Lav Blong God i Stap Olwe

1-2. ?Plante Kristin tede oli fesem wanem?

TRAEM tingbaot wan bot we i stap long medel blong raf solwota. Sipos i no gat angka, bambae ol strong wef oli sakem hem i go olbaot, i go antap, mo i kam daon. Be wan angka i save mekem se bot ya i stap kwaet mo i no drif i go longwe, nating se i gat strong win.

² Taem yu fesem wan trabol, yu save gat plante defren kaen filing, yu olsem bot ya we solwota i stap saksakem olbaot. Maet wan dei, yu haremsave se Jehova i lavem yu mo i stap sapotem yu, be long nekis dei yu no sua sipos Jehova i luk ol trabol we yu stap fesem o nogat. (Sam 10:1; 13:1) Maet wan fren i talem sam gudfala toktok blong leftemap tingting blong yu, mo yu harem gud smoltaem. (Prov. 17:17; 25:11) Be biaen, yu stat blong gat tu tingting bakegen, mo maet yu ting se Jehova i no lavem yu. Long taem olsem, ?yu save mekem wanem blong angka blong yu i fas strong, we i min se yu gohed blong trastem fulwan se Jehova i lavem yu mo i stap sapotem yu?

3. ?Tok ya “lavem man oltaem” we i stap long Ol Sam 31:7 mo 136:1 i minim wanem? ?From wanem yumi talem se Jehova i beswan eksampol blong fasin blong lavem man oltaem? (Mo tu, yu luk pija.)

³ Yu save mekem angka blong yu i fas strong, taem yu tingbaot fasin blong Jehova blong lavem man oltaem. (Ridim Ol Sam 31:7; 136:1.) Tok ya “lavem man oltaem” i minim lav we i pusum man blong i fasgud long narafala mo i neva lego hem. Jehova nao i beswan eksampol long fasin blong lavem man oltaem. Baebol i se “fasin blong [Jehova] blong lavem man oltaem i bigwan tumas.” (Eks. 34:​6, 7) Mo tu, Baebol i tokbaot Jehova se: “Yu lavem tumas olgeta we oli stap singaot i kam long yu.” (Sam 86:5) Traem tingbaot: !Jehova i neva lego ol gudfala man blong hem! Taem yu tingbaot se Jehova i no save lego yu, hemia i olsem wan angka we i save givhan long yu blong stanap strong taem yu fesem wan trabol.—Sam 23:4.

TINGBAOT SE LAV WE JEHOVA I GAT LONG YUMI I WAN STAMBA TIJING

4. Talem sam eksampol blong ol stamba tijing blong Baebol, mo eksplenem from wanem yumi bilif long olgeta.

⁴ Taem yu tingbaot se lav we Jehova i gat long yumi i wan stamba tijing blong Baebol, bambae yu bilif strong se Jehova i lavem yu oltaem. Taem yu harem tok ya “wan stamba tijing blong Baebol,” ?yu tingbaot wanem? Maet yu tingbaot stamba tijing ya se nem blong God hemia Jehova, Jisas i pikinini blong God, ol dedman oli no save wan samting, mo wol ya bambae i kam wan naesfala paradaes we ol man oli save laef long hem blong olwe. (Sam 83:18; Pri. 9:5; Jon 3:16; Rev. 21:​3, 4) Taem yu kasemsave long ol tijing ya, i no gat man i save pulum yu blong gat tu tingting. ?From wanem? From yu save se ol tijing ya oli stanap long ol pruf. Naoia bambae yumi luk olsem wanem stamba tijing ya se Jehova i lavem yumi i save halpem yumi blong sakemaot tingting ya se Jehova i no kea long yumi, taem yumi fesem ol trabol.

5. ?Olsem wanem wan man i naf blong sakemaot ol giaman tijing?

⁵ Taem yu stat blong stadi Baebol, ?wanem i halpem yu blong sakemaot ol giaman tijing? Maet yu skelem samting we yu bin lanem long jej blong yu wetem samting we Baebol i rili tijim. Traem tingbaot wan eksampol: Maet bifo, yu bilif se Jisas i God Ya We i Gat Olgeta Paoa. Be taem yu stadi Baebol, maet yu askem yu wan se: ‘?Tijing ya i rili tru?’ Afta we yu jekem ol pruf long Baebol, yu kasemsave se i no tru. Nao yu sakemaot giaman tijing ya, mo yu bilif long trutok ya se Jisas i “fasbon blong olgeta samting we God i mekem,” mo i “stret Pikinini blong God, wan nomo we hem i gat.” (Kol. 1:15; Jon 3:18) I tru, ol giaman tijing oli olsem “ol strongfala haos” we oli had blong brekemdaon. (2 Kor. 10:​4, 5) Be taem yu kasemsave long trutok mo yu lego ol giaman tijing ya, yu no moa gobak long olgeta.—Fil. 3:13.

6. ?From wanem yu sua se ‘fasin blong Jehova blong lavem man oltaem i stap olwe’?

⁶ Hemia sem samting we yu save mekem sipos yu no sua se Jehova i lavem yu. Taem yu fesem wan trabol, mo yu stat blong gat tu tingting, askem yu wan se: ‘?Tingting blong mi i stret?’ Biaen, yu skelem tingting blong yu wetem ol tok blong Ol Sam 136:1 we i stamba vas blong stadi ya. I gud yu askem yu wan se: ‘?From wanem Jehova i tokbaot lav blong hem se i stap “oltaem”? ?From wanem tok ya “fasin blong hem blong lavem man oltaem i stap olwe” i kamaot 26 taem long sam ya?’ Olsem we yumi tokbaot finis, fasin blong Jehova blong lavem ol man blong hem oltaem i wan stamba tijing blong Baebol, sem mak olsem ol narafala tijing we yu kasemsave long hem long Baebol. Tingting ya se Jehova i ting nating long yu mo i no lavem yu i wan giaman tijing. !Taswe yu mas sakemaot tingting ya, sem mak olsem we yu sakemaot ol narafala giaman tijing!

7. Tokbaot sam vas we i pruvum se Jehova i lavem yu.

⁷ Long Baebol, i gat plante pruf we i soemaot se Jehova i lavem yumi. Eksampol, Jisas i talem long ol man blong hem se: “Yufala i gud moa i winim plante smol pijin.” (Mat. 10:31) Mo Jehova hem wan i talem long ol man blong hem se: “Bambae mi mekem yu yu strong, yes, bambae mi halpem yu, bambae mi holemtaet yu long raethan blong mi we i blong stret fasin.” (Aes. 41:10) Ol tok ya oli klia gud. Jisas i no talem se: ‘Maet yufala i gud moa.’ Mo Jehova i no talem se: ‘Maet bambae mi halpem yu.’ Defren olgeta, Jisas i talem se: “Yu yu gud moa.” Mo Jehova i talem se: “Bambae mi halpem yu.” Sipos yu fesem wan trabol mo yu no sua se Jehova i lavem yu, ol vas olsem oli save mekem yu harem gud, mo tu oli save givhan long yu blong bilif strong se Jehova i lavem yu. Yes, ol vas ya oli pruvum se Jehova i lavem yu. Taswe sipos yu prea mo tingting dip long ol vas ya, bambae yu naf blong talem ol semfala tok ya we i stap long 1 Jon 4:16 we i se: “God i lavem yumi, mo naoia yumi save lav ya blong hem, mo yumi bilif long hem.”a

8. ?Yu save mekem wanem sipos sam samtaem yu no sua sipos Jehova i lavem yu?

⁸ ?Olsem wanem sipos sam samtaem yu no sua yet sipos Jehova i lavem yu? Long taem olsem, i gud yu skelem filing blong yu wetem samting we yu save long saed blong Jehova. Ol filing blong yumi oli save jenis, be lav blong Jehova we Baebol i tokbaot i no save jenis. Sipos yumi no bilif se Jehova i lavem yumi, hemia i olsem we yumi ting nating long tok ya blong Baebol we i se: “God hem i lav.”—1 Jon 4:8.

TINGTING DIP LONG TOK YA SE JEHOVA I “LAVEM YUFALA”

9-10. ?Jisas i stap tokbaot wanem taem hem i talem ol tok we i stap long Jon 16:​26, 27 we i se: “Papa i lavem yufala”? (Mo tu, yu luk pija.)

⁹ Yumi save lanem plante samting long saed blong lav we Jehova i gat, taem yumi tingbaot ol tok we Jisas i talem long ol man blong hem, we i se: “Papa i lavem yufala.” (Ridim Jon 16:​26, 27.) Jisas i no jes talem ol tok ya blong mekem ol disaepol blong hem oli harem gud. Folem ol vas bifo, i klia se Jisas i no stap tokbaot filing blong ol disaepol blong hem nomo, be hem i stap tokbaot wan defren samting, hemia prea.

¹⁰ Jisas i talem long ol disaepol blong hem se oli mas prea long Jehova tru long nem blong hem, be oli no mas prea long hem. (Jon 16:​23, 24) I impoten blong oli save samting ya. Afta we Jisas i laef bakegen, maet ol disaepol oli wantem prea long hem, from we oli save gud Jisas olsem fren blong olgeta. Maet oli gat tingting ya se from we Jisas i lavem olgeta, bambae hem i lesin long wanem we oli talem, mo bambae i askem long Papa blong hem blong i halpem olgeta. Be Jisas i talem se oli no mas gat tingting olsem. ?From wanem? Hem i talem long olgeta se: “Papa i lavem yufala.” Ol tok ya i haf blong stamba tijing blong Baebol long saed blong prea. Traem tingbaot olsem wanem ol tok ya oli save givhan long yu. Taem yu stadi Baebol, hemia i givhan long yu blong save gud Jisas mo lavem hem. (Jon 14:21) Be olsem ol disaepol long faswan handred yia, yu save prea long God mo sua fulwan se hem i “lavem yu.” Evri taem we yu prea long Jehova, yu pruvum se yu bilif long ol tok ya.—1 Jon 5:14.

KASEMSAVE FROM WANEM YU GAT TU TINGTING

11. ?From wanem Setan i glad sipos yumi gat tu tingting se Jehova i lavem yumi o nogat?

¹¹ ?Wanem i save mekem se yumi gat tu tingting se Jehova i lavem yumi o nogat? Maet bambae yu ansa se: ‘Hemia Setan,’ mo hemia i tru. Devel Setan i olsem wan laeon we i wantem “kakae” yumi, mo hem bambae i glad sipos yumi no sua se Jehova i lavem yumi o nogat. (1 Pita 5:8) From we Jehova i lavem yumi, hem i givim ransom. Be Setan i wantem yumi gat tingting ya se i no stret we yumi kasem presen ya. (Hib. 2:9) ?Hu bambae i glad sipos yumi gat tu tingting? Hemia Setan. ?Mo hu bambae i glad sipos tingting blong yumi i foldaon taem yumi fesem wan trabol, nao yumi lego Jehova? Bakegen, hemia Setan. Traem tingbaot: Setan nao we Jehova i no lavem hem. Be hem i wantem mekem yumi ting se Jehova i no lavem yumi. Hemia nao wan long “ol giaman trik” we hem i stap yusum. (Efes. 6:11) Taem yumi kasemsave samting we enemi ya blong yumi i stap traem blong mekem, bambae yumi naf blong “agensem Devel.”—Jem. 4:7.

12-13. ?Olsem wanem sin we yumi kasem long Adam mo Iv i save mekem yumi gat tu tingting se Jehova i lavem yumi o nogat?

¹² I gat wan narafala samting bakegen we i save mekem yumi gat tu tingting se Jehova i lavem yumi o nogat. ?Wanem samting ya? Hemia sin we yumi kasem long Adam mo Iv. (Sam 51:5; Rom 5:12) Sin i mekem se ol man oli kam enemi blong God. Mo tu, sin i spolem tingting, hat, mo bodi blong yumi.

¹³ Sin i mekem se samtaem yumi harem se yumi gilti, yumi wari, yumi ting nating long yumi wan, mo yumi sem. Maet yumi gat ol filing ya taem yumi mekem wan sin. Be yumi save gat ol filing ya tu taem yumi tingbaot se yumi ol sinman, mo hemia i no stap long plan blong God taem hem i krietem yumi. (Rom 8:​20, 21) Sipos wil blong wan trak i flat, bambae trak ya i no save ron gud. Long sem fasin, from we yumi sinman, yumi no save mekem evri samting i stret gud olsem we Jehova i wantem fastaem. Taswe yumi no mas sapraes se samtaem yumi no sua sipos Jehova i lavem yumi o nogat. Be sipos samtaem yumi gat tingting olsem, yumi mas tingbaot se Jehova i “God ya we i gat paoa mo i stap mekem ol samting blong sapraes, . . . mo i soemaot se i lavem oltaem olgeta we oli lavem hem mo oli holemtaet ol komanmen blong hem.”—Neh. 1:5.

14. ?Olsem wanem ransom i givhan long yumi blong no gat tu tingting? (Rom 5:8) (Mo tu, yu luk bokis ya “Lukaot Gud Long ‘Sin We i Gat Paoa Blong Trikim Man.’”)

¹⁴ I tru, sam samtaem maet yumi save harem se i no stret we Jehova i lavem yumi. Blong talem stret, i tru se i no stret we Jehova i lavem yumi, mo yumi no mekem eni samting blong hem i save lavem yumi from. Be from we hem i kaen mo i lavem yumi, hem i givim ransom blong i kavremap ol sin blong yumi, taswe lav ya i rili spesel. (1 Jon 4:10) Tingbaot tu se Jisas i kam blong sevem ol man blong mekem sin, i no ol stret man. (Ridim Rom 5:8.) I no gat wan long yumi we i save mekem ol samting we i stret gud olgeta, mo Jehova i no askem yumi blong mekem olsem. Taem yumi kasemsave se sin we yumi kasem long Adam mo Iv i save mekem yumi gat tu tingting se Jehova i lavem yumi o nogat, bambae yumi gat strong tingting blong faet agensem tingting ya.—Rom 7:​24, 25.

JUSUM BLONG HOLEMSTRONG LONG GOD

15-16. Sipos yumi gohed blong holemstrong long Jehova, ?yumi save sua long wanem mo from wanem? (2 Samuel 22:26)

¹⁵ Jehova i wantem se yumi jusum blong “fasgud long hem.” (Dut. 30:​19, 20) Sipos yumi mekem olsem, yumi save sua se bambae hem i holemstrong long yumi. (Ridim 2 Samuel 22:26.) Sipos yumi gohed blong holemstrong long Jehova, yumi save trastem fulwan se bambae hem i halpem yumi long eni trabol we yumi fesem.

¹⁶ Olsem we yumi tokbaot finis, yumi gat plante risen blong stanap strong olsem we wan angka i holemtaet yumi, taem yumi fesem ol trabol. Yumi save se Jehova i lavem yumi mo bambae hem i sapotem yumi. Hemia wan stamba tijing blong Baebol. Sipos samtaem yumi gat tu tingting, i gud yumi tingting dip long samting we yumi save long saed blong Jehova, i bitim we yumi tingbaot ol filing blong yumi. I gud yumi gohed blong trastem stamba tijing ya blong Baebol se fasin blong Jehova blong lavem man oltaem i stap olwe.