Wan Haeman Blong Helt i Talem Se Sosol Media i Stap Spolem Ol Yangfala—?Baebol i Talem Wanem?

Long 23 Mei 2023, wan haeman we i wok long saed blong helt long Yunaeted Stet, i givim woning long ol man se sosol media i stap spolem plante yangfala.

• “Nating se maet sosol media i save givhan long sam pikinini mo yangfala, be i gat plante pruf tu we i soemaot se sosol media i save spolem helt mo tingting blong olgeta.”—Social Media and Youth Mental Health: The U.S. Surgeon General’s Advisory, 2023.

Risej we oli mekem i soemaot from wanem yumi mas lukaot gud.

• Ol yangfala we oli gat 12 kasem 15 yia mo “we oli spenem bitim 3 aoa evri dei long sosol media, i isi moa blong sosol media i spolem tingting blong olgeta, nao oli kasem ol sik olsem dipresen mo wari bitim mak.”

• Ol yangfala we oli gat 14 yia mo we oli “spenem plante taem long sosol media, oli no save slip gud, oli ting se bodi mo fes blong olgeta i no naes mo oli gat nogud tingting long olgeta wan. Mo samting ya i hapen moa long ol gel i bitim ol boe.”

?Olsem wanem ol perens oli save protektem ol pikinini blong olgeta long ol denja ya? Baebol i givim ol gudfala advaes.

Samting we ol perens oli save mekem

Tekem aksen. Ol perens, faenemaot ol denja blong sosol media mo mekem desisen sipos i stret we pikinini blong yu i yusum o nogat.

• Advaes blong Baebol: “Yu trenem wan yangfala long rod we hem i sud folem.”—Ol Proveb 22:6, futnot.

• Blong lanem moa, ridim atikol ya “?I Stret Blong Letem Pikinini Blong Mi i Yusum Sosol Media?”

Sipos yu letem pikinini blong yu i yusum sosol media, luksave ol denja mo givhan long hem blong i yusum sosol media long fasin we i waes. ?Olsem wanem blong givhan long hem?

Protektem pikinini blong yu long ol nogud samting. Trenem pikinini blong yu blong i luksave ol nogud samting mo i stap longwe long olgeta.

• Advaes blong Baebol: “Yufala i no mas tokbaot nating enikaen doti fasin blong seks, mo enikaen doti samting, mo toktok blong yufala i no mas soemaot se yufala i griri, . . . yufala i no mas mekem ol fasin blong sem, mo yufala i no mas talem ol krangke tok mo ol tokplei we oli doti.”—Efesas 5:3, 4.

• Yu save faenem ol gudfala advaes long atikol ya “Tijim Tineja Blong i Stap Sef Long Sosol Media.”

Putum sam rul. Eksampol, putum ol rul long saed blong wetaem mo hamas taem pikinini i save yusum sosol media.

• Advaes blong Baebol: “Yufala i mas lukaot gud olsem wanem yufala i wokbaot, . . . [yufala i mas wokbaot] olsem ol man we oli waes, yufala i yusum gud taem blong yufala.”—Efesas 5:15, 16.

• Yusum katun ya we man i droem Yu Mas Waes Taem Yu Gat Ol Fren Long Intenet blong halpem pikinini blong i kasem save from wanem yu putum sam rul.