?Raf Fasin Blong Ol Teroris Bambae i Finis Samtaem?

Taem i gat wan teroris atak, maet yu askem se: ‘?God i rili kea? ?From wanem ol samting olsem oli stap hapen? ?Bambae i gat wan taem we i no moa gat ol trabol we ol terorisa oli mekem? ?Olsem wanem mi save winim filing ya blong fraet?’ Ansa blong ol kwestin ya i stap long Baebol.

?Wanem tingting blong God long wok blong ol teroris?

God i no laekem nating fasin blong faet mo wok blong ol teroris. (Ol Sam 11:5; Ol Proveb 6:16, 17) Jisas, we i wok long nem blong God, i tok long ol disaepol blong hem taem oli mekem raf fasin. (Matiu 26:50-52) Samfala oli talem se oli atakem narafala long nem blong God, be God i no givim raet long olgeta blong mekem fasin olsem. Blong talem stret, hem i no lesin nating long prea blong olgeta.—Aesea 1:15.

God i kea long olgeta we oli safa, hemia ol man tu we ol teroris oli atakem. (Ol Sam 31:7; 1 Pita 5:7) Mo Baebol i talem se God bambae i finisim ol raf fasin.—Aesea 60:18.

Stamba blong raf fasin blong ol teroris

Baebol i soemaot wanem ya stamba blong raf fasin blong ol teroris, i se: “Sam man oli bos mo ol narafala man we oli stap aninit long olgeta, oli stap harem nogud.” (Prija 8:9) Long ol yia we oli pas, ol man we oli gat paoa oli mekem wok blong ol teroris blong bos long narafala. Mo samfala we oli harem nogud from ol aksen blong olgeta, oli yusum fasin blong teroris blong givimbak.—Prija 7:7.

En blong raf fasin blong ol teroris

God i promes se bambae hem i finisim ol samting we oli mekem yumi fraet mo ol raf fasin, mo bambae i putum pis long fulwol. (Aesea 32:18; Maeka 4:3, 4) Bambae hem i:

Tekemaot stamba blong raf fasin blong ol teroris. Long fulwol, gavman blong God bambae i tekem ples blong rul blong man. Jisas Kraes, we i Hed blong gavman ya, bambae i mekem i stret long evriwan, mo bambae hem i finisim ol faet mo ol fasin blong spolem narafala. (Ol Sam 72:2, 14) Long taem ya, bambae i no moa gat ol teroris. Ol man “bambae oli glad tumas from oli gat pis we i bigwan tumas.”—Ol Sam 37:10, 11.
Tekemaot ol nogud samting we ol teroris oli mekem long ol man. God bambae i mekem bodi mo tingting blong ol man we ol teroris oli spolem olgeta, i kamgud bakegen. (Aesea 65:17; Revelesen 21:3, 4) Hem i promes tu blong mekem ol dedman oli laef bakegen long wol ya we bambae i gat pis long hem.—Jon 5:28, 29.

Baebol i soemaot se i no longtaem bambae God i tekem aksen. Be maet yu askem se: ‘?From wanem God i no tekem aksen finis?’ Blong kasem ansa blong kwestin ya, plis lukluk video ya ?From Wanem God i Letem Ol Man Oli Safa?

a Klosap oltaem, “wok blong ol teroris” i minim raf fasin agensem ol man blong mekem olgeta oli fraet, o blong jenisim sam samting long saed blong politik, ol skul, o long komuniti. Be maet samfala oli no ting se wan samting we i hapen i wok blong teroris.

Baebol i givhan long man blong fesem trabol olsem

Hemia tufala samting we Baebol i talem se i save givhan.

Prea long God.—Filipae 4:6, 7.
Tingbaot ol tok blong Baebol we i givim hop.—Hibru 6:19.

Blong kasem moa advaes blong Baebol, luk haf ya “?Olsem Wanem Blong Kontrolem Wari?”

Ol Witnes blong Jehova we oli fesem trabol ya, oli kasem help blong ol Kristin brata mo sista. Hemia tufala eksampol:

Natalya mo boe blong hem Aslan we i gat naen yia, tufala i stap long wan skul long Beslan, Rasia, nao ol teroris we oli holem masket oli kam insaed mo oli holemtaet bitim 1,000 long skul ya. Sore tumas, plante handred oli ded, we bighaf blong olgeta oli pikinini. Natalya mo Aslan i no ded, be tufala i trabol long tingting mo filing blong tufala blong longtaem. Luk wanem i givhan long tufala blong kamgud bakegen.
Pablo mo Sofi i lusum boe blong tufala long atak long Twin Taoa long Niu Yok. Lukluk video blong faenemaot wanem i givhan long tufala mo sam narafala we wok blong ol teroris i spolem olgeta.