Leta Blong Hed Kampani

OLSEM Jisas, yumi prea long God wetem fulhat blong yumi se: “Nem blong yu i tabu.” Yumi wantem tumas blong mekem laef blong yumi i laenap wetem prea ya. Yumi soemaot samting ya taem yumi laef olsem ol Witnes blong Jeova. I no naf blong save nem blong God nomo, be yumi mas mekem sam samting moa tu. Yumi mas tekem evri janis blong leftemap nem ya. Yes, blong karem nem ya Witnes blong Jeova, hemia i wan ona we i bigwan bitim ol narafala ona we yumi save kasem.—Mat. 6:9; Aes. 43:10.

Folem Ol Sam 110:3, ol man blong Jeova oli glad blong joen long wok ya we God i talem long olgeta blong mekem. Long ol man mo woman ya, sam oli pikinini, sam oli yangfala, sam oli olfala, mo oli kamaot long ol defdefren ples. ?From wanem oli yusum paoa mo laef blong olgeta long wok blong prij? Faswan risen, hemia from lav we oli gat long God mo wosip we oli mekem i go long hem. Dutronome 6:5, 6 i talem long yumi blong lavem Jeova wetem ‘olgeta tingting, laef, mo paoa’ blong yumi. Lav ya we i kamaot long hat blong yumi, i pusum yumi blong yusum taem, paoa, mo olting blong yumi blong sapotem ol wok blong Kingdom. Hemia i minim tu se nomata wanem samting i hapen long laef blong yumi, be yumi mas joen fulwan long wok blong prij.

Jeova i lavem ol man. Mo hem i soemaot lav ya taem hem i talem long ol man blong hem blong oli go talemaot gud nius blong Kingdom blong hem long olgeta ples long wol. Hem i no wantem se bambae wan man i lus, be i wantem se olgeta man oli tanem tingting blong olgeta from sin blong olgeta mo oli kam long Hem blong oli kasem laef. (2 Pita 3:9) Jeova i talem se: “Mi mi no glad nating blong luk wan man nogud i ded long sin blong hem. Mi wantem luk we hem i tanem tingting blong hem, i lego ol sin blong hem, nao bambae i laef i stap.” (Esik. 33:11) Taem yumi joen long wok blong prij, hemia i stap soemaot se Jeova i lavem olgeta man. Hemia samting we i givim glad mo i mekem yumi haremgud taem yumi joen long impoten wok ya.

Mo tu, yumi soemaot bigfala lav long Jeova taem yumi tinghae long Tok blong hem, Baebol. Sipos i no gat Baebol, bambae yumi no save God mo yumi no save kam klosap long hem, olsem Jemes 4:8 i askem blong yumi mekem. Bambae yumi no save kasem save tu se from wanem yumi stap laef mo wanem samting bambae i hapen long fiuja. Bambae yumi no kasem save se ol trabol we yumi stap kasem oli fol blong faswan bubu blong yumi, Adam. (Rom 5:12) Mo tu, bambae yumi no save long bigfala lav blong God taem hem i givim Pikinini blong hem, wan nomo we hem i gat, olsem ransom blong sevem yumi. Long plante defren rod, Jeova i serem sam haf blong save blong hem, waes, mo fasin blong hem blong kasem save, long yumi. !Yumi tinghae tumas long presen ya we hem i givim long yumi, hemia Tok blong hem we tabu spirit i pusum ol man blong oli raetem! Tangkiu we yumi gat from nambawan presen ya i pulum yumi blong “yusum evri janis” blong ridim, stadi, mo tingting dip long ol tok blong hem. (Efes. 5:15, 16; Sam 1:1-3) Yumi neva mas harem nogud from we yumi mas spenem taem evri dei blong ridim Tok blong God. Defren olgeta, lav we yumi gat long God i mas pulum yumi blong wantem ridim Tok blong hem, nao bambae yumi kasem save moa long hem mo mekem lav ya i kam dip moa.

Yumi lanem long Baebol se Adam i mekem sin agens long Jeova. Hem i mekem olgeta pikinini blong hem, hemia i minim tu wanwan long yumi, oli stap long wan trabol we i no gat rod blong kamaot long hem. Nating se i olsem, God i naf mo i mekem wan rod blong ol man oli kamaot long trabol ya, hem i meksua se stamba tingting blong hem long saed blong wol ya i kamtru.—Gen. 3:15.

I tru se yumi evriwan i wantem tumas blong mekem gudfala nem blong God ya blong yumi i kam tabu. Taem yumi stap save moa olsem wanem God Jeova i gud tumas, hemia i pusum yumi blong wokgud wetem hem mo wetem ogenaesesen blong hem, blong mekem ol man oli save long haenem mo stamba tingting blong hem. Yumi save trastem se bambae hem i glad long yumi mo i blesem yumi naoia mo long niufala wol long fiuja, gogo i no save finis.

Mifala long Hed Kampani, mifala i wantem talem bakegen long yufala ol brata mo sista, se mifala i lavem yufala. Mo tu, mifala i wantem talem bigfala tangkiu from hadwok blong yufala blong yusum smoltaem we i stap yet bifo long “bigfala trabol” ya, blong kasem plante moa man wetem gud nius. (Rev. 7:14) Taem yufala i mekem olsem, yufala i givim sem janis ya long olgeta we yufala i bin gat, hemia blong kasem save long God mo Jisas Kraes. Save ya bambae i lidim man blong kasem laef we i no save finis.—Jon 17:3.

Ol brata blong yufala,

Hed Kampani Blong Ol Witnes Blong Jeova