Kwestin

Man we i raetem Ol Proveb 30:​18, 19 i talem se “fasin blong man taem i stap wetem wan yang woman,” i ‘strong tumas i bitim save blong hem.’ ?Hemia i minim wanem?

Plante man, we hemia i minim tu olgeta we oli gat plante save long Baebol, oli wantem save se ol tok blong ol vas ya i stap minim wanem. Long Baebol Long Niu Wol Translesen, tufala vas ya i talem se: “I gat tri samting we i strong tumas i bitim save blong mi [o “we mi luk se oli gud tumas,” fut.], mo i gat fo samting we mi mi no kasemsave long olgeta: Fasin blong igel we i stap flae long heven, fasin blong snek we i stap krol antap long wan ston, fasin blong sip we i stap ron long open si, mo fasin blong man taem i stap wetem wan yang woman.”—Prov. 30:​18, 19.

Taem yumi ridim ol vas bifo i kam kasem tok ya “fasin blong man taem i stap wetem wan yang woman,” maet yumi gat wan tingting we i no stret. ?From wanem? From we ol vas ya oli tokbaot ol nogud samting we oli neva talem se “inaf.” (Prov. 30:​15, 16) Mo vas 20 i tokbaot “wan woman we i stap mekem adaltri,” be hem i stap talem se hem i no mekem wan samting i rong. Taswe, fastaem yumi ting se vas ya i stap tokbaot wan samting we man i mekem, be narafala i no save. Hemia i sem mak olsem taem wan igel i stap flae long heven, wan snek i krol long wan ston, o wan sip i stap ron long open si, be i no gat wan mak blong olgeta i stap blong soem se oli pas long ples ya. Hemia nao from wanem yumi ting se toktok ya “fasin blong man taem i stap wetem wan yang woman,” i stap tokbaot wan nogud samting, hemia se wan yang man i trikim wan yang gel blong i mekem seks wetem hem.

Be i gat sam gudfala risen we i save pulum yumi blong bilif se vas ya i stap tokbaot wan gudfala samting. Man we i raetem ol vas ya i stap tokbaot ol samting we i mekem hem i sapraes.

Ol olfala hanraet long lanwis Hibru i sapotem tingting ya tu se vas ya i stap tokbaot wan gudfala samting. Buk ya Theological Lexicon of the Old Testament, i talem se Hibru tok we oli tanem i kam “i strong tumas i bitim save blong mi” long Ol Proveb 30:​18, “i soemaot wan samting we wan man . . . i luk se i gud tumas, i sapraes from, o i nambawan tumas.”

Profesa ya Crawford H. Toy long Yunivesiti blong Harvard long Yunaeted Stet, hem tu i talem se vas ya long Baebol, i no stap tokbaot wan nogud samting. Hem i se: “Man ya we i raetem vas ya, hem i stap tokbaot olsem wanem ol samting ya we hem i tokbaot, oli mekem hem i sapraes tumas.”

Taswe i luk olsem se i stret nomo blong talem se ol tok we i stap long Ol Proveb 30:​18, 19, oli stap tokbaot ol samting we oli nambawan tumas, mo yumi no naf blong kasem save fulwan long olgeta. Olsem man ya blong raetem Baebol i talem, yumi sapraes tumas blong luk olsem wanem wan igel i flae antap long skae, wan snek i krol long ston nating se hem i no gat leg, olsem wanem wan bigfala sip we i hevi i naf blong ron long solwota, mo olsem wanem wan yang man mo wan yang woman i save lavlavem tufala mo tufala i glad blong laef tugeta.