Ol Ami Blong Rasia Oli Atakem Yukren

Long eli moning long 24 Februari 2022, ol ami blong Rasia oli atakem Yukren, nating se plante lida blong wol oli traehad blong blokem wo. ?Olsem wanem faet ya bambae i afektem fulwol? Sam dei i pas, sekretari jenerol blong Yunaeted Nesen, António Guterres, i talem se: “Yumi no naf blong tingbaot olsem wanem wo ya bambae i mekem ol man oli safa mo spolem ol ples, mo mekem ol man long Yurop mo long fulwol oli no moa sef.”

Folem Baebol, ?wanem mining blong samting ya?

• Jisas Kraes i talem se “bambae ol nesen oli faet agensem ol narafala nesen, mo ol kingdom oli faet agensem ol narafala kingdom.” (Matiu 24:7) Ridim atikol ya “?Wanem Saen Blong ‘Ol Las Dei’ o ‘En Blong Wol’?” blong luk olsem wanem ol wo tede oli stap mekem profet tok blong Jisas i kamtru.

• Buk blong Revelesen i tokbaot wan ‘hos we i red olsem faea,’ mo man we i ron long hem i “tekemaot pis long wol.” Hemia wan pijatok we i minim wo. (Revelesen 6:4) Ridim atikol ya “Ol Fo Man Ya Long Hos ?Oli Hu?” blong luk olsem wanem ol wo tede oli mekem profet tok ya i kamtru.

• Buk blong Daniel i tokbaot “king blong not” mo “king blong saot,” mo i talem se tufala bambae i agensem tufala. (Daniel 11:25-45) Wajem video ya Ol Profet Tok We Oli Kamtru Finis—Daniel Japta 11 blong faenemaot from wanem Rasia mo ol kantri we oli fren blong hem oli king blong not.a

• Mo tu, Revelesen i tokbaot “faet long bigfala dei blong God Ya We i Gat Olgeta Paoa.” (Revelesen 16:14, 16) Be hemia i no wan wo olsem we yumi luk naoia long wol. Ridim atikol ya “?Wanem Ya Faet Blong Amagedon?” blong faenemaot moa long saed blong faet ya long fiuja.

?From wanem yumi save tingbaot wan gudfala fiuja?

• Baebol i talem se God bambae i “finisim ol wo long olgeta ples long wol.” (Ol Sam 46:9) Ridim atikol ya “Trufala Hop Blong Wan Gudfala Fiuja” blong lanem moa long ol promes blong God long saed blong fiuja.

• Jisas i tijim ol man blong hem blong prea se Kingdom blong God bambae i kam. (Matiu 6:9, 10) Kingdom ya i wan gavman long heven we bambae i mekem wil blong God i kamaot long wol, nao bambae i gat pis long fulwol. Blong save olsem wanem blong kasem ol blesing blong Kingdom ya, wajem video ya ?Wanem Ya Kingdom Blong God?

I gat bitim 129,000 Witnes blong Jehova long Yukren. Olsem Jisas, olgeta ya wetem ol narafala Witnes long wol oli no joen nating long politik mo oli no faet long ol wo. (Jon 18:36) Long fulwol, ol Witnes blong Jehova oli gohed blong talemaot “gud nius ya blong Kingdom” olsem ansa blong ol problem long wol, hemia problem blong wo tu. (Matiu 24:14) Mifala i invaetem yu blong kontaktem mifala blong kasem save moa long hop we Baebol i givim.