Jehova i Olsem ‘Bigfala Glad We Yumi Stap Kasem’

1-2. (1) ?Tede plante man oli harem olsem wanem? (2) ?Bambae yumi tokbaot wanem long stadi ya?

TEDE, ol man oli rere blong mekem eni samting blong oli save glad. Nating se i olsem, oli no save kasem trufala glad. Plante man oli harem nogud tumas o tingting blong olgeta i foldaon. Ol man blong Jehova tu oli save gat ol filing olsem. From we yumi stap laef long “ol las dei,” yumi save fesem ol trabol mo gat ol nogud filing we i “had blong winim.”—2 Tim. 3:1.

² Long stadi ya, bambae yumi tokbaot ol samting we oli save mekem se yumi no moa glad, mo samting we yumi save mekem blong glad bakegen. Be fastaem, bambae yumi tokbaot se hu nao i Stamba blong trufala glad.

STAMBA BLONG TRUFALA GLAD

3. ?Ol samting we Jehova i wokem i soemaot wanem long saed blong hem? (Mo tu, yu luk ol pija.)

³ Jehova i glad oltaem, mo hem i wantem se yumi tu yumi glad. Hemia nao from wanem hem i wokem plante samting we i save mekem yumi glad. Eksampol, yumi glad taem yumi luk naesfala wol ya we i gat ol defdefren kala long hem, yumi glad taem yumi wajem ol animol oli pleplei, mo yumi glad taem yumi kakae ol naesfala kakae. Yes, !God i lavem yumi tumas mo i wantem se yumi enjoem laef!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (1) ?Olsem wanem Jehova i gohed blong stap glad nating se hem i luk ol trabol long wol? (2) ?Wanem presen we Jehova i givim long yumi? (Ol Sam 16:11)

⁴ Nating se Jehova i wan “hapi God,” be hem i save gud se long wol ya ol man oli stap harem nogud. (1 Tim. 1:11) Be hem i no letem samting ya i mekem se hem i no moa glad. Hem i save se ol trabol ya oli blong smoltaem nomo, mo hem i gat longfala tingting blong wet kasem dei ya we bambae hem i finisim fulwan ol trabol. Be go kasem taem ya, Jehova i kasemsave long ol trabol we yumi stap fesem, mo hem i wantem givhan long yumi. ?Hem i givhan long yumi olsem wanem? Wan rod, hemia se hem i givim wan spesel presen long yumi, hemia glad. (Ridim Ol Sam 16:11.) Traem luk olsem wanem hem i givim presen ya long Boe blong hem, Jisas.

5-6. ?From wanem Jisas i glad?

⁵ Jisas i glad moa i bitim olgeta narafala laef samting we Jehova i wokem. ?From wanem? Traem tingbaot tu risen. (1) “Hem i “pija blong God ya we yumi no save luk hem,” taswe hem i soemaot gud ol fasin blong Papa blong hem, olsem glad. (Kol. 1:15; 1 Tim. 6:15) (2) Jisas i spenem moa taem wetem Papa blong hem we i Stamba blong glad.

⁶ Jisas i glad tu from we oltaem hem i mekem samting we Papa blong hem i wantem. (Prov. 8:​30, 31; Jon 8:29) Hem i obei oltaem long Jehova, taswe Jehova i glad tumas long hem.—Mat. 3:17.

7. ?Olsem wanem yumi save kasem trufala glad?

⁷ Yumi tu yumi save kasem trufala glad taem yumi kam klosap moa long Jehova, we i Stamba blong glad. Taem yumi spenem moa taem blong save gud Jehova mo folem ol gudfala fasin blong hem, bambae yumi glad moa. Mo tu, yumi glad taem yumi mekem samting we God i wantem, from we yumi save se hem i glad long yumi.a (Sam 33:12) ?Be olsem wanem sipos samtaem yumi harem se yumi no moa glad? ?Hemia i min se Jehova i no glad long yumi? !Nogat! From we yumi sinman, samtaem yumi harem nogud mo tingting blong yumi i foldaon. Jehova i kasemsave long samting ya. (Sam 103:14) I gud yumi tokbaot ol samting we i save mekem se yumi no moa glad, mo samting we yumi save mekem blong glad bakegen.

NO LETEM WAN SAMTING I MEKEM SE YU NO MOA GLAD

8. ?Ol problem long laef oli save mekem yumi harem olsem wanem?

⁸ Ol problem long laef. ?Yu yu fesem ol problem, olsem ol man oli agensem yu, yu fesem wan disasta, yu sot long mane, yu sik, o yu kam olfala? Taem yumi fesem ol problem olsem, hemia i save mekem se yumi no moa glad, speseli sipos yumi no naf blong mekem wan samting blong jenisim. Baebol i talem stret se: “Sipos hat blong man i trabol, bambae tingting blong hem tu i foldaon olgeta.” (Prov. 15:13) Wan elda we nem blong hem Babis, i lusum brata blong hem mo papa mo mama blong hem long ded long fo yia nomo. Hem i talem se: “Mi harem se mi stap mi wan mo i no gat man i save givhan long mi. Samtaem, mi harem nogud from we mi no bin spenem plante taem wetem perens blong mi mo brata blong mi bifo we oli ded.” Yes, ol problem long laef oli save mekem se yumi taed mo tingting i foldaon.

9. ?Wanem i save givhan long yumi blong glad bakegen? (Jeremaea 29:​4-7, 10)

⁹ ?Wanem i save givhan long yumi blong glad bakegen? Yumi save glad bakegen sipos yumi no wari tumas from ol samting we yumi no save jenisim, mo harem gud long wanem we yumi gat. Ol man long wol oli ting se yumi save glad nomo sipos evri samting long laef blong yumi i rongud, be hemia i no tru. Eksampol, Jehova i talem long ol man Jiu we oli kalabus long Babilon se oli mas glad long laef we oli gat long ples ya, nating se i no isi. (Ridim Jeremaea 29:​4-7, 10.) ?Yumi lanem wanem? I gud yu traehad blong luksave ol gudfala samting we yu gat long laef blong yu mo glad long olgeta. Tingbaot se Jehova bambae i givhan long yu. (Sam 63:7; 146:5) Wan sista we nem blong hem Effie, i kasem wan bigfala kil we i mekem se hem i no moa save muv. Hem i talem se: “Jehova, famle blong mi, mo kongregesen, i givhan bigwan long mi. Mi wantem soemaot se mi glad long samting we oli mekem blong mi. Taswe mi wantem gohed blong stap glad.”

10. ?From wanem yumi save gohed blong stap glad nating se yumi fesem ol problem?

¹⁰ Nating sipos yumi o famle blong yumi i fesem plante trabol, be yumi save gohed yet blong stap glad.b (Sam 126:5) ?From wanem? From we glad i no dipen long ol samting we i stap hapen long laef blong yumi. Wan paenia we nem blong hem Maria i talem se: “Yu save gohed blong stap glad nating se yu fesem ol problem. Hemia i no min se yu holemtaet ol filing blong yu o yu neva krae. Be i min se yu no fogetem ol promes blong Jehova. Hem bambae i givhan long yumi blong stap glad nomata wanem trabol we yumi fesem.” Nating sipos ol problem we yu stap fesem oli mekem yu harem nogud tumas, be tingbaot se oli blong smoltaem nomo, olsem trak blong leg blong wan man long sanbij we i stap smoltaem nomo. I no longtaem ol problem ya bambae oli lus fulwan, mo bambae yumi no moa tingbaot bakegen.

11. ?Olsem wanem eksampol blong aposol Pol i leftemap tingting blong yu?

¹¹ ?Olsem wanem sipos yumi fesem ol problem, nao yumi stat blong gat tingting ya se Jehova i no glad long yumi? I gud yumi tingbaot eksampol blong ol narafala gudfala man blong Jehova we olgeta tu oli fesem ol trabol. Traem tingbaot eksampol blong aposol Pol. Jisas i jusumaot hem blong i tekem trutok “i go long ol nesen mo long ol king mo long ol man Isrel.” (Wok 9:15) !I wan nambawan blesing blong mekem wok ya! Be Pol i fesem plante trabol tu long laef blong hem. (2 Kor. 11:​23-27) ?Ol problem we Pol i fesem i soemaot se Jehova i no moa glad long hem? !Nogat! Pol i naf blong stanap strong long ol problem ya nomo, from we Jehova i stap givhan long hem. (Rom 5:​3-5) Yu tu yu naf blong stanap strong long ol problem we yu stap fesem, from we Jehova i stap givhan long yu. Taswe yu save sua se Jehova i glad long yu tu.

12. ?Wanem i save hapen sipos samting we yumi wantem i no kamtru?

¹² Taem samting we yumi wantem i no kamtru. (Prov. 13:12) Sipos yumi lavem Jehova mo yumi glad long ol samting we hem i mekem blong yumi, bambae yumi wantem putum ol mak blong mekem moa long wok blong hem. Be sipos sam samting i blokem yumi blong kasem ol mak we yumi putum, tingting blong yumi i save foldaon. (Prov. 17:22) Wan paenia we nem blong hem Holly i talem se: “Mi mi wantem go long Skul Blong Kingdom Ivanjelis, prij long ples we i gat moa nid, o go wok long konstraksen projek long Ramapo. Be sam samting i hapen long laef blong mi we i mekem se mi no moa naf blong kasem ol mak ya. Hemia i mekem mi harem nogud. Taem yu wantem mekem sam samting, be yu no naf blong mekem, hemia i save mekem tingting blong yu i foldaon.” Plante brata mo sista oli gat sem filing olsem.

13. Sipos yumi no naf blong mekem moa, ?wanem ol mak we yumi save putum?

¹³ ?Wanem i save givhan long yumi blong glad bakegen? Tingbaot se Jehova i no stap mekem i strong tumas long yumi. Hem i no askem yumi blong mekem samting we yumi no naf blong mekem. Mo hem i tinghae long yumi, nating sipos yumi no naf blong mekem samting we ol narafala oli mekem. Jehova i wantem se yumi holemstrong long hem mo yumi mekem samting we yumi naf blong mekem. (Maeka 6:8; 1 Kor. 4:2) Samting we i moa impoten long hem, hemia ol gudfala fasin we yumi gat, be i no ol wok we yumi mekem. Taswe yumi mas gat sem tingting olsem Jehova.c Sipos yu no naf blong mekem moa long wok blong Jehova, i gud yu putum ol mak we yu naf blong kasem. Maet yu save givhan long ol yangfala long kongregesen, leftemap tingting blong ol olfala, o go visitim, kolem, o sanem wan mesej long wan brata o sista blong talem ol gudfala toktok long hem. Taem yu traehad blong kasem ol gudfala mak olsem, bambae Jehova i blesem yu, i mekem yu glad. Mo tingbaot se long niufala wol, bambae yu naf blong mekem plante moa samting long wok blong Jehova i bitim wanem we yu save tingbaot naoia. Holly, we yumi tokbaot hem finis, i talem se: “Taem mi harem nogud, mi stap tingbaot se long fiuja bambae mi laef olwe. Long niufala wol, Jehova bambae i givhan long mi blong kasem sam long ol mak ya we mi stap tingbaot.”

14. ?Wanem narafala samting i save mekem se yumi no moa glad?

¹⁴ Fasin blong tingbaot yumi wan nomo. Long intenet, ol man oli pulum ol narafala blong gat tingting ya se blong kasem trufala glad, oli mas mekem samting we olgeta wan oli harem gud long hem. Maet yumi tu yumi stat blong gat tingting ya se sipos yumi mekem ol samting we yumi laekem, yumi pem ol samting we yumi wantem, mo travel plante, bambae yumi glad. I no rong blong mekem ol samting ya. Jehova i wokem yumi blong harem gud long ol naesfala samting we hem i wokem. Be plante man oli faenemaot se taem oli mekem ol samting we olgeta nomo oli wantem, oli no moa glad. Wan paenia we nem blong hem Eva i talem se: “Sipos impoten samting long laef blong yu, hemia blong mekem ol samting we yu wan nomo bambae yu harem gud long hem, oltaem bambae yu harem se i no naf.” Yes, fasin blong tingbaot yumi wan nomo, i save mekem se yumi harem nogud.

15. ?Yumi lanem wanem long stori blong King Solomon?

¹⁵ Stori blong King Solomon i tijim yumi se man i no save kasem trufala glad taem hem i tingbaot hem wan nomo. King Solomon i traem blong mekem evri samting we hem i wantem blong kasem glad. Hem i kakae ol naesfala kakae, i lesin long ol naesfala miusik, mo i pem plante sas samting. Be oltaem hem i harem se ol samting ya oli no naf. Hem i talem se: “Ae i no kam taed blong lukluk, mo sora i neva taed blong harem.” (Pri. 1:8; 2:​1-11) Ol man long wol oli ting se sipos oli gat plante mane mo oli mekem evri samting we oli wantem, bambae oli glad. Be hemia i no tru. Ol samting ya oli no save mekem se man i kasem trufala glad.

16. Taem yumi givhan long ol narafala, ?hemia i givhan long yumi olsem wanem? (Mo tu, yu luk ol pija.)

¹⁶ ?Wanem i save givhan long yumi blong glad bakegen? Jisas i tijim yumi se “man i harem gud moa taem hem i givim samting, i bitim we hem i kasem samting.” (Wok 20:35) Wan elda we nem blong hem Alekos i talem se: “Mi traehad blong mekem ol samting blong givhan long ol narafala. Taem mi mekem olsem, mi no tingbaot mi wan nomo, mo mi glad.” ?Yu save mekem wanem blong givhan long ol narafala? Sipos yu luk wan man i stap harem nogud, i gud yu go toktok long hem. Maet yu no naf blong stretem ol problem blong hem, be yu save leftemap tingting blong hem taem yu lesin gud long hem, yu soemaot se yu kasemsave long ol filing blong hem, mo yu pulum hem blong sakem ol hevi baden blong hem long Jehova. (Sam 55:22; 68:19) Mo tu, yu save mekem hem i tingbaot se Jehova i no lego hem. (Sam 37:28; Aes. 59:1) Maet yu save mekem wan samting blong givhan long hem, olsem blong rerem wan kakae, o mekem plan blong go wokbaot wetem hem. Maet yu save singaot hem blong i prij wetem yu, from we hemia bambae i leftemap tingting blong hem. Letem Jehova i yusum yu blong givhan long ol narafala. Taem yu tingbaot ol narafala i bitim we yu tingbaot yu wan nomo, !bambae yu kasem trufala glad!—Prov. 11:25.

17. ?Yumi mas mekem wanem blong kasem trufala glad? (Ol Sam 43:4)

¹⁷ Yumi save kasem trufala glad sipos yumi gohed blong kam klosap moa long Papa blong yumi long heven. Baebol i talem long yumi se Jehova i olsem ‘bigfala glad we yumi stap kasem.’ (Ridim Ol Sam 43:4.) Taswe nomata wanem trabol we yumi fesem long laef blong yumi, bambae yumi no wari bitim mak o fraet. !I gud yumi gohed blong lukluk i go long Jehova we i Stamba blong trufala glad!—Sam 144:15.