Wol i Stap Long Denja From We i Hot Tumas ?Baebol i Talem Wanem?

Long Julae 2022, long plante ples long wol, tempreja i hae moa i bitim olgeta yia bifo:

• “Tu taem long manis ya, olgeta long meteo long Jaena oli givim woning se long 70 taon, i gat denja from we ples i hot tumas.”—25 Julae 2022, CNN Wire Service.

• “From we i hot bitim mak long Yurop, ol faea blong bus oli stap spolem plante kantri.”—17 Julae 2022, The Guardian.

• “Long Sande, long plante taon long Is Kos blong Yunaeted Stet mo sam ples long Saot mo Wes, i hot bitim olgeta taem bifo.”—24 Julae 2022, The New York Times.

?Hemia i minim wanem? ?Bambae wol ya i kam hot tumas blong yumi laef long hem? ?Baebol i talem wanem?

?Hot ya i mekem profet tok blong Baebol i kamtru?

Yes. Hot ya i laenap wetem ol samting we Baebol i talem se bambae i hapen long taem blong yumi. Wan profet tok blong Jisas i talem se bambae yumi luk “ol samting blong fraet,” o “ol narakaen samting we oli mekem man i fraet bitim mak.” (Luk 21:11; Good News Translation) Taem wol i stap kam hot moa, plante oli fraet se ol samting we man i stap mekem bambae i spolem wol fulwan.

?Bambae ol laef samting long wol ya i finis?

Nogat. God i wokem wol ya blong i kam hom blong man blong olwe. (Ol Sam 115:16; Prija 1:4) Bambae hem i no letem ol man oli spolem wol ya fulwan, be hem i promes se bambae hem i “spolem ol man ya we oli stap spolem wol.”—Revelesen 11:18.

Tingbaot tu narafala profet tok we oli soemaot ol promes blong God:

• “Draeples mo graon we i drae we i drae bambae tufala i harem gud, mo draeples bambae i glad mo i gat plante flaoa long hem olsem flaoa ya safron.” (Aesea 35:1) God bambae i no letem wol ya i kam wan draeples we i no gat wan samting i save laef long hem, be bambae hem i mekem gud bakegen ol ples long wol we oli kam nogud.

• “Yu yu lukaot gud long wol ya, yu mekem i karem plante frut mo i rij gud.” (Ol Sam 65:9) God bambae i blesem wol ya mo mekem i kam paradaes.

Blong kasem save moa olsem wanem ol jenis long weta oli mekem profet tok blong Baebol i kamtru, ridim atikol ya “Weta i Jenis—Fiuja Blong Yumi Mo Samting We Baebol i Talem.”

Blong save moa long promes blong Baebol se wol bambae i kamgud bakegen, yu luk atikol ya “?Hu Bambae i Sevem Wol?”