Buk Blong Job i Save Halpem Yu Taem Yu Givim Advaes

1-2. ?Samting we ol trifala fren blong Job mo Elihu oli luk, i mekem wanem long olgeta?

TAEM Job i lusum evri samting we hem i gat, kwiktaem nomo ol man long evri ples long Is oli harem nius blong samting ya. Taem tri long ol fren blong Job, hemia Elifas, Bildad, mo Jofara, oli harem nius ya, oli go long Uj blong leftemap tingting blong Job. Be taem oli kamtru mo oli luk samting we i hapen long hem, oli sek.

² Traem pijarem samting we oli luk. Job i lusum evri samting, olsem ol sipsip, buluk, kamel, mo ol dongki blong hem. Ol pikinini mo plante long ol man blong wok blong hem oli ded evriwan, mo haos ya we ol pikinini blong hem oli bin stap long hem, i foldaon i stap. Be i no hemia nomo, bodi blong Job i fulap long ol boela. Taem ol trifala man ya oli stap wokbaot i kam, oli luk we Job i stap sidaon long asis, i stap harem nogud. ?Ale oli mekem wanem? Oli kam sidaon klosap long hem, mo blong seven dei oli no talem wan samting, nating se Job i harem nogud tumas. (Job 2:​12, 13) Biaen, Elihu we i yang moa long olgeta i kamtru mo i sidaon klosap long olgeta. Ale Job i stat blong toktok, i stap tok nogud long dei ya we hem i bon, mo i talem se i moa gud hem i ded. (Job 3:​1-3, 11) I klia se Job i nidim help. Samting we ol man ya bambae oli talem mo fasin blong olgeta blong toktok long hem, bambae i soemaot sipos oli ol trufala fren blong Job we oli kea long hem o nogat.

3. ?Bambae yumi tokbaot wanem long stadi ya?

³ Jehova i mekem se Moses i raetemdaon samting we ol trifala fren blong Job, mo Elihu oli talem mo mekem. I luk olsem se sam long ol tok blong Elifas i kamaot long wan rabis spirit. Be ol tok blong Elihu i kamaot long Jehova. (Job 4:​12-16; 33:​24, 25) Taswe, buk blong Job i gat ol gudfala advaes mo ol rabis advaes, mo i save tijim yumi olsem wanem blong givim advaes long narafala. Fastaem, bambae yumi tokbaot rabis eksampol blong ol trifala fren blong Job. Biaen, bambae yumi tokbaot gudfala eksampol blong Elihu. Mo tu, bambae yumi luk olsem wanem buk blong Job i save givhan long ol man Isrel, mo long yumi tu tede.

ADVAES BLONG OL TRIFALA FREN BLONG JOB

4. ?From wanem ol trifala fren blong Job oli no naf blong leftemap tingting blong hem? (Mo tu, yu luk pija.)

⁴ Baebol i talem se taem ol trifala fren blong Job oli harem nius blong ol trabol we i kasem hem, oli go luk hem blong ‘harem nogud wetem hem mo mekem hem i harem gud.’ (Job 2:11) Be sore tumas, oli no naf blong mekem samting ya. ?From wanem? Faswan risen hemia se oli kwik blong jajem hem. Eksampol, oli gat rong tingting ya se ol trabol we Job i kasem, hem i ol panis we hem i kasem from ol sin blong hem.a (Job 4:7; 11:14) Nambatu, plante long ol advaes we oli givim long Job i no save givhan, i no kaen, mo i spolem filing blong hem. Eksampol, i luk olsem se ol tok blong olgeta i waes, be i no save givhan. (Job 13:12) Tu taem, Bildad i talem ol tok we i no kaen taem i talem se Job i stap toktok tumas. (Job 8:2; 18:2) Mo Jofara i givim tingting ya se Job i wan “man we hed blong hem i emti.” (Job 11:12) Nambatri, nating se maet oli no tok strong long Job, be fasin blong olgeta blong toktok i daonem hem mo i mekem hem i harem nogud. (Job 15:​7-11) I klia se ol man ya oli tingbaot moa blong pruvum se Job i rong, i bitim we oli mekem hem i harem gud bakegen o mekem bilif blong hem i strong.

5. ?Advaes blong ol trifala fren blong Job i mekem hem i harem olsem wanem?

⁵ Yumi no sapraes se ol advaes blong ol trifala fren blong Job i no givhan long hem. Ol tok blong olgeta i spolem Job nomo. (Job 19:2) Hemia nao from wanem Job i harem se hem i mas pruvum se hem i stret, hem i no moa gat stret tingting, mo i talem ol tok we i no stret. (Job 6:​3, 26) Trifala fren blong Job oli no gat sem tingting olsem Jehova, mo oli no soemaot se oli sore long Job. From samting ya, Setan i yusum olgeta blong mekem tingting blong Job i foldaon. (Job 2:​4, 6) ?Olsem wanem stori ya i save givhan long ol man Isrel bifo, mo long yumi tede?

6. ?Ol elda blong Isrel oli save lanem wanem long nogud eksampol blong ol trifala fren blong Job?

⁶ ?Olsem wanem stori blong Job i save givhan long ol man Isrel? Afta we Jehova i givim ol loa long ol nesen blong Isrel, hem i putumap sam man, hemia ol elda, blong oli jajem nesen ya mo givhan long ol man blong oli folem ol loa blong hem. (Dut. 1:​15-18; 27:1) Ol man ya oli mas lesin gud long ol narafala, bifo we oli givim advaes o jajem olgeta. (2 Kron. 19:6) Mo tu, oli mas askem ol kwestin blong faenemaot stret samting we i hapen, i bitim we oli gat tingting ya se oli save evri samting finis. (Dut. 19:18) Ol man ya oli no mas tok strong long ol man we oli kam askem help long olgeta. ?From wanem? From we sipos oli soemaot se ol kros, ol man bambae oli fraet blong talemaot samting we i stap long hat blong olgeta. (Eks. 22:​22-24) Hemia nao sam long ol lesen we ol elda blong Isrel oli save lanem long stori blong Job.

7. Long nesen blong Isrel, ?hu i save givim advaes long narafala? ?Mo olsem wanem stori blong Job i save givhan long olgeta? (Ol Proveb 27:9)

⁷ Be i no ol elda blong Isrel nomo we oli save givim advaes long narafala. Nating se wan man Isrel i yangfala o i olfala, o i wan man o woman, be evriwan i save givim advaes long narafala we i nidim help blong kam gud moa long wosip blong hem o fasin blong hem. (Sam 141:5) Taem wan man i givim advaes long narafala, hemia i soemaot se hem i wan trufala fren. (Ridim Ol Proveb 27:9.) Rabis eksampol blong ol trifala fren blong Job i save givhan long ol man Isrel blong oli tingbaot samting we oli no mas talem mo mekem, taem oli givim advaes long narafala.

8. Taem yumi givim advaes, ?yumi no mas mekem wanem? (Mo tu, yu luk ol pija.)

⁸ ?Olsem wanem stori blong Job i save givhan long yumi? Yumi ol Kristin, yumi wantem givhan long ol brata mo sista taem oli fesem ol trabol. Be yumi mas lukaot gud se yumi no mekem samting we ol trifala fren blong Job oli mekem. Taswe, fastaem yumi mas meksua se yumi save stret samting we i hapen, mo yumi no kwik blong jajem narafala. Nambatu, advaes blong yumi i mas kamaot long Tok blong God, be i no long prapa tingting blong yumi olsem we Elifas i mekem. (Job 4:8; 5:​3, 27) Nambatri, yumi no mas talem ol tok we i daonem narafala o spolem olgeta. Tingbaot se Elifas mo ol fren blong hem oli talem sam samting we i tru, mo biaen aposol Pol i talem bakegen wan long ol toktok blong Elifas long wan narafala buk blong Baebol. (Skelem wetem Job 5:13 mo 1 Korin 3:19.) Nating se i olsem, plante samting we oli talem i mekem se Job i gat rong tingting long God mo i mekem hem i harem nogud, taswe Jehova i talem se oli no tok tru. (Job 42:​7, 8) Taem yumi givim advaes long narafala, yumi neva wantem mekem hem i gat tingting ya se Jehova i stap mekem i strong tumas long ol man, mo se hem i no lavem olgeta. Naoia i gud yumi luk samting we yumi save lanem long eksampol blong Elihu.

ADVAES BLONG ELIHU

9. ?From wanem Job i nidim yet we narafala i givhan long hem? ?Mo olsem wanem Jehova i givhan long hem?

⁹ Job mo trifala fren blong hem oli raorao longtaem. Toktok blong olgeta i stap long 28 japta blong Baebol, mo plante long ol samting we oli talem i soemaot se oli kros. Taswe, yumi no sapraes se Job i gohed blong harem nogud. Hem i nidim yet we narafala i leftemap tingting blong hem mo stretem hem. ?Olsem wanem Jehova i givhan long Job? Hem i yusum Elihu blong givim advaes long hem. ?From wanem Elihu i stap kwaet nomo kasem taem ya? Hem i talem se: “Mi mi yangfala nomo, mo yufala i olfala moa. Taswe mi no toktok from mi respektem yufala.” (Job 32:​6, 7) Elihu i luksave se ol olfala oli waes from we oli laef longtaem moa, mo oli gat moa ekspiriens i bitim ol yangfala. Taswe, hem i gat longfala tingting taem i lesin gud long Job mo ol fren blong hem. Be biaen, Elihu i no moa save stap kwaet, hem i talem se: “I no yia blong man nomo i mekem se man i waes, mo i no ol olfala nomo we oli kasemsave samting we i stret.” (Job 32:9) ?Elihu i talem wanem? ?Mo olsem wanem hem i talem ol tok ya?

10. ?Elihu i mekem wanem bifo we hem i givim advaes long Job? (Job 33:​6, 7)

¹⁰ Bifo we Elihu givim advaes long Job, hem i wantem mekem tingting blong Job i kwaet blong hem i glad blong lesin long ol advaes blong hem. ?Hem i mekem samting ya olsem wanem? Fastaem, Elihu i kros from ol samting we Job mo trifala fren blong hem oli talem. Be hem i meksua se tingting blong hem i kwaet, bifo we hem i toktok long Job. (Job 32:​2-5) From samting ya, hem i no talem ol tok we i daonem Job o i spolem hem. Be ol toktok blong hem i mekem Job i harem gud bakegen. Eksampol, hem i talem long Job se: “!Yu luk! Long fes blong God, mi mi sem mak long yu nomo.” (Ridim Job 33:​6, 7.) Biaen, Elihu i soemaot se hem i bin lesin gud long ol samting we Job i talem. Bifo we hem i givim advaes long Job, hem i tokbaot bakegen sam long ol samting we Job i bin talem. (Job 32:11; 33:​8-11) Mo Elihu i mekem samting ya bakegen long ol narafala taem we hem i givim advaes long Job.—Job 34:​5, 6, 9; 35:​1-4.

11. ?Olsem wanem Elihu i givim advaes long Job? (Job 33:1)

¹¹ Taem Elihu i givim advaes long Job, hem i mekem long wan fasin we i soemaot se hem i respektem hem. Eksampol, Elihu i yusum nem blong Job. Hemia wan samting we i luk olsem se ol trifala fren blong Job oli no mekem. (Ridim Job 33:1.) Maet Elihu i tingbaot se hem i bin wantem tumas blong toktok long taem we Job mo ol fren blong hem oli stap raorao. Taswe hem i givim janis long Job blong i toktok taem hem i stap givim advaes long hem. (Job 32:4; 33:32) Mo tu, Elihu i eksplenem from wanem sam long ol samting we Job i talem i no stret, mo i mekem hem i tingbaot ol gudfala fasin blong Jehova olsem waes, paoa, jastis, mo fasin blong hem blong lavem man oltaem. (Job 36:​18, 21-26; 37:​23, 24) Ating ol gudfala advaes blong Elihu i rerem tingting blong Job, blong hem i glad blong lesin long sam moa advaes we i kamaot stret long Jehova. (Job 38:​1-3) ?Olsem wanem eksampol blong Elihu i save givhan long ol man Isrel bifo, mo long yumi tede?

12. ?Olsem wanem Jehova i yusum ol profet blong givhan long ol man blong hem? ?Mo olsem wanem gudfala eksampol blong Elihu i save givhan long ol man Isrel?

¹² ?Olsem wanem stori blong Job i save givhan long ol man Isrel? Blong plante yia, Jehova i yusum ol profet blong tijim mo stretem ol man Isrel. Eksampol, long taem blong ol Jaj, Jehova i yusum woman profet ya Debora blong i givim advaes long nesen blong Isrel. Mo biaen, Jehova i yusum Samuel blong i tijim ol man Isrel, stat long taem we hem i yangfala. (Jaj. 4:​4-7; 5:7; 1 Saml. 3:​19, 20) Biaen, long taem blong ol king, Jehova i yusum plante profet blong givhan long ol man blong hem blong oli wosipim hem, mo blong stretem olgeta we oli gowe long tru wosip. (2 Saml. 12:​1-4; Wok 3:24) Eksampol blong Elihu we i stap long buk blong Job i save givhan long ol gudfala man mo woman, blong oli save samting we oli mas talem mo fasin we oli mas gat taem oli givim advaes.

13. ?Olsem wanem yumi save leftemap tingting blong ol brata mo sista long kongregesen?

¹³ ?Olsem wanem stori blong Job i save givhan long yumi? Yumi ol Kristin tu, yumi save givhan long ol narafala blong oli kasemsave long tingting blong Jehova, taem yumi talemaot ol tok we i kamaot long Baebol. Yumi save mekem olsem tu, taem yumi yusum ol toktok blong yumi blong leftemap tingting blong ol brata mo sista long kongregesen. (1 Kor. 14:3) Oltaem ol elda oli mas lukaot gud se oli “toktok blong leftemap tingting” blong ol brata mo sista, nating se sam long olgeta oli harem nogud tumas o ‘ol tok blong olgeta i olbaot nomo.’—1 Tes. 5:14; Job 6:3.

14-15. Tokbaot olsem wanem wan elda i save folem fasin blong Elihu taem hem i givim advaes.

¹⁴ Traem tingbaot eksampol ya: Wan elda i harem se wan sista long kongregesen, tingting blong hem i foldaon. Ale, hem mo wan narafala brata i go visitim hem blong leftemap tingting blong hem. Taem oli stap storian wetem hem, sista ya i talemaot se nating se hem i stap go long ol miting mo joen long wok blong prij, be hem i harem se hem i no rili glad. ?Bambae elda ya i mekem wanem?

¹⁵ Fastaem, bambae hem i traem blong kasemsave from wanem sista ya i stap harem nogud. Blong mekem olsem, hem i mas askem ol kwestin mo lesin gud long sista ya. Maet sista ya i stap harem nogud from we hem i ting se Jehova i no save lavem hem. O maet tingting blong hem i foldaon from hem i stap “wari from ol samting blong laef.” (Luk 21:34) Biaen, elda ya bambae i lukaot janis blong talem ol gudfala toktok long sista ya, maet from we hem i stap gohed yet blong kam long ol miting mo joen long wok blong prij, nating se tingting blong hem i foldaon. Ale, taem elda ya i kasemsave gud long problem blong sista ya mo risen from wanem hem i harem nogud, bambae hem i save yusum Baebol blong mekem tingting blong hem i strong se Jehova i lavem hem.—Gal. 2:20.

GOHED BLONG LANEM SAMTING LONG BUK BLONG JOB

16. ?Yumi mas mekem wanem blong buk blong Job i gohed blong givhan long yumi?

¹⁶ !Yumi save lanem plante samting long buk blong Job! Olsem we yumi tokbaot long laswan stadi, stori blong Job i tijim yumi from wanem God i letem ol man oli safa, mo olsem wanem yumi save gohed blong holemstrong long Jehova taem yumi safa. Mo long stadi ya, yumi lanem olsem wanem yumi save givim gudfala advaes long narafala, taem yumi no folem rabis eksampol blong ol trifala fren blong Job, be yumi folem gudfala eksampol blong Elihu. I gud yu tingbaot bakegen ol lesen we yumi lanem long buk blong Job, bifo we yu givim advaes long narafala. Mo sipos longtaem smol yu no ridim buk blong Job, i gud yu ridim nambawan buk ya bakegen. Sipos yu mekem olsem, bambae yu luk se ol advaes long buk blong Job i save givhan bigwan long yumi tede, sem mak olsem we i givhan long ol man bifo.