Ol Man Blong Politik Oli Givim Woning Long Saed Blong Amagedon ?Baebol i Talem Wanem?

Long moning blong Mande 10 Oktoba 2022, Rasia i sutum ol bom oli go long ol bigfala taon blong Yukren. Oli givimbak from samting we i hapen tu dei bifo, taem wan bom i damejem bigfala brij we i joenem Kraemia mo Rasia. Ol samting ya i hapen jes afta we ol man blong politik oli givim woning se i no longtaem bambae yumi fesem Amagedon.

• “Laswan taem we yumi stap klosap long Amagedon, hemia taem bigfala trabol i kamaot long Kuba (Cuban Missile Crisis) long rul blong [Presiden blong Yunaeted Stet John F.] Kennedy . . . Mi ting se i no gat wan isi rod blong yusum ol niuklia tul blong faet, nating se ol ami oli plan gud. Hemia i mas mekem se Amagedon i stat.”—Presiden blong Yunaeted Stet, Joe Biden, 6 Oktoba 2022.

• “Mi mi agri se i no longtaem bambae yumi fesem Amagedon. Fulwol i stap long denja.”—Presiden blong Yukren, Volodymyr Zelensky, taem oli askem long hem wanem bambae i hapen sipos oli yusum ol niuklia tul blong faet, BBC Nius, 8 Oktoba 2022.

?Olsem wanem? ?Sipos oli yusum ol niuklia tul blong faet, hemia bambae i statem Amagedon? ?Baebol i talem wanem?

?Ol niuklia tul blong faet bambae oli statem Amagedon?

Nogat. Tok ya “Amagedon” i stap long wan vas nomo long Baebol, hemia Revelesen 16:16. Amagedon i no wan wo bitwin ol nesen, be hem i wan wo bitwin God mo “ol king [long evri ples long wol].” (Revelesen 16:14) Long faet blong Amagedon, God bambae i finisim rul blong ol man.—Daniel 2:44.

Blong kasem save moa long samting we Amagedon bambae i mekem long wol, ridim atikol ya ?Wanem Ya Faet Blong Amagedon?

?Wol blong yumi mo ol man long hem bambae oli lus long wan niuklia faet?

Nogat. Long fiuja, maet ol lida blong wol oli yusum ol niuklia tul blong faet, be God bambae i no letem olgeta oli spolem wol ya fulwan. Baebol i talem se:

• “Wol i stap blong olwe.”—Prija 1:4.

• “Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:29.

Be profet tok blong Baebol mo ol samting we oli stap hapen long wol, oli soemaot se i no longtaem, bambae i gat ol bigfala jenis oli kamaot long wol. (Matiu 24:3-7; 2 Timoti 3:1-5) Yu save faenemaot wanem we Baebol i talem long saed blong fiuja sipos yu mekem fri Baebol kos blong mifala.