Long 2023 Ples i Hot Bitim Mak—?Baebol i Talem Wanem?

Ol man raon long wol oli stap harem nogud from we ples i hot moa i bitim olgeta taem bifo, mo i gat ol disasta tu we oli kamaot from hot taem ya. Traem luk ol ripot ya:

• “Manis Jun long yia ya i hot moa i bitim olgeta yia bifo, folem rikod blong ol tempreja we oli stat blong rikodem 174 yia i pas.”—National Oceanic and Atmospheric Administration, U.S. Department of Commerce, 13 Julae 2023.

• “Long Itali, Spen, Franis, Jemani mo Polan, ples i hot bitim mak, mo oli ekspektem se tempreja bambae i kasem 48°C long ol aelan blong Sicily mo Sardinia. Hemia i hae moa i bitim ol narafala taem bifo long Yurop.”—European Space Agency, 13 Julae 2023.

• “From we wol i stap kam hot moa, i luk olsem se raon long wol bambae i gat bigfala ren mo ol bigfala flad we i save spolem ol ples.”—Stefan Uhlenbrook, daerekta we i stadi long ren, wota mo aes long World Meteorological Organization, 17 Julae 2023.

?Ol ripot olsem oli mekem yu yu wari? Traem luk samting we Baebol i talem long saed blong impoten topik ya.

?Baebol i talemaot se weta bambae i narakaen?

Yes. Taem ples i hot tumas mo weta i narakaen, hemia i laenap wetem samting we Baebol i talem se bambae i hapen long taem blong yumi. Eksampol, Jisas i talemaot se ol man bambae oli luk “plante samting we i mekem oli fraet.” (Luk 21:11) From we tempreja blong wol i stap go antap, plante man oli wari se bambae wol i kam nogud olgeta.

?Bambae wol i kam nogud olgeta?

Nogat. God i wokem wol ya blong ol man oli stap long hem blong olwe, taswe bambae hem i no letem ol man oli spolem wol ya fulwan. (Ol Sam 115:16; Prija 1:4) God i promes se bambae hem i “spolem ol man ya we oli stap spolem wol.”—Revelesen 11:18.

Baebol i soemaot se God i naf blong finisim ol problem blong envaeronmen, mo bambae hem i mekem olsem.

• “[God] i kwaetem strong win ya, nao ol wef blong solwota oli godaon, oli kam kwaet.” (Ol Sam 107:29) God i gat paoa blong kontrolem weta. Hem i naf blong stretem ol problem blong envaeronmen we oli stap mekem ol man oli safa.

• “Yu yu lukaot gud long wol ya, yu mekem i karem plante frut mo i rij gud.” (Ol Sam 65:9) God bambae i mekem se wol ya i kam wan paradaes.

Blong lanem moa long saed blong promes blong God blong fiksimap ol problem blong envaeronmen, yu luk atikol ya “?Hu Bambae i Sevem Wol?”