Mi Mi Wan Woman Blong Sem, Be Mi Kam Wan Misinari

Mi mi bon long 1951 long taon ya Vienna, long Ostria. Famle blong mi i Katolik. Mi mi wan gel we mi sem, be mi bilif long God mo oltaem mi prea. Taem mi gat naen yia, papa blong mi i stat blong stadi Baebol wetem ol Witnes blong Jehova, mo biaen mama tu i stat blong stadi.

Mifala i joen long Döbling Kongregesen long Vienna. Famle blong mi i mekem plante samting tugeta. Mifala i ridim mo stadi Baebol, go long ol miting, mo givhan blong mekem ol wok long asembli. Taem mi smol, papa blong mi i givhan long mi blong lavem Jehova. Hem i prea se wan dei bambae mi mo sista blong mi i kam ol paenia. Long taem ya, mi no gat tingting blong mekem wok ya.

MI STATEM WOK BLONG JEHOVA FULTAEM

Mi baptaes long 1965, taem mi gat 14 yia. Be i had long mi blong prij. Mo tu, mi stap ting nating long mi wan, taswe mi rere blong mekem eni samting blong ol narafala yangfala oli glad long mi. Ale, smol taem afta we mi baptaes, mi stat blong joen plante wetem olgeta we oli no wosipim Jehova. Mi laekem kampani blong olgeta, be tingting blong mi i stap stikim mi from mi save se mi spenem tumas taem wetem olgeta. Be mi no gat strong tingting blong lego ol fren ya. ?Wanem i givhan long mi?

Long taem ya, wan yangfala gel we nem blong hem Dorothée, i kam joenem kongregesen blong mifala. Hem i gat 16 yia, mo hem i gat strong tingting blong prij long ol haos wanwan. Mi sapraes long samting ya, from we mi mi bigwan moa long hem, be mi no stap prij plante. Mi stap tingting se: ‘Perens blong mi i Witnes, be famle blong Dorothée i no stap long trutok. Hem i stap wetem mama blong hem we i sik, be oltaem hem i prij.’ Eksampol blong hem i pulum mi blong mekem moa long wok blong Jehova. I no longtaem biaen, mi mo Dorothée i stat blong paenia tugeta. Fastaem, mitufala i mekem haftaem paenia, mo biaen fultaem paenia. From we Dorothée i laekem tumas blong prij, mi tu mi stat blong laekem. Hem i halpem mi blong statem faswan Baebol stadi blong mi. Sloslo, mi no moa fraet tumas blong prij long ol man long ol haos wanwan, long rod, mo long ol narafala ples.

Long faswan yia we mi mekem wok blong fultaem paenia, wan brata blong Ostria we nem blong hem Heinz i kam long kongregesen blong mifala. Hem i lanem trutok long Kanada taem hem i visitim brata blong hem we i wan Witnes. Oganaesesen i sanem Heinz i kam long kongregesen blong mifala olsem wan spesel paenia. Mi laekem hem stat long faswan taem we mi mitim hem. Hem i wantem kam wan misinari, be mi mi no intres long wok ya. Taswe, fastaem mi no wantem hem i save se mi laekem hem. Be biaen, mi mo Heinz i stat blong fren, mitufala i mared, mo mitufala i mekem wok blong paenia tugeta long Ostria.

MI STATEM WOK BLONG MISINARI

Plante taem Heinz i stap talem se hem i wantem kam wan misinari. Hem i no wantem fosem mi blong kam misinari, be samtaem hem i askem long mi se: “From we yumitu no gat pikinini, ?yu ting se yumitu save mekem moa long wok blong Jehova?” Be from we mi mi wan woman blong sem, mi fraet blong kam wan misinari. I tru se mi mekem wok blong paenia, be mi harem se mi no naf blong kam misinari. Nating se i olsem, Heinz i gat longfala tingting mo i gohed blong tokbaot wok ya long mi. Mo tu, hem i leftemap tingting blong mi blong mi no tingbaot mi wan nomo, be blong tingbaot moa ol narafala. Advaes ya i givhan bigwan long mi.

Sloslo, mi wantem kam misinari, ale mitufala i aplae blong go long Skul Blong Gilead. Be brata we i lukaot long branj ofis i talem se fastaem mi mas lanem blong toktok gud Inglis. Afta tri yia we mi traehad blong lanem Inglis, mitufala i sapraes se branj ofis i askem mitufala blong go givhan long wan kongregesen long Salzburg, long Ostria, we oli toktok lanwis blong Yugoslavia. Long ol nekis seven yia, mitufala i prij long ol man we oli toktok lanwis ya, mo wan long ol yia ya, mitufala i mekem wok blong eria elda. Nating se lanwis ya i had, be mitufala i gat plante Baebol stadi.

Long 1979, oli askem mitufala blong go long Bulgaria mo mekem olsem se mitufala i go blong spel. Long ples ya, gavman i putum tabu long wok blong prij. Taswe, mitufala i no prij, be mitufala i tekem ol smosmol buk haed nomo, blong go pasem long ol faef sista we oli stap long taon ya Sofia. Mi fraet we mi fraet, be Jehova i givhan long mi blong mekem spesel wok ya. Taem mi luk we ol sista ya oli gat strong tingting mo oli glad blong mekem wok blong Jehova, nating se oli save go long kalabus from, hemia i leftemap tingting blong mi tu blong mekem bes blong mi long eni wok we mi kasem long oganaesesen.

Sam taem biaen, mitufala i aplae bakegen blong go long Skul Blong Gilead, mo oli akseptem mitufala. Mitufala i ting se bambae mitufala i mekem skul ya long Inglis, long Yunaeted Stet. Be long Novemba 1981, oli statem sam klas blong Gilead long branj ofis long Wiesbaden, Jemani. Taswe, mitufala i mekem skul ya long lanwis Jemani, we i isi moa blong mi kasemsave. ?Be bambae oli sanem mitufala i go wea?

PRIJ LONG WAN KANTRI WE I GAT PLANTE FAET

!Oli sanem mitufala i go long Kenia! Be branj ofis blong Kenia i askem mitufala blong go prij long Uganda, wan kantri we i stap klosap long Kenia. Uganda i wan kantri we i gat plante faet. Samwe ten yia bifo, wan grup blong ol ami we Jenerol Idi Amin i lidim olgeta, i bin tekova long gavman blong Uganda. Long ol yia we hem i rul, plante taosen man oli ded mo plante milian man oli fesem hadtaem. Mo long 1979, wan narafala grup i tekova bakegen long gavman blong Uganda. Ol trabol ya oli mekem se mi fraet blong go stap long ples ya. Be Skul Blong Gilead i tijim mitufala blong trastem Jehova, taswe mitufala i agri blong go.

Laef long Uganda i no isi. Gavman i no naf blong givim wota, laet, mo ol narafala samting we ol man oli nidim. Telefon tu i no wok long ples ya. Plante taem ol man oli stap sut long masket mo oli stil, speseli long naet. Taswe taem i tudak, ol man oli stap kwaet nomo long haos mo oli stap prea strong se bambae i no gat wan man i kam blong stil o kilim olgeta. Be nating se i gat ol trabol ya, ol brata mo sista long ples ya oli gat strong tingting blong mekem wok blong Jehova.

Long 1982, mi mo Heinz i kasem Kampala, hemia bigfala taon long Uganda. Blong faef manis, mitufala i stap long haos blong Sam mo Christina Waiswa wetem ol faef pikinini blong tufala, mo fo narafala famle blong olgeta. Plante taem, Brata mo Sista Waiswa mo famle blong olgeta oli kakae wan taem nomo long wan dei. Be oli glad blong serem samting we oli gat wetem mitufala. Long taem we mi mo Heinz i stap wetem famle Waiswa, mitufala i lanem plante impoten samting we i givhan long laef blong mitufala olsem misinari. Eksampol, mitufala i lanem blong yusum smol wota nomo blong swim, mo yusum sem wota ya bakegen long toelet. Ale, long 1983, mi mo Heinz i faenem wan haos long wan eria blong Kampala we i sef moa.

Mitufala i laekem tumas blong prij long ples ya. !Mi tingbaot se long wan manis nomo, mitufala i givimaot bitim 4,000 magasin! Be mitufala i glad moa, taem mitufala i luk se ol man long ples ya, oli wantem wosipim God mo oli laekem tokbaot Baebol. Plante taem, mitufala wanwan i stap mekem 10 kasem 15 Baebol stadi long wan manis. Mo mitufala i lanem plante samting long fasin blong olgeta. Eksampol, nating se evri wik oli wokbaot nomo i go long ol miting, be oltaem oli smael mo oli glad nomo blong mekem olsem. Hemia i leftemap tingting blong mitufala.

Long 1985 mo 1986, i gat tu bigfala faet bakegen long Uganda. Mitufala i luk ol pikinini oli stap holem ol bigfala masket. Oli yusum olgeta olsem ol soldia blong oli kontrolem mo blokem ol rod. Long taem ya, mitufala i prea oltaem long Jehova blong i halpem mitufala blong no fraet, mo givim waes long mitufala taem mitufala i stap prij. Mo Jehova i ansarem ol prea blong mitufala. Plante taem, mitufala i fogetem ol wari blong mitufala taem mitufala i faenem wan man we i glad blong lesin long mesej blong Kingdom.

Mitufala i gat janis tu blong prij long ol man blong ol narafala kantri we oli stap long Uganda. Eksampol, mitufala i statem stadi wetem Murat mo Dilbar Ibatullin, wan kapol blong Tatarstan, long Sentrol Rasia. Murat i wan dokta. Tufala i baptaes mo tufala i gohed blong wosipim Jehova kasem tede. Biaen, mi mitim Tatjana Vileyska, wan woman blong Yukren we bifo hem i wantem kilim hem wan i ded. Afta we Tatjana i baptaes, hem i gobak long Yukren mo biaen i givhan blong transletem ol buk blong yumi i go long lanwis blong olgeta.a

PRIJ LONG WAN NARAFALA KANTRI BAKEGEN

Long 1991, taem mi mo Heinz i go spel long Ostria, branj ofis long ples ya i raet i kam long mitufala se oli wantem we mitufala i go long Bulgaria. Blong plante yia, gavman i putum tabu long wok blong ol Witnes blong Jehova long ol kantri long Is Yurop, olsem Bulgaria. Be jenis long gavman i mekem se oli no moa putum tabu long wok blong yumi. Olsem mi tokbaot finis, mi mo Heinz i bin haedem sam buk mo karem i go finis long Bulgaria. Be naoia oli wantem se mitufala i go blong prij.

Oli talem long mitufala blong go stret long Bulgaria mo no gobak long Uganda. Taswe, mitufala i no gat janis blong karem ol samting blong mitufala long Uganda, o talem tata long ol fren blong mitufala. Mitufala i go stret long Betel long Jemani, mitufala i karem wan trak, ale mitufala i draev i go long Bulgaria. Oli sanem mitufala i go long wan grup blong samwe 20 pablisa long taon blong Sofia.

Mitufala i fesem sam niufala problem long Bulgaria. Faswan,mitufala i no save lanwis blong ples ya. Mo tu, i gat tu buk nomo long lanwis blong Bulgaria, hemia The Truth That Leads to Eternal Life mo Buk Blong Ol Baebol Stori. Mo i had blong statem ol Baebol stadi. Nating se i olsem, be smol grup blong ol Witnes we mitufala i joen wetem olgeta, oli gat strong tingting blong prij. Otodoks jej i luk samting ya, nao oli stat blong agensem mifala.

Long 1994, gavman i putum tabu bakegen long wok blong ol Witnes, mo plante man oli ting se mifala i wan krangke skul. Ale, oli arestem sam brata blong yumi. Mo tu, ol man long nius oli stap talem ol giaman tok, se ol Witnes blong Jehova oli stap kilim ol pikinini i ded, mo pulum ol narafala Witnes blong kilim olgeta wan i ded. Taswe, i had blong prij. Plante taem mitufala i mitim ol man we oli kros tumas, oli singaot strong long mitufala, oli ringim polis from mitufala, mo oli stap stonem mitufala . Mifala i no save kasem ol buk, mo ol man oli no wantem letem mifala i rentem ol ples blong mekem miting. Wan taem, ol polis oli kam stopem wan asembli. Mi mo Heinz i neva fesem wan samting olsem bifo. Ol man long ples ya oli defren long ol man long Uganda we oli glad blong lesin long gud nius. ?Wanem i givhan long mitufala long ol hadtaem ya?

Mitufala i harem gud taem mitufala i joen wetem ol brata mo sista. Olgeta oli glad tumas se oli kasem trutok, mo oli talem tangkiu long mitufala from we mitufala i kam givhan long olgeta. Mifala i joen plante tugeta mo givgivhan long mifala. Ol hadtaem ya i tijim mitufala se mitufala i save glad long eni wok we mitufala kasem long oganaesesen, sipos mitufala i tingbaot nomo blong halpem ol narafala.

Be sloslo, ol samting oli kam gud moa. Long 1998, gavman i tekemaot tabu long wok blong ol Witnes long Bulgaria, mo oganaesesen i transletem plante moa buk i go long lanwis blong Bulgaria. Long 2004, oli openem wan niufala branj ofis long ples ya. Tede, i gat 57 kongregesen long Bulgaria, mo i gat 2,953 pablisa. Long sevis yia we i jes pas, i gat 6,475 man oli kam long Memoriol. Long taon blong Sofia we fastaem i gat faef sista nomo, !naoia i gat naen kongregesen! Mitufala i luk we “smolwan . . . i kam wan taosen.”—Aes. 60:22.

MITUFALA I FESEM PROBLEM BLONG HELT

Long laef blong mi, mi gat plante problem blong helt. Long ol yia we i pas, ol dokta oli faenemaot se i gat ol lam insaed long bodi blong mi we oli save kam kansa, mo i gat wan long hed blong mi tu. Oli yusum wan masin blong traem bonem ol lam ya blong oli no kam bigwan, mo mi go tu long India blong mekem wan operesen we i tekem 12 aoa. Mitufala i stap smol long branj blong India kasem we mi harem gud smol, biaen mitufala i gobak long Bulgaria.

Heinz i kasem wan strong sik, hemia Huntington’s disease we i pas long famle laen. Sik ya i mekem se i had blong hem i wokbaot, toktok, mo kontrolem ol masel blong hem. Sloslo sik ya i kam mowas, nao hem i dipen moa long mi blong mekem samting. Samtaem, mi taed tumas mo mi wari se bambae mi no naf blong lukaot long hem. Be i gat wan yangfala brata long kongregesen we nem blong hem Bobi, plante taem i stap prij wetem Heinz. Nating se samtaem ol toktok mo aksen blong Heinz i narakaen smol from hem i no save kontrolem gud ol masel blong hem, be Bobi i no sem blong prij wetem hem. Oltaem Bobi i glad blong givhan long Heinz, taem mi no naf blong mekem. Mi mo Heinz i bin mekem desisen blong no gat pikinini, from we mitufala i wantem mekem moa long wok blong Jehova. Be Jehova i givim Bobi blong i kam olsem boe blong mitufala.—Mak 10:​29, 30.

Heinz i kasem kansa tu, mo sore tumas, long 2015, hem i ded. Mi misim hem bigwan from hem nao i stap givhan long mi blong no wari tumas. I had blong bilivim se hem i no moa stap. Be from we mi stap tingbaot hem oltaem, i olsem we hem i laef yet. (Luk 20:38) Evri dei, mi stap tingbaot ol toktok mo gudfala advaes we hem i bin talem long mi. Mi glad tumas we mitufala i mekem wok blong Jehova tugeta blong plante yia.

JEHOVA I HALPEM MI BIGWAN

Jehova i givim paoa long mi blong gotru long ol defdefren hadtaem. Hem i givhan long mi tu blong mi no moa sem mo mi kam wan misinari we i lavem ol narafala. (2 Tim. 1:7) Mo tu, Jehova i givhan long mi mo smol sista blong mi blong mitufala i mekem wok blong Jehova fultaem. Tede, hem mo hasban blong hem i stap mekem wok blong eria elda long Yurop, long lanwis Sebia. !Jehova i ansarem prea blong papa blong mi!

Taem mi stadi Baebol, mi gat pis long tingting. Mi lanem blong “prea strong moa” taem mi fesem ol hadtaem, olsem Jisas i mekem. (Luk 22:44) Wan rod we Jehova i ansarem ol prea blong mi, hemia tru long ol brata mo sista long kongregesen blong mi long Nadezhda, Sofia, we oli soemaot lav mo oli kaen long mi. Plante taem oli stap askem mi blong joen wetem olgeta, mo oli stap talem long mi se oli lavem mi. Hemia i mekem mi glad tumas.

Plante taem mi stap tingbaot hop blong laef bakegen. Mi stap tingbaot se bambae mi luk perens blong mi i stap stanap long fored blong haos blong mifala, we oli kam yang bakegen olsem taem ya we tufala i jes mared. Mi pijarem se sista blong mi i stap rerem wan kakae. Mo mi pijarem se Heinz i stap stanap klosap long hos blong hem. Taem mi pijarem ol samting ya, hemia i mekem mi glad, mi naf blong stanap strong, mo mi wantem talem tangkiu long Jehova.

Taem mi tingting bak long laef blong mi mo mi tingbaot fiuja, mi gat sem tingting olsem Deved we i talem long Ol Sam 27:​13, 14 se: “?Bambae mi stap wea naoia, sipos mi no bilif se mi save luk ol gudfala fasin blong Jehova taem mi laef yet? Yu mas putum hop blong yu long Jehova. Yu mas gat strong tingting mo mekem hat blong yu i strong. Yes, yu mas putum hop blong yu long Jehova.”