?Yu Save Mekem Wanem Blong Mared Blong Yu i Givim Ona Long Jehova?

1-2. ?Jehova i wantem se dei blong mared blong yu i olsem wanem?

?YU YU stap frenem wan boe o wan gel, mo yutufala i agri finis blong mared? Sipos yes, !hemia i nambawan tumas! Mo ating yu bisi naoia blong mekem ol plan blong mared. Jehova tu i intres long dei ya. Hem i wantem se yu glad long dei blong mareda blong yu, mo yu gat wan hapi laef wetem hasban o waef blong yu.—Prov. 5:18; Sing 3:11.

² I impoten tumas se ol samting we yu mekem long dei blong mared blong yu, i givim ona long Jehova. ?From wanem yumi talem olsem? ?Mo yu save mekem wanem blong dei ya i givim ona long Jehova? Nating se stadi ya i go long olgeta we oli stap mekem ol plan blong mared, be ol poen insaed i save halpem yumi evriwan blong givim ona long Jehova sipos yumi joen long wan mared, o sipos oli askem tingting blong yumi long saed blong ol plan blong mared.

?FROM WANEM DEI BLONG MARED BLONG YU I MAS GIVIM ONA LONG JEHOVA?

3. Ol Kristin we oli stap mekem ol plan blong mared, ?oli mas tingbaot wanem mo from wanem?

³ Ol Kristin we oli stap plan blong mared oli mas tingbaot ol stamba trutok we Jehova i putum long Baebol. ?From wanem? From we Jehova nao hem i Stamba blong mared. Hem nao i mekem faswan mared, taem i tekem Iv i kam long Adam mo i blesem tufala. (Jen. 1:28; 2:24) Taswe, olgeta we oli stap mekem plan blong mared, oli mas tingbaot se dei ya i mas givim ona long Jehova.

4. ?From wanem yu mas tingbaot tingting blong Jehova taem yu stap mekem ol plan blong mared?

⁴ Yu gat wan narafala risen blong tingbaot tingting blong Jehova taem yu stap plan from mared blong yu: Hem i Papa blong yu mo i Besfren blong yu. (Hib. 12:9) I gud yu tingbaot samting ya oltaem. Yu no wantem mekem eni samting long dei ya o long eni narafala dei we i save mekem se Fren blong yu Jehova i harem nogud. (Sam 25:14) Taem yu tingbaot ol samting we Jehova i mekem finis blong yu mo ol samting we bambae hem i mekem long fiuja, i sua se yu wantem tumas se dei ya i givim ona long Jehova.—Sam 116:12.

?YU SAVE MEKEM WANEM BLONG GIVIM ONA LONG JEHOVA?

5. ?Olsem wanem Baebol i save halpem ol Kristin we oli stap mekem plan from mared blong olgeta?

⁵ Baebol i no talem evri samting we wan Kristin i mas mekem o i no mas mekem long dei blong mared blong hem. Wanwan Kristin i save mekem desisen folem samting we hem i wantem, kastom blong hem, mo ples we hem i stap long hem. Mo tu, hem i mas tingbaot ol loa we gavman i putum. (Mat. 22:21) Sipos ol desisen blong hem oli folem ol stamba trutok blong Baebol, hemia bambae i givim ona long Jehova mo i mekem hem i glad. Taswe, ?wanem ol stamba trutok we yu mas tingbaot?

6. ?From wanem ol Kristin we oli plan blong mared oli mas folemgud ol loa we gavman i putum?

⁶ Obei long ol loa we gavman i putum. (Rom 13:​1, 2) Long plante kantri, gavman i putum ol loa we olgeta we oli plan blong mared oli mas folem. Taswe, ol Kristin ya oli mas faenemaot wanem loa we gavman i putum long ples blong olgeta. Sipos yu gat eni kwestin long saed ya, i gud yu go askem help long ol elda.b

7. ?Mared blong yu i mas olsem wanem?

⁷ Mekem se dei ya i leftemap nem blong Jehova. (1 Kor. 10:​31, 32) I gud yu traehad blong soemaot ol fasin we i haf blong frut blong tabu spirit, olsem nao ol man we oli kam long mared blong yu tu bambae oli save soemaot ol fasin ya. (Gal. 5:​19-26) Folem stamba trutok ya blong Baebol se hasban i hed blong famle, boe we bambae i mared, hem nao i mas meksua se ol samting we i hapen long dei ya i mekem ol man oli glad mo i leftemap nem blong Jehova. ?Olsem wanem blong mekem samting ya? Sipos wan brata i mekem wan tok blong mared we i stanap long Baebol long wan fasin we i soemaot respek mo lav, evriwan bambae oli kasemsave se mared i wan presen we i kam long Jehova mo i wan impoten samting. Taswe, plante Kristin oli jusum blong mared long Haos Kingdom. Sipos yu plan blong mared long Haos Kingdom, i gud yu raetem leta kwiktaem i go long bodi blong elda.

8. ?Yu save mekem wanem blong lafet blong mared blong yu i leftemap nem blong Jehova? (Rom 13:13)

⁸ Ridim Rom 13:13. Sipos yu jusum se afta long mared bambae i gat wan lafet, ?olsem wanem yu save blokem spirit blong wol? Grik tok we oli tanem i kam “rabis lafet” [o “wael lafet,” fut.] i stap tokbaot wan lafet we ol man oli dring bitim mak mo miusik i gohed kasem let long naet. Sipos yu jusum se bambae i gat alkol long taem ya, meksua se bambae i no gat man i dring bitim mak.c Sipos i gat miusik, i gud yu meksua se volium blong miusik i no laod tumas we i blokem ol man blong storian. Mo tu, i gud we yu jekemgud ol miusik we yu jusum, blong meksua se ol toktok blong hem i no mekem narafala i stambol.

9. ?Yu mas tingbaot wanem long saed blong ol toktok mo ol samting we bambae oli wajem long lafet blong mared blong yu?

⁹ Long sam ples, ol fren mo famle blong tufala we i mared oli save talem sam toktok long saed blong tufala. Mo tu, oli save wajem wan video o ol pija blong tufala o mekem sam narafala samting. Hemia i save mekem se dei ya i spesel. Be i gud yu meksua se ol samting ya oli leftemap tingting blong evriwan. (Fil. 4:8) Taswe, i gud yu askem yu wan se: ‘?Samting ya bambae i pulum ol man blong respektem ol narafala? ?Bambae i pulum ol man blong tinghae long mared?’ Mo kwestin we i moa impoten se: ‘?Samting ya bambae i givim ona long Jehova?’ Nating se i oraet nomo blong sam man oli talem sam fani samting, be i gud oli meksua se ol samting we oli talem i no pulum ol man blong tingbaot seks. (Efes. 5:3) Mo sipos ol famle mo fren oli wantem talem sam toktok, i gud oli askem long yu fastaem sipos samting we oli wantem talem i stret o nogat.

10. ?From wanem ol Kristin oli mas gat tingting daon taem oli stap plan from mared blong olgeta? (1 Jon 2:​15-17)

¹⁰ Gat tingting daon. (Ridim 1 Jon 2:​15-17.) Jehova i glad taem ol man blong hem oli lukaot rod blong givim ona long hem, i bitim we oli wantem pulum ol narafala blong oli leftemap olgeta. Taswe, ol Kristin we oli gat tingting daon oli no spenem tumas mane o ‘flas from ol samting we oli gat mo soemaot.’ ?Wanem gudfala samting i kamaot taem yu no mekem mared blong yu i bigwan tumas? Traem luk eksampol blong Mike, wan brata blong Nowei. Hem i se: “Mitufala i no gat tumas kaon mo mitufala i naf blong gohed long wok blong paenia. Nating se mared blong mitufala i smol nomo, be i naes mo mitufala i no save fogetem taem ya.” Tabitha, wan sista blong India, i se: “Taem mitufala i mekem mared blong mitufala i smol, hemia i mekem se mitufala i no gat tumas samting blong wari from, plan from, mo tokbaot wetem ol famle.”

11. ?Olsem wanem klos mo hea blong tufala we i mared i soemaot se tufala i gat tingting daon? (Mo tu, yu luk ol pija.)

¹¹ ?Yu yu jusum finis wanem klos bambae yu werem? I sua se yu wantem luk naes. Long taem bifo tu, man mo woman we i mared i wantem luk naes long dei ya. (Aes. 61:10) Maet klos we yu werem long dei blong mared blong yu bambae i defren long ol klos we yu werem long ol narafala taem. Be yu mas meksua se ol klos ya oli stret mo oli soemaot respek. (1 Tim. 2:9) Yu no mas letem stael blong klos o hea i kam impoten samting long mared blong yu.—1 Pita 3:​3, 4.

12. ?From wanem ol Kristin we oli plan blong mared oli mas sakemaot eni kastom we i no laenap wetem Baebol?

¹² Sakemaot ol kastom we oli no laenap wetem Baebol. (Rev. 18:4) Plante mared tede oli folem ol kastom we i joen wetem ol giaman skul mo rabis spirit. Jehova i talem klia se yumi mas stap longwe long ol kaen kastom olsem. (2 Kor. 6:​14-17) Sipos i gat sam kastom long ples blong yu we yu no sua gud long olgeta, i gud yu faenemaot se ol kastom ya oli kamaot olsem wanem mo samting we Baebol i talem long saed ya, bifo we yu jusum blong folem ol kastom ya long mared blong yu.

13. ?Olsem wanem tufala we i mared i save gat sem tingting olsem Jehova long ol presen we tufala i kasem?

¹³ Long ples blong yu, ?ol man oli gat fasin ya blong givim presen long olgeta we oli mared? Maet presen blong olgeta we oli kam long mared blong yu bambae i dipen nomo long hamas mane we oli gat. Yumi ol Kristin yumi lanem se i gud blong givim presen mo yumi glad taem yumi mekem olsem. (Prov. 11:25; Wok 20:35) Be yumi no wantem mekem ol man oli harem se oli mas givim presen, o mekem oli sem se presen blong olgeta i smol. Yumi folem fasin blong Jehova taem yumi glad nomo long eni presen we man i givim long gladhat blong hem.—2 Kor. 9:7.

BLOKEM OL TINGTING WE I NO STRET

14. ?Wanem ol had desisen we tufala we i wantem mared i mas mekem?

¹⁴ Sipos yu wantem se mared blong yu i givim ona long Jehova, maet i had blong mekem sam desisen. Eksampol, maet i had blong mekem plan blong wan mared we i smol. Charlie, we i blong Solomon Aelan, i talem se: “I had blong jusum hu i save kam long lafet blong mared. Mitufala i gat plante fren, mo long kalja blong mifala, evriwan i ting se oli save kam long kakae blong mared.” Tabitha, we yumi tokbaot hem finis, i se: “Long ples blong mi, oltaem oli mekem ol bigfala lafet blong mared. I tekem taem blong perens blong mitufala i agri long desisen blong mitufala blong invaetem samwe 100 man nomo.” Sarah, we i blong India, i talem se: “Sam man oli mekem bigfala mared from oli wantem se ol man oli tingbaot olgeta. Ol kasen blong mi oli spenem plante mane blong mekem bigfala mared, taswe ol narafala oli traem fosem mi blong mi mekem mared blong mi i bigwan moa i bitim olgeta.” ?Wanem i save givhan long yu blong winim ol tingting olsem?

15. ?From wanem prea i impoten taem yu stap mekem ol plan blong mared?

¹⁵ Prea long Jehova taem yu stap mekem ol plan blong mared. Yu save talemaot evri filing blong yu long Jehova mo evri samting we yu stap fesem. (Fil. 4:​6, 7) Yu save askem hem blong i halpem yu blong mekem ol gudfala desisen, blong yu no wari tumas, mo blong yu gat strong tingting. (1 Pita 5:7) Taem yu luk se Jehova i ansarem ol prea blong yu, bambae yu trastem hem moa. Tabitha, we yumi tokbaot hem finis, i se: “Mi wetem boefren blong mi i wari long saed blong ol defdefren tingting we mitufala mo ol famle i save gat. Taswe oltaem mitufala i prea bifo we mitufala i tokbaot ol plan blong mared. Mitufala i haremsave se Jehova i halpem mitufala mo mifala evriwan i gat pis.”

16-17. ?From wanem i gud blong storian gud tugeta taem yufala i stap mekem ol plan blong mared?

¹⁶ Tok stret be long wan fasin we i kaen. (Prov. 15:22) Bambae yutufala i mas mekem plante desisen from mared blong yutufala. Yutufala i mas jusum dei blong mared, hamas mane blong yusum, hu blong invaetem, mo plante narafala samting bakegen. Bifo we yutufala i mekem wan desisen, i gud yutufala i talemaot ol tingting blong yutufala, mo tokbaot ol stamba trutok mo ol gudfala advaes we yutufala i kasem long ol brata mo sista we oli bigman long Kristin fasin. Taem yutufala i stap talemaot ol tingting blong yutufala, i gud yutufala i toktok kaen, gat stret tingting, mo rere blong jenisim tingting blong yutufala. Sipos ol memba blong famle, eksampol ol perens blong yutufala oli talem sam gudfala tingting, i gud yutufala i lesin long olgeta, from we hemia i wan spesel taem blong olgeta tu. Be sipos yutufala i harem se tingting blong olgeta i no stret, yutufala i save eksplenem from wanem yutufala i no agri, be yutufala i talem long wan fasin we i kaen. (Kol. 4:6) I gud yutufala i eksplenem klia long ol famle se yutufala i wantem we mared blong yutufala i givim ona long Jehova.

¹⁷ Sipos perens blong yutufala i no stap long trutok, maet i had blong yutufala i eksplenem ol desisen blong yutufala long olgeta, be yutufala i naf blong mekem. Santhosh, wan brata long India i talem se: “Ol famle blong mitufala oli wantem we mitufala i folem sam kastom blong Hindu long mared blong mitufala. I tekem taem blong mitufala i eksplenem desisen blong mitufala long olgeta. Mo mitufala i folem tingting blong olgeta long ol samting we i no go agensem tingting blong Jehova. Eksampol, mitufala i folem tingting blong olgeta long saed blong ol kakae we mifala i kakae long taem blong mared. Mo mitufala i mekem desisen se bambae i no gat eni singsing o danis, from we olgeta oli no stap mekem ol samting ya.”

18. ?Yutufala i save mekem wanem blong evri samting i go gud long dei blong mared? (1 Korin 14:40) (Mo tu, yu luk pija.)

¹⁸ Mekem wan gudfala plan. Sipos yu plan gud, bambae yu no wari tumas long dei blong mared blong yu. (Ridim 1 Korin 14:40.) Wayne we i blong Taewan, i talem se: “Sam dei bifo long mared, mitufala i gat wan smol miting wetem olgeta we oli glad blong givhan long taem ya. Ale, mitufala i tokbaot long olgeta ol plan blong mitufala, mo mifala i praktis tugeta long sam samting we bambae i hapen long dei ya, blong meksua se evri samting bambae oli go gud.” Blong soem se yutufala i respektem ol man we oli kam long mared, i gud yutufala i mekem bes blong yutufala blong mekem samting long stret taem.

19. ?Yu save mekem wanem blong lafet blong mared blong yu i leftemap nem blong Jehova?

¹⁹ Yu save blokem plante problem sipos yu tingbaot fastaem ol problem we oli save hapen long dei blong mared. (Prov. 22:3) Eksampol, sipos long ples blong yu eni man nomo i ting se hem i save kam long lafet blong mared, i gud yu tingbaot samting we yu save mekem blong blokem samting ya. I gud yu talemaot tingting blong yu long ol famle we oli no stap long trutok, mo yu eksplenem tingting we yu gat long sam kastom blong mared we i no stret. Yu save tokbaot haf ya “?Olsem Wanem Ol Witnes Blong Jehova Oli Mekem Mared?” we i stap long jw.org. Mo blong givhan long yu, yu save askem wan brata we i bigman long ol Kristin fasin blong i mekem wok ya olsem “bos blong lafet.” (Jon 2:8) Yu save eksplenem klia long hem ol plan blong yu, olsem nao bambae hem i save givhan long yu blong meksua se evri samting i go gud olsem we yu wantem mo i leftemap nem blong Jehova.

20. ?Tufala we bambae i mared i mas tingbaot wanem long saed blong dei blong mared blong tufala?

²⁰ Maet yu wari tumas taem yu stap mekem ol plan blong mared blong yu. Be i gud yu tingbaot se hemia i blong wan dei nomo. Hemia hem i stat nomo blong wan niufala laef we bambae yutufala i mekem wok blong Jehova tugeta. Taswe, i impoten we yutufala i mekem mared blong yutufala i smol mo i leftemap nem blong Jehova. I gud yu trastem Jehova. Wetem help blong hem, bambae yu naf blong mekem wan plan blong mared we taem yu luklukbak, bambae yu harem gud, yu glad long ol gudfala memori, mo yu no rigret.—Sam 37:​3, 4.