?Olsem Wanem? ?Trutok i No Moa Impoten?

?Yu luk se i stap kam had moa blong save wanem i trutok mo wanem ol giaman tok? I luk olsem se ol man oli bilivim samting we olgeta nomo oli ting se o filim se i tru. Long olgeta ples blong wol tede, plante man oli ting se i no gat samting we yumi save talem se i trutok.

Tingting ya i no kamaot naoia nomo. Samwe long 2,000 yia finis, hedgavman blong Rom, Ponjes Paelat, i askem long Jisas long fasin we i no soemaot bilif nating, se: “?Wanem ya trutok?” (Jon 18:38) Paelat i no wet blong Jisas i ansa, be kwestin blong hem i impoten. Baebol i givim wan gudfala ansa long kwestin ya, we i save givhan long yu blong lanem wanem i trutok mo wanem i giaman tok long wol ya we ol man oli konfius.

?I gat samting we yumi save talem se i trutok?

Yes. Baebol i yusum tok ya “trutok” blong tokbaot samting we i gat pruf blong hem mo i stret. Baebol i tijim se Jehovaa God i Stamba blong samting we i tru olgeta, mo i singaot hem se “God blong trutok.” (Ol Sam 31:5) Trutok we i kamaot long God i stap long Baebol. Mo Baebol i talem se trutok i olsem laet, from we i save lidim yumi long stret rod, long wol ya we ol man oli gat ol defdefren tingting.—Ol Sam 43:3; Jon 17:17.

?Olsem wanem blong faenemaot trutok?

God i no wantem se yumi akseptem trutok blong Baebol olsem nomo, we yumi no tingbaot nating. Hem i askem long yumi blong yusum tingting blong yumi blong stadi long Baebol, mo no dipen long filing blong yumi nomo. (Rom 12:1) Hem i wantem se yumi yusum “olgeta tingting” blong yumi blong kasem save long hem mo lavem hem, mo pruvum se samting we yumi lanem long Baebol i tru.—Matiu 22:37, 38; Ol Wok 17:11.

?Giaman toktok i stat wetaem?

Baebol i singaotem Devel Setan we i enemi blong God, se “papa blong ol giaman toktok,” from we hem nao i statem. (Jon 8:44) Hem i giaman long faswan man mo woman long saed blong God. (Jenesis 3:1-6, 13, 17-19; 5:5) Kam kasem naoia, Setan i gohed blong giaman long ol man mo haedem trutok long saed blong God.—Revelesen 12:9.

?From wanem plante man tede oli stap giaman?

Long taem blong yumi we Baebol i kolem “ol las dei,” Setan i stap lidim ol man oli go krangke moa i bitim olgeta taem bifo. Plante man oli giaman blong lidim ol narafala long rod we i no stret, mo blong spolem olgeta. (2 Timoti 3:1, 13) Mo tu, plante jos tede oli stap giaman long ol man. Olsem Baebol i talem, long taem blong yumi, ol man “oli go lukaot plante narafala tija olbaot, we oli save switim sora blong olgeta,” mo “oli tanem baksaed long trutok, oli no wantem lesin long hem.”—2 Timoti 4:3, 4.

?From wanem trutok i impoten?

Ol man oli mas save trutok blong oli save trastem ol narafala. Sipos no, bambae oli no moa fren gud, mo evri samting bambae i kam nogud. God i wantem we wosip blong yumi i stanap long trutok. Baebol i talem se: “Olgeta we oli wosipim [God], oli mas wosipim hem long spirit mo long trutok.” (Jon 4:24) Blong luk olsem wanem trutok blong Baebol i save halpem yu blong luksave mo sakemaot ol giaman toktok, ridim Wajtaoa blong 1 Jenuware 2014, “Ol Giaman Tijing We Oli Pulum Man i Gowe Long God.”

?From wanem God i wantem se mi save trutok?

God i wantem se yu kasem laef, mo blong mekem olsem, yu mas lanem trutok long saed blong hem. (1 Timoti 2:4) Sipos yu kasem save long samting we God i talem se i stret o i no stret, mo yu folem tingting blong hem long laef blong yu, bambae yu fren gud wetem hem. (Ol Sam 15:1, 2) Blong givhan long ol man blong oli save trutok, God i sanem Jisas i kam long wol. God i wantem se yumi lesin long ol tijing blong Jisas.—Matiu 17:5; Jon 18:37.

?Bambae God i finisim ol giaman toktok samtaem?

Yes. God i no laekem nating we man i giaman long narafala. Hem i promes se bambae hem i spolem ol man we oli stap gohed blong giaman. (Ol Sam 5:6) Taem God i mekem olsem, bambae promes blong hem i kamtru se: “Trutok we i kamaot long maot blong man, bambae i stap olwe.”—Ol Proveb 12:19.