Bilif Strong Se Jehova i Lavem Yu

1. ?From wanem yu givim laef blong yu long Jehova? (Mo tu, yu luk pija.)

?YU YU tingbaot taem ya we yu givim laef blong yu long Jehova? Yu mekem desisen ya from we yu save hem mo yu lavem hem. Yu promes se bambae yu putum hem fasples long laef blong yu mo yu gohed blong lavem hem long olgeta hat, sol, tingting, mo paoa blong yu. (Mak 12:30) Stat long taem ya, lav we yu gat long Jehova i stap kam strong moa. Nao sipos wan man i askem yu se, “?yu yu sua se yu lavem Jehova?” i sua se kwiktaem nomo bambae yu ansa se: “!Yes, mi mi lavem hem moa i bitim eni narafala man o eni narafala samting!”

2-3. ?Jehova i wantem se yumi bilif strong long wanem? ?Bambae yumi tokbaot wanem long stadi ya? (Jeremaea 31:3)

² ?Be olsem wanem sipos wan man i askem long yu se: “?Yu yu sua se Jehova i lavem yu?” ?Bambae yu tekem taem blong ansa from yu ting se i no stret we Jehova i lavem yu? Wan sista we i gruap long wan famle we oli no soem lav long hem, i se: “Mi save se mi lavem Jehova, mo mi sua fulwan long samting ya. Be plante taem mi no sua sipos Jehova i lavem mi.” ?Be Jehova i gat wanem tingting long yu?

³ Jehova i wantem we yu bilif strong se hem i lavem yu. (Ridim Jeremaea 31:3.) Jehova i soemaot lav ya taem hem i pulum yu yu kam long hem. Mo taem yu givim laef blong yu long Jehova mo yu baptaes, yu kasem wan samting we i rili spesel, hemia fasin blong hem blong lavem man oltaem. Hemia i min se hem i lavem yu oltaem mo bambae hem i neva lego yu. Mo lav ya i pulum hem blong luk ol man we oli wosipim hem, we hemia i minim yu tu, olsem “wan sas samting” blong hem. (Mal. 3:​17, fut.) Jehova i wantem yu sua fulwan olsem aposol Pol, se Jehova i lavem yu. Pol i talem se: “Mi mi bilif strong se i no gat samting olsem ded, laef, ol enjel, ol gavman, ol samting we oli stap naoia, ol samting we bambae oli kam, eni samting we i gat paoa, ol samting we oli hae, ol samting we oli daon olgeta, mo eni narafala samting we God i mekem, we i save tekemaot yumi long lav ya blong God.” (Rom 8:​38, 39) Long stadi ya, bambae yumi luk from wanem yumi mas trastem fulwan se Jehova i lavem yumi, mo samting we yumi mas mekem blong bilif strong long samting ya.

?FROM WANEM YUMI MAS BILIF STRONG SE JEHOVA I LAVEM YUMI?

4. ?Wanem wan long ol giaman trik blong Setan? ?Mo olsem wanem yumi save faet agensem?

⁴ Sipos yumi bilif strong se Jehova i lavem yumi, bambae yumi save faet agensem wan long “ol giaman trik” blong Setan. (Efes. 6:11) Setan bambae i mekem eni samting blong traem blokem yumi blong no moa mekem wok blong Jehova. Wan long ol giaman trik blong hem, hemia tingting ya se Jehova i no lavem yumi. Be yumi no mas foget se Setan i stap lukaot evri janis blong mekem yumi foldaon. Hem i mekem olsem taem hem i luk we yumi stap harem nogud from ol samting we yumi mekem bifo, ol problem we yumi stap fesem naoia, o taem yumi gat tu tingting long saed blong fiuja. (Prov. 24:10) Setan i olsem wan laeon we i stap lukaot janis blong kasem wan animol we i no strong. Taswe taem hem i luk we yumi stap harem nogud, hem i yusum janis ya blong stopem yumi long wok blong Jehova. Be sipos yumi gohed blong bilif strong se Jehova i lavem yumi, bambae yumi naf blong “stanap strong” agensem Setan mo ol giaman trik blong hem.—1 Pita 5:​8, 9; Jem. 4:7.

5. ?From wanem yumi mas haremsave se Jehova i lavem yumi mo i tinghae long yumi?

⁵ Sipos yumi bilif strong se Jehova i lavem yumi, bambae yumi save kam klosap moa long hem. ?From wanem yumi talem olsem? Jehova i wokem yumi wetem filing ya we yumi wantem lavem narafala mo yumi wantem we narafala i lavem yumi. Taem narafala i soemaot se i lavem yumi, yumi tu yumi lavem hem. Taswe taem yumi haremsave se Jehova i lavem yumi mo i tinghae long yumi, bambae yumi lavem hem moa. (1 Jon 4:19) Mo taem yumi lavem Jehova moa, bambae hem tu i lavem yumi moa. Baebol i talem se: “Yufala i mas kam klosap long God, nao hem bambae i kam klosap long yufala.” (Jem. 4:8) Taswe, ?olsem wanem yumi save bilif strong moa se Jehova i lavem yumi?

?WANEM I SAVE HALPEM YUMI BLONG BILIF STRONG SE JEHOVA I LAVEM YUMI?

6. Sipos yu no sua se Jehova i lavem yu, ?yu save mekem wanem?

⁶ Prea oltaem mo askem stret samting we yu wantem. (Luk 18:1; Rom 12:12) Yu save prea long Jehova plante taem long wan dei, blong hem i save halpem yu blong luk yu wan olsem we hem i luk yu. Samtaem yu save gat nogud tingting long yu wan, nao i had blong bilif strong se Jehova i lavem yu. Be tingbaot se Jehova i hae moa long hat blong yu. (1 Jon 3:​19, 20) Hem i save gud yu moa i bitim yu wan, mo hem i luk ol gudfala samting long yu we maet yu no naf blong luk. (1 Saml. 16:7; 2 Kron. 6:30) Taswe yu no mas fraet blong “talemaot” ol filing blong yu long hem, mo askem hem blong i halpem yu blong bilif strong se hem i lavem yu. (Sam 62:8) Biaen, yu save folem ol samting we bambae yumi tokbaot biaen, blong wok folem ol prea blong yu.

7-8. ?Olsem wanem buk blong Ol Sam i mekem yumi sua se Jehova i lavem yumi?

⁷ Trastem ol tok we Jehova i talem. Jehova nao i pulum ol man blong raetem Baebol. Taswe olgeta samting we oli talem blong tokbaot hem, oli tru. Traem luk olsem wanem Deved i tokbaot Jehova, i se. “Jehova i stap klosap long olgeta we hat blong olgeta i brok, hem i sevem olgeta we tingting blong olgeta i foldaon.” (Sam 34:18) Taem tingting blong yu i foldaon, yu save harem se yu stap yu wan. Be long taem olsem, Jehova i promes se hem i stap klosap long yu from we hem i luksave se yu nidim hem moa. Long wan narafala sam, Deved i raetem se: “Plis yu fulumap ol wota blong ae blong mi long skin botel blong yu.” (Sam 56:8) Jehova i luk taem yu harem nogud. Hem i rili kea long yu mo i no wantem luk we yu safa. Yumi save talem se Jehova i luk ol wota blong ae blong yu se oli rili sas, mo i stap fulumap olgeta long skin botel blong hem, sem mak olsem wan man we i stap wokbaot long draeples, i luk evri drop blong wota long skin botel blong hem se oli sas tumas. Ol Sam 139:3 i talem se: “Yu [Jehova, yu] save gud olgeta rod blong mi.” Yes, Jehova i luk olgeta samting we yu mekem, be hem i tingbaot nomo ol gudfala samting we yu mekem. (Hib. 6:10) Hemia from we hem i tinghae long olgeta samting we yu mekem, blong mekem hem i glad.a

⁸ Taem yu ridim ol gudfala vas olsem long Baebol, i olsem we Jehova i stap talem long yu se: “Mi wantem yu save se mi lavem yu tumas mo mi kea long yu.” Be olsem we yumi lanem finis, Setan i traem blong mekem yu gat tingting ya se Jehova i no lavem yu. Taswe, sipos samtaem yu gat tingting olsem, i gud yu tekem taem blong tingbaot se: ‘?Mi mi bilivim hu? ?“Papa blong ol giaman toktok,” o “God blong trutok”?’—Jon 8:44; Sam 31:5.

9. ?Jehova i mekem wanem promes long olgeta we oli lavem hem? (Eksodas 20:​5, 6)

⁹ Tingbaot filing we Jehova i gat long olgeta we oli lavem hem. Traem luk samting we Jehova i talem long Moses mo ol man Isrel. (Ridim Eksodas 20:​5, 6.) Jehova i promes long ol man we oli lavem hem se bambae hem i gohed blong lavem olgeta oltaem. Hemia i min se Jehova bambae i neva stop blong lavem ol man we oli lavem hem. (Neh. 1:5) Taswe sipos samtaem yu no sua se Jehova i lavem yu, i gud yu tekem taem blong tingbaot se: ‘?Mi mi lavem Jehova?’ Biaen, tingbaot se sipos yu lavem Jehova mo yu mekem bes blong yu blong mekem hem i glad, yu save sua se hem i lavem yu tumas. (Dan. 9:4; 1 Kor. 8:3) Yes, sipos yu sua se yu lavem Jehova, i sua se hem tu i lavem yu, mo bambae hem i neva lego yu.

10-11. ?Jehova i wantem se yu gat wanem tingting long ransom? (Galesia 2:20)

¹⁰ Tingting dip long ransom. Ransom sakrefaes blong Jisas Kraes hemia beswan presen we Jehova i givim long ol man. (Jon 3:16) ?Be yu ting se presen ya i blong yu tu? !Yes! Traem tingbaot aposol Pol. Bifo, hem i mekem plante bigfala sin, be taem hem i kam wan Kristin, hem i mas gohed yet blong faet agensem ol slak fasin blong hem. (Rom 7:​24, 25; 1 Tim. 1:​12-14) Nating se i olsem, hem i luk ransom olsem wan presen we Jehova i givim stret long hem. (Ridim Galesia 2:20.) Jehova nao i pulum Pol blong raetemdaon ol tok ya long Baebol, mo oli stap blong tijim yumi. (Rom 15:4) Ol tok ya oli soemaot se Jehova i wantem we yu luk ransom, olsem wan presen we hem i givim stret long yu. Sipos yu gat tingting olsem long saed blong ransom, bambae yu naf blong bilif strong se Jehova i lavem yu.

¹¹ Yumi glad tumas we Jehova i sanem Jisas i kam long wol blong ded from yumi. Be narafala risen we Jisas i kam long wol, hemia blong talemaot trutok long saed blong God long ol man. (Jon 18:37) Wan long ol trutok ya, hemia se Jehova i lavem ol pikinini blong hem.

JISAS I HALPEM YUMI BLONG BILIF STRONG SE JEHOVA I LAVEM YUMI

12. ?From wanem yumi save trastem evri samting we Jisas i talem blong tokbaot Jehova?

¹² Taem Jisas i stap long wol, hem i glad blong talemaot long ol narafala se Jehova i wanem kaen God. (Luk 10:22) Yumi save trastem evri samting we Jisas i talem blong tokbaot Jehova, from we hem i laef plante taosen yia wetem Jehova bifo we i kam long wol. (Kol. 1:15) Mo hem i luk olsem wanem Jehova i lavem hem mo ol narafala pikinini blong Hem long heven mo wol. ?Olsem wanem Jisas i halpem ol man blong bilif strong se Jehova i lavem olgeta?

13. ?Jisas i wantem se yumi gat wanem tingting long saed blong Jehova?

¹³ Jisas i wantem se yumi gat sem tingting olsem hem long saed blong Jehova. Long ol Gospel, Jisas i yusum tok ya “Papa” bitim 160 taem blong tokbaot Jehova. Mo taem Jisas i tokbaot Jehova long ol disaepol, hem i yusum tok ya “Papa blong yufala” o “Papa blong yufala long heven.” (Mat. 5:16; 6:26) Bifo we Jisas i kam long wol, ol gudfala man blong Jehova oli singaot Hem long ol taetel olsem ‘God Ya We i Gat Olgeta Paoa,’ ‘God Ya We i Hae Olgeta,’ mo ‘God Ya We i Wokem Olgeta Samting.’ Be plante taem, Jisas i singaot Jehova se ‘Papa.’ Tok ya i soemaot se Jehova i wantem we ol man blong hem oli haremsave se hem i stap klosap long olgeta, olsem we wan pikinini i haremsave se papa blong hem i stap klosap long hem. Yes, Jisas i tijim yumi se Jehova i lavem yumi tumas, olsem we wan papa i lavem tumas ol pikinini blong hem. I gud yumi tokbaot tu defren taem we Jisas i yusum tok ya “Papa” blong tokbaot Jehova.

14. ?Jisas i talem wanem blong soemaot se yumi wanwan i sas long ae blong Papa blong yumi long heven? (Matiu 10:​29-31) (Mo tu, yu luk pija.)

¹⁴ Fastaem, bambae yumi luk ol tok blong Jisas long Matiu 10:​29-31. (Ridim.) Ol smol pijin ya we Jisas i tokbaot bambae oli neva lavem Jehova o wosipim hem. Nating se i olsem, Papa blong yumi i tinghae long olgeta mo i save taem wan nomo i foldaon long graon. Sipos Jehova i tinghae long ol smol pijin ya, i sua se hem i kea mo i tinghae moa long yumi wanwan we i wosipim hem from we yumi lavem hem. Mo tu, Jisas i talem se Papa blong yumi i kaontem evri hea long hed blong yumi. Sipos Jehova i save evri smosmol samting long saed blong yumi, yumi sua fulwan se hem i rili kea long yumi. Yes, Jisas i wantem yumi sua fulwan se yumi wanwan i sas tumas long ae blong Papa blong yumi long heven.

15. ?Ol tok blong Jisas long Jon 6:44 oli soemaot wanem long saed blong Papa blong yumi long heven?

¹⁵ Makem wan narafala taem we Jisas i yusum tok ya “Papa.” (Ridim Jon 6:44.) Hem i talem se Papa blong yu long heven i pulum yu yu kam long trutok. ?From wanem? Hemia from we hem i luk ol gudfala fasin long hat blong yu. (Wok 13:48) Taem Jisas i talem ol tok ya long Jon 6:​44, maet hem i stap tokbaot bakegen ol tok we i stap long stamba vas blong stadi ya, we Jehova i se: “Mi mi pulum yu yu kam long mi from fasin blong mi blong lavem man oltaem [o, mi mi gohed blong soemaot long yu fasin blong mi blong lavem man oltaem].” (Jer. 31:3; fut.; skelem wetem Hosea 11:4.) Hemia i min se Papa blong yumi long heven i gohed blong luk ol gudfala fasin long yumi we maet yumi wan yumi no luk.

16. (1) ?Jisas i stap talem wanem long yumi? ?Mo from wanem yumi save bilivim ol tok blong hem? (2) ?Yu save mekem wanem blong bilif strong moa se Jehova i Papa ya we yu nidim? (Yu luk bokis ya “Wan Papa We Yumi Evriwan i Nidim.”)

¹⁶ Taem Jisas i tokbaot Jehova olsem Papa blong yumi, i olsem we hem i stap talem se: “Jehova i no Papa blong mi nomo, be hem i Papa blong yu tu. Mo mi wantem yu save se hem i lavem yu mo i rili kea long yu.” Taswe sipos samtaem yu no sua se Jehova i lavem yu, i gud yu tekem taem blong tingbaot se: ‘?I stret blong mi trastem ol tok blong Jisas we hem i save gud moa Papa blong yumi, mo oltaem i talem samting we i tru?’—1 Pita 2:22.

GOHED BLONG BILIF STRONG MOA SE JEHOVA I LAVEM YU

17. ?From wanem yumi mas gohed blong bilif strong moa se Jehova i lavem yumi?

¹⁷ Yumi mas mekem evri samting we yumi naf blong mekem, blong bilif strong se Jehova i lavem yumi. Olsem we yumi tokbaot finis, Setan bambae i yusum ol defren rod blong traem stopem yumi blong mekem wok blong Jehova. Wan rod we hem i yusum, hemia tingting ya se Jehova i no lavem yumi. !Be yumi no mas bilivim giaman tok ya blong Setan!—Job 27:5.

18. ?Yu save mekem wanem blong bilif strong moa se Jehova i lavem yu?

¹⁸ Sipos yu wantem bilif strong moa se Jehova i lavem yu, yu mas prea long Jehova blong i halpem yu blong luk yu wan olsem we hem i luk yu. Yu tingting dip long ol vas blong Baebol we oli tokbaot fasin blong Jehova blong lavem ol man. Yu tingbaot se Jehova i lavem ol man we oli lavem hem. Yu tingting dip long ransom mo tingbaot ransom olsem wan presen we Jehova i givim stret long yu. Mo i gud yu trastem se Jehova i Papa blong yu long heven, olsem we Jisas i talem. Olsem nao, sipos wan man i askem yu se, “?yu yu sua se Jehova i lavem yu?” bambae yu talem wetem strong tingting se: “!Yes, hem i lavem mi! !Mo mi tu mi mekem bes blong mi evri dei blong soemaot se mi lavem hem!”