?Man We Spirit Blong God i Lidim Hem i Olsem Wanem? ?Hem i Mas Joen Long Wan Skul?

Ansa we Baebol i givim

Baebol i soemaot se man we spirit blong God i lidim, hem i wantem tumas blong mekem God i glad mo blong gat tingting blong God. Hem i folem ol loa blong God long laef blong hem, mo i folem rod we tabu spirit i soemaot.a—Rom 8:5; Efesas 5:1.

Plante taem Baebol i soemaot se man we spirit i lidim hem i olsem wanem, taem i tokbaot man we spirit i no lidim hem. Wan eksampol, Baebol i talem se, “man we i gat tingting blong man nomo, hem i no akseptem ol samting we oli kamaot long spirit blong God,” hemia ol tijing blong God. (1 Korin 2:14-16) Ol man we oli gat tingting blong man nomo, oli no gat gladhat blong givim presen mo oli no mekem pis, be oli ‘jalus mo oli raorao.’ (1 Korin 3:1-3) Mo olgeta we oli giaman blong spolem nem blong narafala mo oli seraotem ol gudfala fren, “oli gat fasin olsem animol, oli no gat tabu spirit.”—Jud 19; Ol Proveb 16:28.b

Long atikol ya

• ?Wanem i mekem se yumi wantem we God i lidim yumi?

• ?From wanem i impoten we spirit blong God i lidim yumi?

• ?Olsem wanem mi save letem spirit blong God i lidim mi?

• ?Mi mas joen long wan skul?

• Ol rong tingting

• Ol vas blong Baebol

?Wanem i mekem se yumi wantem we God i lidim yumi?

Yumi wantem se God i lidim yumi from we God i mekem yumi long pija blong hem. (Jenesis 1:27) Taswe, bighaf blong ol man oli wantem mo oli intres long ol samting we oli no save luk o tajem.

Yumi bon wetem fasin ya we yumi naf blong soemaot ol gudfala fasin blong Jehovac God, olsem pis, sore, mo mekem i sem mak long olgeta man. (Jemes 3:17) Mo tu, God i givim tabu spirit long olgeta we oli traehad blong obei long ol komanmen blong hem.—Ol Wok 5:32.

?From wanem i impoten we spirit blong God i lidim yumi?

Sipos yumi letem spirit blong God i lidim yumi, yumi save kasem ‘laef mo pis.’ (Rom 8:6) Ol presen ya we God i givim oli sas moa i bitim eni narafala presen.

• Laef: God i promes blong givim laef we i no save finis long ol man we oli letem spirit blong hem i lidim olgeta.—Jon 17:3; Galesia 6:8.

• Pis: Hemia i minim pis we yumi gat wetem God. Olgeta we oli tingbaot ol samting long saed blong bodi nomo, oli enemi blong God. (Rom 8:7) Mo tu, olgeta we oli letem spirit blong God i lidim olgeta, oli kasem “pis ya blong God we i bigwan tumas i bitim olgeta save blong yumi.” (Filipae 4:6, 7) Pis ya we i stap long hat, i halpem olgeta blong harem gud long laef blong olgeta.—Matiu 5:3.

?Olsem wanem mi save letem spirit blong God i lidim mi?

• Kasem save mo obei long ol loa blong God. Yu save mekem olsem taem yu ridim Baebol, we i fulap long ol tingting blong God. “Tabu spirit i putum tok ya [blong Baebol] long tingting” blong ol man we oli raetemdaon. (2 Pita 1:21) Samting we yu lanem bambae i halpem yu blong wosipim God “long spirit mo long trutok,” i min se tabu spirit bambae i lidim yu blong mekem samting we God i wantem.—Jon 4:24.

• Prea blong askem help blong God. (Luk 11:13) God bambae i halpem yu blong soemaot ol fasin blong man we spirit blong God i lidim hem. (Galesia 5:22, 23) Mo tu, hem i save givim waes we yu nidim blong winim ol hadtaem long laef.—Jemes 1:5.

• Joen wetem ol man we oli letem spirit i lidim olgeta. Olgeta ya bambae oli halpem yu blong lanem blong folem spirit blong God long laef blong yu. (Rom 1:11, 12) Be sipos yu joen wetem ol man we tingting blong olgeta i defren long tingting blong God, hemia i save mekem se yu go longwe moa long hem.—Jemes 4:4.

?Mi mas joen long wan skul?

Sipos yu joen long wan skul, hemia i no min se spirit blong God i stap lidim yu. Baebol i talem se: “Sipos man i ting se hem i man blong wosipim God, be hem i no kontrolem tang blong hem, hem i stap giaman long hem wan. Wosip blong man ya i blong nating nomo.”—Jemes 1:26.

Nating se i olsem, Baebol i soemaot se taem spirit blong God i lidim wan man, bambae hem i mekem wosip long fasin we God i glad long hem. Ol man olsem oli agri se i gat “wan spirit” nomo, hemia tabu spirit blong God we i pulum olgeta blong wosipim God olsem “wan bodi,” i min se olsem wan grup we i ‘wan nomo long spirit, mo pis i mekem olgeta i joen gud.’—Efesas 4:1-4.

Ol rong tingting

Rong tingting: God i wokem evri samting wetem fasin ya we i letem hem i lidim olgeta.

Trutok: Evri samting we God i wokem i givim ona long hem. (Ol Sam 145:10; Rom 1:20) Be ol man nomo oli save lanem blong letem God i lidim olgeta. Ol animol oli defren, oli folem fasin we oli bon wetem, mo oli no save lanem blong fren wetem God. Ol aksen blong olgeta oli stanap long samting we bodi nomo i wantem. (2 Pita 2:12) Taswe Baebol i soemaot se fasin blong man we spirit blong God i lidim hem, i defren olgeta long man we i gat tingting mo fasin olsem animol.—Jemes 3:15; Jud 19.