Nany/stock.adobe.com
Kakae i Sot—?Baebol i Talem Wanem?
“Bambae i no moa gat hanggri.” Hemia tingting blong ol lida blong wol long saed blong wan problem we i bigwan moa i bitim plante narafala problem, hemia blong evriwan long wol oli kasem naf kakae.a ?I tru se bambae i no moa gat hanggri long wol? ?Baebol i talem wanem?
Baebol i talemaot se kakae bambae i sot
Baebol i talem se kakae bambae i sot long taem blong yumi, we i kolem “ol las dei.” (2 Timoti 3:1) I no God we i stamba blong problem ya, be hem i givim woning long saed ya. (Jemes 1:13) Makem tufala profet tok ya blong Baebol.
“Olbaot long wol bambae kakae i sot.” (Matiu 24:7) Folem profet tok ya blong Baebol, bambae kakae i sot long plante ples long wol. Wan ripot blong ol man we oli stadi long problem ya, i talem se: “I olsem we wol i muv i stap gobak biaen, long saed blong finisim hanggri mo givim naf gudfala kakae long olgeta man.”b Plante handred milian man long plante kantri oli no save kasem kakae we oli nidim. Sore tumas, plante long olgeta oli ded from.
“Mi luk wan blak hos, mo man we i sidaon long hem, hem i holem wan skel long han blong hem.” (Revelesen 6:5) Long profet tok ya, hos mo man we i ron long hos oli pija blong kakae we i sot long ol las dei.c Skel we man ya i karem, hemia blong skelem kakae mo traem givim smol long evriwan. Taem man ya i stap ron long hos, wan voes i talemaot se praes blong kakae i antap bitim mak, mo hem i givim woning long ol man blong no westem kakae. (Revelesen 6:6) Hemia i stret nomo long problem tede, we plante bilian man oli no save kasem kakae o oli no gat mane blong pem gudfala kakae.
?Olsem wanem problem ya bambae i finis?
Ol man we oli gat bigfala save oli talem se wol i naf blong givim kakae long evri man we i laef long hem. Taswe, ?wanem sam problem we oli mekem se kakae i sot? ?Mo Baebol i talem se Krieta, Jehova,d bambae i mekem wanem blong winim ol problem ya?
Problem: Ol gavman oli no save finisim fasin pua mo kruked fasin we i mekem se fulap man oli hanggri.
Rod blong stretem: Wan gavman we i stret gud olgeta, hemia Kingdom blong God, bambae i tekem ples blong ol gavman blong man. (Daniel 2:44; Matiu 6:10) Tede, plante puaman oli hadwok blong pem kakae, be aninit long rul blong Kingdom blong God, samting ya bambae i jenis. Baebol i talem se Jisas Kraes we i King blong Kingdom blong God, bambae “i sevem ol puaman we oli stap krae from help, mo olgeta we oli no gat nem, mo olgeta we i no gat helpa. . . . Bambae i gat fulap garen blong sid long olgeta ples long wol, bambae oli kavremap top blong ol bigfala hil gogo i kafkafsaed.”—Ol Sam 72:12, 16.
Problem: Ol wo oli spolem ol ples mo oli westem plante mane, from samting ya, i had blong ol man oli kasem kakae we oli nidim.
Rod blong stretem: “[Jehova] i stap finisim ol wo long olgeta ples long wol. Hem i stap brekem ol bonara mo i brebrekem ol spia. Hem i stap bonem ol kat blong faet, long faea.” (Ol Sam 46:9) God bambae i spolem ol tul blong faet mo ol man we oli statem ol faet. Hemia bambae i mekem i isi blong evriwan oli kasem kakae. Baebol i promes se: “Bambae ol stret man oli olsem gras we i gru gud, mo bambae i gat pis long evri ples.”—Ol Sam 72:7.
Problem: Weta we i narakaen mo ol disasta oli spolem ol kakae mo kilim i ded plante buluk mo narafala animol we ol man oli stap kakae.
Rod blong stretem: God bambae i kontrolem weta mo mekem evri samting i stret blong kakae i gru gud. Baebol i talem se: “[Jehova] i kwaetem strong win ya, nao ol wef blong solwota oli godaon, oli kam kwaet. . . . Hem i jenisim draeples i kam ol pul blong wota, mo drae graon, i kam ol springwota. Hem i mekem se olgeta we oli hanggri oli stap long ples ya, . . . Oli saksakem sid long garen, mo oli planem ol plantesen blong grep we oli stap karem plante kakae.”—Ol Sam 107:29, 35-37.
Problem: Ol man we oli griri oli mekem kruked fasin mo wokem ol kakae we i no sef blong kakae, o oli blokem ol kakae blong i no kasem olgeta we oli nidim.
Rod blong stretem: Kingdom blong God bambae i spolem ol rabis man we oli mekem kruked fasin. (Ol Sam 37:10, 11; Aesea 61:8) Baebol i talem se Jehova “i mekem se man we narafala i stap tekemaot olting blong hem, i kasem jastis mo Hem i stap givim kakae long olgeta we oli hanggri.”—Ol Sam 146:7.
Problem: Evri yia, oli man oli westem bitim 33 pesen blong olgeta kakae long wol, sipos no, kakae ya i lus.
Rod blong stretem: Aninit long rul blong Kingdom blong God, olgeta we oli lukaot long ol kakae bambae oli mekem gud wok blong olgeta. Taem Jisas i stap long wol, hem i lukaot gud blong no westem kakae. Wan taem, hem i mekem wan merikel blong givim kakae long bitim 5,000 man. Biaen, hem i talem long ol disaepol blong hem se: “Yufala i go hivimap ol haf kakae we i stap, blong yumi no westem.”—Jon 6:5-13.
Kingdom blong God bambae i karemaot stamba blong trabol ya we man i sot long kakae, nao ol man bambae oli gat plante gudfala kakae. (Aesea 25:6) Blong save wetaem Kingdom blong God bambae i mekem wok ya, luk atikol ya “?Wetaem Kingdom Ya Bambae i Rulum Wol?”
a 2030 Agenda for Sustainable Development, we ol kantri long Yunaeted Nesen oli agri long hem long yia 2015.
b Wan ripot blong Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme, mo Wol Helt Oganaesesen.
c Blong save moa long saed blong ol fo man we oli ron long hos we Revelesen i tokbaot, luk atikol ya “Ol Fo Man Ya Long Hos ?Oli Hu?”
d Jehova i prapa nem blong God. (Ol Sam 83:18) Luk atikol ya ”?Hu Ya Jehova?”