?Baebol i Talem Wanem Long Saed Blong Ol Fren?
Ansa we Baebol i givim
Ol fren oli save givhan long yu blong yu gat wan gudfala laef we i hapi. Ol gudfala fren oli pulum yu blong mekem bes blong yu mo blong kam gud moa long ol fasin blong yu.—Ol Proveb 27:17.
Be Baebol i makem se yu mas jusum gud ol fren blong yu. Hem i givim woning se sipos yu jusum ol rabis fren, bambae yu kasem trabol. (Ol Proveb 13:20; 1 Korin 15:33) Ol rabis fren oli save pulum yu blong mekem ol krangke desisen, mo oli save spolem ol gudfala fasin blong yu.
Long atikol ya
?Wan gudfala fren i olsem wanem?
Baebol i tijim se yu no mas fren gud wetem narafala nomo from we hem i laekem sem samting olsem yu o yutufala i laekem blong mekem sem samting. Ol Sam 119:63 i talem se: “Mi mi wan fren blong olgeta we oli fraet long yua mo blong olgeta we oli stap obei long ol tok blong yu.” Makem se man blong raetem Sam ya i jusum ol fren we oli fraet blong mekem God i harem nogud, mo oli wantem folem ol rul blong hem.
Mo tu, Baebol i talem ol fasin we wan gudfala fren i gat, olsem:
“Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.
“I gat sam fren we oli rere nomo blong spolem ol fren blong olgeta bakegen, be i gat wan fren we i klosap moa long yu i winim ol brata blong yu.”—Ol Proveb 18:24.
Ol vas ya oli tijim yumi se wan gudfala fren i stap tru long yumi, i lavem yumi, i kaen, mo i gat gladhat blong givim samting. Wan gudfala fren i givhan long yu long ol gudfala taem mo long taem we yu gat trabol tu. Mo tu, hem i no fraet blong talem long yu se yu stap folem wan rod we i no stret, o desisen we yu wantem mekem i no waes.—Ol Proveb 27:6, 9.
Samfala long Baebol we oli fren gud
Baebol i tokbaot samfala we oli fren gud, nating se oli gat defdefren yia, oli kamaot long defdefren kaen laef, kalja, o posisen. Traem tingbaot sam long olgeta.
Rut mo Naomi. Rut i mared long boe blong Naomi. Naomi i olfala moa long Rut, mo tufala i kamaot long defdefren kalja. Nating se i olsem, tufala i fren gud mo tufala i lavlavem tufala.—Rut 1:16.
Deved mo Jonatan. Nating se Jonatan i gat 30 yia moa long Deved, be Baebol i talem se Deved mo Jonatan “i kam gudfala fren.”—1 Samuel 18:1.
Jisas mo ol aposol. Jisas i tija mo masta blong ol aposol, taswe hem i gat wan posisen we i hae moa long olgeta. (Jon 13:13) Be hem i no gat tingting se oli daon tumas nao hem i no save fren wetem olgeta. Jisas i fren gud wetem olgeta we oli folem ol tijing blong hem. Hem i talem se: “Mi singaotem yufala se ol fren, from we mi mi talemaot long yufala evri samting we mi harem long Papa blong mi.”—Jon 15:14, 15.
?Yu save kam fren blong God?
Yes, ol man oli save kam fren blong God. Baebol i talem se: “Hem i fren gud wetem ol man we oli gat stret fasin.” (Ol Proveb 3:32) Hemia i min se, God i glad blong fren wetem olgeta we oli traehad blong mekem i stret, oli gudfala man, mo oli traem folem ol rul blong hem long laef blong olgeta. Wan eksampol, hemia Ebraham, we i gat strong bilif, mo Baebol i talem se God i singaot hem se fren blong hem.—2 Kronikel 20:7; Aesea 41:8; Jemes 2:23.
a Ol vas raonabaot long Sam ya oli soemaot se tok ya “yu” i minim God.