Leta Blong Hed Kampani
Yufala Ol Gudfala Witnes Blong Jeova:
!Mifala i glad tumas blong talem halo long yufala ol gudfala brata mo sista! Mifala i gat sem filing olsem aposol Jon we i talem se hem i “lavem” ol brata sista blong hem mo hem i glad se oli “stap wokbaot long trutok.” (2 Jon 1, 4, NW) !Yes, i wan blesing long yumi evriwan blong stap long trutok! Trutok i mekem yumi fri long Bigfala Babilon mo ol tijing mo kastom blong hem we oli no givim ona long God. Fasin blong obei long God i halpem yumi blong kam ol man we yumi gat lav, kaen fasin mo sore. Mo trutok i openem rod blong yumi stap klin long fes blong God, mo yumi gat janis blong laef olwe.
!Yumi tangkiu bigwan long Jeova from spirit blong hem we i stap lidim yumi mo givim paoa long yumi evri dei! Mifala i sua se yufala i bin glad blong lanem long Distrik Asembli ya “Letem Spirit Blong God i Lidim Yu,” ol defdefren rod we Jeova i yusum blong lidim yumi wetem spirit blong hem. From we ol samting long wol ya bambae oli gohed blong kam moa nogud, yumi mas dipen long paoa no spirit blong Jeova we i bigwan tumas, blong i lidim yumi blong gotru long ol lasdei blong wol ya we oli stap yet.
Mifala i sua se taem yufala i ridim ol stori blong ol brata we oli kasem plante trabol from bilif blong olgeta, we Yearbook i tokbaot, samting ya i rili tajem hat blong yufala. Mo i gud tumas blong tingbaot se plante long olgeta ya we oli holemstrong long bilif, hemia olgeta we oli jes baptaes i no longtaem, mo sam narafala we oli no baptaes yet. !Yumi laekem olgeta ya tumas from we oli stap tru long Jeova mo oli holemstrong long stret fasin! Yes, nambawan eksampol blong olgeta i givim paoa long yumi, blong yumi gat strong tingting blong gohed blong stap tru long Kingdom, nomata wanem trabol i kasem yumi.—1 Tes. 1:6-8.
Ol gudfala brata mo sista, mifala i save se yufala i kasem plante problem long saed blong ekonomi mo long plante narafala haf blong laef blong yufala, mo yufala i mas traehad blong winim olgeta blong mekem se famle blong yufala i holemstrong long Jeova. I no isi long sam blong yufala blong joen long wok blong talemaot Kingdom mo blong kam long ol miting blong kongregesen oltaem. Hemia nao from wanem, afta we mifala i prea mo storian plante, mifala i mekem sam jenis long saed blong ol miting blong kongregesen stat long Jenuware 1, 2009. Mifala i sua se bambae yufala i yusum gud taem ya long fasin we i waes, mo bambae yufala i spenem moa taem blong mekem prapa stadi blong yufala wanwan mo wetem famle blong yufala.
Long olgeta asembli blong yia ya, yumi evriwan i glad tumas blong luk plante niuwan oli baptaes. Plante long olgeta ya oli yangfala. I stret nomo blong talem ol gudfala toktok long yufala ol papa mo mama, from we yufala i tijimgud ol pikinini blong yufala blong oli laekem trutok. Mo tu, yufala i leftemap tingting blong olgeta blong oli givim laef blong olgeta i go long Jeova, blong mekem wok blong hem long yangtaem blong olgeta. Ol yangfala ya oli kasem plante traem long skul, be nating, oli kasem mak ya blong baptaes. Hemia i soemaotgud we papa mama blong olgeta i bin tijim mo trenemgud olgeta.—Sam 128:1-6.
Mifala i wantem tokbaot tu wok blong tijim ol man. I gud tumas blong luk we namba blong ol Baebol stadi i kam antap bigwan. Ol misinari mo spesel paenia blong yumi oli wok had, mo olgeta nao, oli mekem bighaf blong wok ya blong tijim man. Mifala evriwan long Hed Kampani, mifala i tinghae long bigfala wok we ol brata sista raon long wol oli mekem blong singaot olgeta we hat blong olgeta i stret. Oli talem long olgeta ya se: “Yu kam.” Mo oli singaot olgeta we oli tosta blong oli “kam tekem wota ya blong laef, we i olsem presen” blong olgeta. (Rev. 22:17) !Mifala i glad tumas blong welkamem 289,678 niufala brata mo sista blong yumi we oli baptaes long yia ya we i jes finis!
I gud tumas blong gohed blong tingbaot oltaem ol tok blong aposol Jon, we i se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) !Yes yumi laef klosap tumas long taem ya we wol ya bambae ‘i lus’! Yumi waes sipos yumi yusum laef blong yumi fulwan blong mekem ol samting we God i wantem yumi blong mekem mo blong ‘lukaot gud oltaem.’ (Mat. 24:42) Bambae yumi neva sore sipos yumi mekem olsem, mo bambae Jeova i soem lav we i kaengud long yumi taem hem i givim plante blesing long yumi.—Aes. 63:7.
Mifala i hop se ol gudfala stori we i stap insaed long Yearbook ya, bambae i leftemap tingting blong yufala evriwan blong putum ol wok blong Kingdom long fasples long laef blong yufala. Mifala i wantem talem long yufala se oltaem mifala i stap tingbaot yufala mo prea from yufala, mo mifala i lavem yufala tumas. Jeova bambae i blesem yufala bigwan.
Ol brata blong yufala,
Hed Kampani Blong Ol Witnes Blong Jeova