Faet Long Yukren i Gohed Bitim Wan Yia Finis ?Baebol i Givim Wanem Hop?

Fraede, 24 Februari 2023, i makem wan yia we rabis faet i stat long Yukren. Sam ripot oli talem se samwe long 300,000 soldia blong Yukren mo Rasia oli ded o oli kasem kil, mo samwe long 30,000 man mo woman we oli no soldia, olgeta tu oli ded long faet ya. Be maet hemia i no ol stret namba, maet i gat plante moa.

Sore tumas, i luk olsem se faet ya bambae i no finis yet.

• “Klosap wan yia finis, ol soldia blong Rasia oli kam insaed long Yukren. Be i no gat wan saen yet se bambae faet ya i finis. I no luk olsem se wan long tufala saed ya bambae i win, mo oli no wantem mekem pis tu.”—NPR (National Public Radio), 19 Februari 2023.

Plante man oli harem nogud from we faet ya mo ol narafala faet raon long wol oli stap mekem ol man oli safa. ?Baebol i givim wanem hop? ?Bambae faet i finis samtaem?

Wan faet we bambae i finisim olgeta faet

Baebol i tokbaot wan faet we bambae i no spolem ol man, be bambae i sevem olgeta. Nem blong faet ya hemia Amagedon, mo Baebol i talem se oli mekem faet ya “long bigfala dei blong God Ya We i Gat Olgeta Paoa.” (Revelesen 16:14, 16) Long faet ya, bambae God i finisim olgeta gavman blong man we oli stap mekem ol faet blong spolem ol narafala. Blong lanem olsem wanem Amagedon bambae i mekem se i gat pis blong olwe, plis ridim ol atikol ya:

• “?Wanem Ya Faet Blong Amagedon?”

• “!Amagedon—Wan Gudfala Nius!”