem yu lukluk ol samting we i stap biaen long yu, long mira blong trak. Be blong yu save stap sef, yu mas gohed nomo blong lukluk i go long fored. Long sem fasin, i stret nomo we wanwan taem, yumi tingtingbak long ol mastik blong yumi, from hemia bambae i givhan long yumi blong lanem samting from, mo no moa mekem ol mastik ya bakegen. Be sipos yumi gohed blong tingbaot ol mastik ya, bambae yumi no moa glad blong mekem wok blong Jehova. Taswe, yumi mas gohed nomo blong lukluk i go fored. Yumi stap long rod ya we i lidim yumi blong kasem laef we i no save finis long niufala wol, we long ples ya bambae yumi “no moa tingbaot ol samting blong bifo.”—Aes. 65:17; Prov. 4:25.

GOHED BLONG BILIF STRONG SE JEHOVA I FOGIVIM YU

17. ?From wanem yumi mas gohed blong bilif strong moa se Jehova i lavem yumi mo i fogivim yumi?

¹⁷ Long hat blong yumi, yumi mas gohed blong bilif strong se Jehova i lavem yumi mo i fogivim yumi. (1 Jon 3:19) ?From wanem? From we Setan bambae i gohed blong traem mekem yumi gat tingting ya se Jehova i no lavem yumi, mo i no save fogivim yumi. Nomata wanem tingting we Setan i wantem se yumi gat, be mak blong hem i blong mekem se yumi stop blong mekem wok blong Jehova. Mo bambae hem i traehad moa blong mekem samting ya, from hem i save se hem i gat smol taem nomo i stap yet. (Rev. 12:12) !Be yumi no mas letem hem i win!

18. ?Yu save mekem wanem blong bilif strong se Jehova i lavem yu mo i fogivim yu?

¹⁸ Blong bilif strong moa se Jehova i lavem yu, i gud yu folem ol advaes we yumi tokbaot long las stadi. Mo blong bilif strong se Jehova i fogivim yu, i gud yu tingbaot bakegen ol samting we Jehova i talem blong tokbaot hem. Tingbaot ol tok we Jehova i talem blong tijim yumi long saed blong fasin blong hem blong fogivim man. No fogetem se Jehova i save gud se yu yu wan sinman mo se bambae hem i kaen long yu mo i sore long yu. Mo tu, yu mas tingbaot se taem Jehova i fogivim man, hem i fogivim hem fulwan. Olsem nao bambae yu sua fulwan olsem Deved se Jehova i fogivim yu, mo bambae yu save talem se: “!Tangkiu Jehova blong ‘fogivim mastik mo ol sin blong mi’!”—Sam 32:5.