Folem Fasin Blong Jehova Blong Gat Tingting Daon

1. ?From wanem yumi sapraes se Jehova i gat tingting daon?

TAEM yu tingbaot ol haeman blong gavman tede, ?yu luk se oli gat tingting daon? Maet nogat. Be Jehova we i gat olgeta paoa, hem i gat tingting daon. (Sam 113:​5-8) I no gat wan man we i gat tingting daon moa i bitim Jehova. Long stadi ya, bambae yumi tokbaot fo nambawan fasin blong Jehova, mo luk olsem wanem ol fasin ya oli soemaot se hem i gat tingting daon. Mo tu, bambae yumi luk olsem wanem Jisas i gat tingting daon olsem Papa blong hem. Taem yumi tokbaot ol fofala fasin ya, hemia bambae i halpem yumi blong kam klosap long Jehova mo folem gud fasin ya blong hem blong gat tingting daon.

JEHOVA I WAN GOD WE OL MAN OLI NO FRAET BLONG KAM KLOSAP LONG HEM

2. ?Ol Sam 62:8 i soemaot se Jehova i wanem kaen God? (Mo tu, yu luk pija.)

² Ol man we oli praod oli ting se oli gud moa long ol narafala mo oli no kaen, taswe ol man oli fraet blong kam klosap long olgeta. Be Jehova i gat tingting daon, taswe hem i wantem se yumi kam klosap long hem mo talemaot olgeta samting we i stap long tingting mo hat blong yumi. (Ridim Ol Sam 62:8.) Olsem wan papa we i rere blong lesin long ol pikinini blong hem, Jehova i wantem lesin long prea blong ol man blong hem. Mo Jehova i mekem se oli raetemdaon plante long ol prea ya long Baebol. Hemia i soemaot se ol man oli no fraet blong kam klosap long hem. (Jos. 10:​12-14; 1 Saml. 1:​10-18) ?Be olsem wanem sipos samtaem yu harem se i no stret we yu kam klosap long Jehova?

3. ?From wanem yu save sua se Jehova i wantem we yu kam klosap long hem tru long prea?

³ Yumi save kam klosap long Jehova tru long prea nating se samtaem yumi harem se i no stret we Jehova i lavem yumi. ?From wanem yumi talem olsem? Long parabol blong boe ya we i lusum rod, Jisas i tokbaot Jehova olsem wan papa we i sore long boe blong hem we i tanem tingting blong hem mo i harem se i no stret we oli welkamem bak hem long famle. ?Papa ya i mekem wanem? Jisas i talem se taem papa ya i luk we boe blong hem i stap kambak, hem “resis i go, i putum han blong hem i goraon long boe ya, mo i kis long hem.” (Luk 15:​17-20) Jehova i olsem papa ya. Taem hem i harem prea blong olgeta we tingting blong olgeta foldaon mo oli harem nogud from we oli bin mekem wan sin, hem i rere blong lesin gud long olgeta from we hem i gat tingting daon. (Krae 3:​19, 20) Mo from we Jehova i gat sore, hem i olsem papa ya we i resis i go blong mekem olgeta oli haremgud mo oli haremsave se hem i lavem olgeta. (Aes. 57:15) Tede, ?olsem wanem Jehova i “resis i kam” long yumi? Hemia taem hem i yusum ol elda, ol memba blong famle we oli bilif, mo ol narafala brata mo sista blong leftemap tingting blong yumi. (Jem. 5:​14, 15) Jehova i yusum ol rod ya blong givhan long yumi, from hem i wantem se yumi kam klosap long hem.

4. ?From wanem ol man oli no fraet blong kam klosap long Jisas?

⁴ Jisas i folem fasin blong Papa blong hem. Hem i gat tingting daon. Taswe, taem hem i stap long wol, ol man oli no fraet blong kam klosap long hem, mo oli no fraet blong askem ol kwestin long hem. (Mak 4:​10, 11) Taem hem i askem tingting blong ol narafala, oli no fraet blong talemaot samting we i stap long hat blong olgeta. (Mat. 16:​13-16) Mo taem oli mekem mastik, oli no fraet se Jisas bambae i kros long olgeta, from oli save se Jisas i kaen, i gat sore, mo i gat longfala tingting. (Mat. 17:​24-27) Jisas i folem gud fasin blong Papa blong hem, taswe ol disaepol oli naf blong save gud Jehova. (Jon 14:9) Oli lanem se Jehova i no olsem ol lida blong skul long taem blong olgeta, we oli stap mekem i strong long ol man mo oli praod. Be hem i gat tingting daon mo i wantem se ol man oli kam klosap long hem.

5. ?Olsem wanem tingting daon i mekem se ol man oli no fraet blong kam klosap long yumi?

⁵ ?Olsem wanem yumi save folem fasin blong Jehova? Sipos yumi traehad blong gat tingting daon, bambae ol man oli no fraet blong kam klosap long yumi. Sipos yumi no gat tingting daon, bambae yumi jalus, yumi flas, mo yumi holem kros. Hemia ol fasin we i mekem se ol narafala oli fraet blong kam klosap long yumi. Be sipos yumi gat tingting daon, bambae yumi kaen, yumi gat longfala tingting, mo yumi rere blong fogivim narafala. Hemia ol fasin we i pulum ol narafala blong kam klosap long yumi. (Kol. 3:​12-14) Ol elda oli mas traehad moa blong mekem se ol narafala oli no fraet blong kam klosap long olgeta. Blong mekem olsem, oltaem oli mas spenem taem wetem ol brata mo sista. Hemia i min se oli mas traehad blong go long ol miting long Haos Kingdom, i bitim we oli joen long video konfrens. Mo tu, oli traehad blong prij wetem ol brata mo sista long ol haos wanwan. Taem ol brata mo sista oli save gud ol elda, bambae oli no fraet blong go toktok long olgeta taem oli nidim help.

JEHOVA I NO STAP MEKEM I STRONG TUMAS LONG OL MAN

6-7. Tokbaot ol eksampol we i soemaot se Jehova i rere blong jenisim tingting blong hem.

⁶ Plante taem, ol man we oli praod oli mekem i strong long ol narafala. Be Jehova i gat tingting daon, taswe hem i no mekem i strong long ol narafala mo i rere blong jenisim tingting blong hem, nating se hem i hae mo i waes moa long eni narafala man. Traem tingbaot samting we Jehova i mekem long Meriam we i sista blong Moses. Meriam mo Eron i stap komplen agensem Moses we Jehova i putumap hem. Taem Meriam i mekem olsem, hem i soem se hem i no gat respek long Jehova. Taswe, Jehova i kros long hem mo i mekem hem i kasem leprosi. Be taem Eron i askem long Moses blong i plis long Jehova blong i hilim sista blong hem, ?Jehova i mekem wanem? Sipos Jehova i praod, bambae hem i no save jenisim tingting blong hem. Be from we hem i gat tingting daon, hem i jenisim tingting blong hem mo i hilim Meriam.—Nam. 12:​1-15.

⁷ Samting we Jehova i mekem long King Hesekia i soemaot tu se hem i gat tingting daon. Jehova i yusum profet blong hem blong talemaot long king se bambae hem i ded. Be taem Hesekia i krae long Jehova blong i hilim hem, Jehova i sore long hem mo i mekem hem i laef 15 yia moa. (2 King 20:​1, 5, 6) Yes, Jehova i gat tingting daon, taswe hem i gat sore mo i rere blong jenisim tingting blong hem.

8. ?Wanem ol eksampol we i soemaot se Jisas i no mekem i strong long ol man? (Mak 3:​1-6)

⁸ Jisas i folem fasin blong Papa blong hem. Taem Jisas i stap long wol, hem i no mekem i strong long ol man. Eksampol, hem i hilim ol man long Sabat dei, nating se sam man oli talem se i no stret. (Ridim Mak 3:​1-6.) Tede, Jisas i hed blong Kristin kongregesen mo i gohed yet blong soemaot se hem i no mekem i strong long ol man. Eksampol, taem wan long kongregesen i mekem bigfala sin, hem i gat longfala tingting mo i givim janis long hem blong i tanem tingting blong hem.—Rev. 2:​2-5.

9. ?Yumi soemaot olsem wanem se yumi no mekem i strong long ol man, mo yumi rere blong lego prapa tingting blong yumi? (Mo tu, yu luk ol pija.)

⁹ ?Olsem wanem yumi save folem fasin blong Jehova? Yumi mas gat tingting daon, mo traehad blong no mekem i strong long ol man mo rere blong lego prapa tingting blong yumi. (Jem. 3:17) Eksampol, ol perens we oli no mekem i strong long pikinini blong olgeta, i no min se oli letem olgeta oli mekem eni samting nomo. Mo i no minim tu se oli askem pikinini blong i mekem samting we hem i no naf blong mekem. Wan gudfala eksampol hemia long stori blong Jekob long Jenesis 33:​12-14. Ol perens we oli gat tingting daon mo oli no mekem i strong long ol pikinini blong olgeta, oli tingbaot se wanwan pikinini i defren, mo oli no komperem wan wetem narawan. Ol elda tu oli no mas mekem i strong long ol man mo oli mas rere blong lego prapa tingting blong olgeta. Oli mekem olsem, taem oli rere blong folem desisen we bighaf blong ol elda oli agri long hem, sipos i no agensem ol rul blong Baebol. (1 Tim. 3:​2, 3) Mo yumi evriwan i save traehad blong kasemsave long tingting blong ol narafala, nating sipos yumi gat defren tingting. (Rom 14:1) Yes, evriwan long kongregesen i mas traehad blong soemaot long olgeta man se oli “no stap mekem i strong tumas long ol narafala.”—Fil. 4:5.

JEHOVA I GAT LONGFALA TINGTING

10. ?Olsem wanem Jehova i soem se hem i gat longfala tingting?

¹⁰ Maet yu luk se ol man we oli praod oli flas, mo oli no gat longfala tingting blong wet. !Be Jehova i gat longfala tingting i bitim eni narafala man! Eksampol, long taem blong Noa, Jehova i talem se bambae hem i wet 120 yia bifo we hem i spolem ol man nogud. (Jen. 6:3) Taswe, Noa i gat taem blong tijim ol pikinini blong hem, mo biaen oli bildim wan bigfala sip. Plante yia biaen, Jehova i gat longfala tingting long Ebraham, taem hem i stap askem kwestin long saed blong tufala taon ya Sodom mo Gomora, we Jehova i talem se bambae hem i distroem. Sipos Jehova i praod, bambae hem i save talem se: ‘!Yu no gat raet blong askem kwestin long mi!’ Be from we Jehova i gat tingting daon, hem i gat longfala tingting long Ebraham.—Jen. 18:​20-33.

11. Folem 2 Pita 3:​9, ?from wanem Jehova i gohed blong gat longfala tingting?

¹¹ Tede tu, Jehova i gohed blong gat longfala tingting. Hem i stap wet long stret taem we hem i makemaot finis blong finisim rabis sistem blong wol ya. ?From wanem hem i gat longfala tingting? Hemia “from we hem i no wantem se wan man i ded, hem i wantem se olgeta man oli tanem tingting blong olgeta.” (Ridim 2 Pita 3:9.) ?Olsem wanem? ?Longfala tingting blong Jehova i blong nating nomo? !Nogat! Tede, plante milian man we hat blong olgeta i stret oli stap kam klosap long Jehova. Mo yumi hop se plante moa milian man bambae oli mekem olsem. Be longfala tingting blong Jehova i gat mak blong hem. Jehova i lavem ol man, be bambae hem i no letem olgeta oli mekem eni samting nomo we oli wantem. Bambae hem i no letem ol rabis man oli gohed blong stap long wol ya.—Hab. 2:3.

12. ?Olsem wanem Jisas i folem fasin blong Papa blong hem blong gat longfala tingting?

¹² Jisas i folem fasin blong Papa blong hem. Blong plante taosen yia, Jisas tu gat longfala tingting. Jisas i luk we Setan i stap talem ol giaman tok blong spolem Jehova mo ol gudfala man blong hem. (Jen. 3:​4, 5; Job 1:11; Rev. 12:10) Mo tu, Jisas i luk ol samting we i stap mekem ol man oli safa bigwan. !I sua se Jisas i wantem tumas blong “brekemdaon ol wok blong Devel”! (1 Jon 3:8) ?Be wanem i givhan long Jisas blong i gat longfala tingting mo i wet kasem stret taem ya we Jehova i makemaot blong i brekemdaon fulwan ol wok blong Devel? Hemia tingting daon. Taswe, hem i save se Jehova nomo bambae i talem stret taem blong finisim rul blong Setan.—Wok 1:7.

13. ?Olsem wanem Jisas i soemaot se hem i gat longfala tingting long ol aposol blong hem, mo from wanem hem i mekem olsem?

¹³ Taem Jisas i stap long wol, hem i gat longfala tingting tu long ol aposol blong hem. Eksampol, taem ol aposol oli stap raorao bakegen mo bakegen se hu long olgeta i hae moa, Jisas i no taed long olgeta, be hem i gat longfala tingting long olgeta. (Luk 9:46; 22:​24-27) Hem i trastem se sloslo bambae oli jenisim fasin blong olgeta. ?Yu tu yu stap mekem sem mastik bakegen mo bakegen? Sipos yes, ating yu glad se King blong yumi i gat tingting daon mo longfala tingting.

14. ?Olsem wanem yumi save lanem blong gat longfala tingting?

¹⁴ ?Olsem wanem yumi save folem fasin blong Jehova? Taem yumi traehad blong gat “tingting blong Kraes,” bambae yumi naf blong gat sem tingting olsem Jehova mo folem fasin blong hem. (1 Kor. 2:16) ?Olsem wanem blong gat tingting blong Kraes? Wan rod nomo hemia taem yumi ridim ol fofala Gospel. Biaen, yumi mas tekem taem blong tingting dip mo luk olsem wanem ol stori ya oli soemaot tingting we Jisas i gat long ol defdefren samting. Mo tu, yumi mas prea mo askem Jehova blong i givhan long yumi blong gat tingting daon mo longfala tingting olsem Jisas. Taem yumi traehad blong gat tingting blong Kraes, bambae yumi naf blong gat longfala tingting olsem Jehova long ol brata mo sista mo long yumi wan.—Mat. 18:​26-30, 35.

JEHOVA I TINGHAE LONG OL MAN WE OL NARAFALA OLI TING NATING LONG OLGETA

15. Tokbaot sam eksampol we i soemaot se Jehova i tinghae long ol man we ol narafala oli ting nating long olgeta. (Ol Sam 138:6)

¹⁵ Ridim Ol Sam 138:6. !I wan bigfala ona we Hae Masta blong heven mo wol i tinghae long ol man we ol narafala oli ting nating long olgeta! Traem tingbaot eksampol blong sam man we ol narafala oli ting nating long olgeta, be Jehova i tinghae long olgeta. Maet samfala yumi no save olgeta, be Jehova i meksua se nem blong olgeta i stap long Baebol. Jehova i pulum Moses blong raetemdaon nem blong wan woman, hemia Debora, we hem i stap wok blong famle blong Aesak mo Jekob blong samwe 125 yia. Nating se yumi no save gud Debora, be Jehova i meksua se Moses i raetemdaon sam samting long Baebol, we i soemaot se Jekob mo famle blong hem i rili lavem hem. (Jen. 24:59; 35:​8, fut.) Plante handred yia afta, Jehova i jusumaot Deved, we i wan yang boe blong lukaot long sipsip, mo i mekem hem i kam king blong Isrel. (2 Saml. 22:​1, 36) Mo smoltaem afta we Jisas i bon, God i sanem ol enjel i go long ol man blong lukaot long sipsip, blong talemaot long olgeta se Mesaea i bon long Betlehem. (Luk 2:​8-11) Mo taem Josef mo Meri i tekem Jisas i go long tempol, Jehova i soemaot se hem i tinghae long Simeon mo Ana, taem hem i soemaot Boe blong hem long tufala. (Luk 2:​25-30, 36-38) !Yes, “nating se Jehova i hae, be hem i tingbaot man we i gat tingting daon”!

16. ?Olsem wanem Jisas i soem se hem i tinghae long ol man, olsem Jehova?

¹⁶ Jisas i folem fasin blong Papa blong hem. Jisas i tinghae long ol man we oli gat tingting daon. Taswe, hem i tijim trutok long saed blong Kingdom blong God long ol man we oli ‘no skul gud mo oli man olbaot nomo.’ (Wok 4:13; Mat. 11:25) Mo tu, Jisas i hilim ol man we oli sik mo i mekem oli haremsave se hem i lavem olgeta mo i respektem olgeta. (Luk 5:13) Long naet bifo we Jisas i ded, hem i mekem wok blong wan slef taem hem i wasem leg blong ol aposol blong hem. (Jon 13:5) Mo bifo we hem i go long heven, hem i soemaot se hem i tinghae long ol disaepol blong hem we oli gat tingting daon mo long olgeta we bambae oli kam ol disaepol blong hem long fiuja, taem hem i givim wan impoten wok long olgeta, hemia blong halpem ol man blong oli kasem laef we i no save finis.—Mat. 28:​19, 20.

17. ?Olsem wanem yumi soemaot se yumi tinghae long ol narafala? (Mo tu, yu luk pija.)

¹⁷ ?Olsem wanem yumi save folem fasin blong Jehova? Yumi soemaot se yumi tinghae long ol man, taem yumi talemaot gud nius long eni man we i glad blong lesin, nating se kantri o kala blong skin blong hem i defren, o hem i skul gud o nogat. Mo yumi soemaot se yumi tinghae long ol brata mo sista taem yumi luk olgeta se oli hae moa long yumi, nating sipos yumi gat gudhan blong mekem sam samting, o yumi gat sam spesel wok long oganaesesen. (Fil. 2:3) Jehova i glad taem yumi gat tingting daon mo yumi “faswan” blong ona long ol narafala.—Rom 12:10; Sef. 3:12.

18. ?From wanem yu wantem gat tingting daon olsem Jehova?

¹⁸ Taem yumi traehad blong gat tingting daon olsem Papa blong yumi long heven, bambae ol narafala oli no fraet blong kam klosap long yumi, yumi no mekem i strong long ol narafala, mo yumi gat longfala tingting. Mo tu, bambae yumi soemaot se yumi tinghae long ol narafala, olsem we Jehova i mekem. Taem yumi traehad blong folem fasin blong Jehova blong gat tingting daon, bambae yumi kam sas moa long ae blong hem.—Aes. 43:4.